Te’eki fai ha fakatau vakapuna, kei lele ‘a e alelea: CEO Lulutai
‘Iai mo e talatalanoa ki ha fengaue’aki ki ha fepuna’aki fakavaha’apule’anga.
Kuo tuku holo he ngaahi ma’u’anga fakamatala ‘i he mitia fakasosiale ‘a e pehee kuo fakahoko ha fakatau vakapuna ‘a e kautaha vakapuna ‘a e pule’anga ‘oku ‘iloa ko e Lulutai Airline.
Ka kuo fakapapau’i ki he ongoongo ni ‘e he pule lahi ‘o e Lulutai Airline, Poasi Tei, ‘oku kei lele ‘a e ngaahi alelea ki he fakatau mai ha vakapuna ‘e taha ke tokoni ki he ongovaka lolotonga, he ‘oku mahino mei he vakai ‘a e kautaha ki he to e lahiange ‘a e fiema’u ‘a e kakai ‘o e fonua ki he fefolau’aki vakapuna fakalotofonua.
Ka ki ha fakaikiiki, ‘e toki tuku mai ‘i ha mahino ‘a e tu’unga ‘o e alelea ‘oku lolotonga fakahoko.
‘I he’ene fakama’ala’ala ki he Tonga Independent News, “ Ko e me’a ‘uluaki na’e fai e tokanga kiai ko e fakalahi ‘o e ngaahi vaka (fleet) ‘a e kautaha he ko e talu mei he 2020 mo e ongo vaka pe ‘e 2. Pea ko e ‘osi ‘a e covid-19 mo e hiki ‘a e lahi ‘o e fiema’u ki he fepuna’aki fakalotofonua.
Na’e fakahoko leva he kautaha ‘a e fekumi (fleeti review) ke ma’u ha fakafuofua lelei ki he ngaahi vakapuna ke fakalahi kiai, fakataha pea mo e palani (Business Plan) ki he fonga ki he kaha;u ke fakapapau’i ‘e fakahoko fakalelei ‘a e fepuna’aki.
Ko e taimi tatau ‘oku lele pea mo e talatalanoa mo e ngaahi kautaha vakapuna fakavaha’apule’anga, ke ‘iai ha fengaue’aki (partnership) ki ha ngaahi fepuna’aki fakavaha’apule’anga. Ko e vakai ‘eni ki he tafa’aki ‘etau folau’eve’eva pea mo e tokoni ki he fonua ‘i ha toe ma’ama’aange ‘a e totongi tikite ha toe lahiange ‘a e ngaahi kautaha vakapuna. Pea ‘e to e kaunga lelei ki he tu’unga faka’ekonomika ‘a e fonua fakalukufua.”
Ko e taimi taimi tatau ‘oku ‘ikai ke tuku ai hono fakaanga’i ‘a e pule’anga ‘i he kautaha Lulutai pea na’e a’u pe ki he pongipongi ni ‘a e talanga ‘a e FaleAlea ‘o fakalalahi ki he pehee ‘e Piveni Piukala ki he Palemia “ Ko e me’a pe ‘ene kui ke fa’iteliha ai, kae tuku ‘a e tukuhau ‘a e kakai”. Na’e hoko ‘eni ke fakahuu atu ai ‘e he Palemia ‘ene launga ki he lea na’e fakahoko ‘e Piveni ‘o tukuaki’i ki he me’a fakafo’ituitui.
‘Oku tui ‘a e kau fakaanga ‘oku totonu ke tuku kitu’a ‘a e kautaha vakapuna ke fakalelei fakataautaha, ka na’e ‘osi hoko ‘eni pea ‘ikai ha ola lelei he na’e ‘alu ia ke toe mamafa ange ‘a e totongi tikite, fakataha mo e to e kole noo ‘a e kautaha Real Tonga ia ki he pule’anga pea pehee ki he palopalema mo e kau ngaue ‘o fakafoki ai ‘a e kautaha ki he pule’anga.
Ko e Flyinga Niu kuonau ‘osi fakahaa ‘enau mateuteu ke fakahoko fatongia, ka ko e tuai pe hono ‘oange hanau laiseni. Ka ‘oku mahino mai ‘a e tui ‘a e pule’anga ‘e hoko ‘a e pisinisi ko’eni ko e tokoni lahi ki he pule’anga ka ‘oku fiema’u he taimi fe’unga ke fakalelei’i ‘a e palopalema mei he ngaahi me’a na’e hoko kimu’a.
