Tautea ngaue Popula (Petelo Kauvaka) ta’u 4 mahina 6 ki he faka’uli ta’etokanga hoko ai mate
Na’e tautea ngaue popula ‘e Fakamaau Lahi Petunia Tupou ‘a e Faka’iloa ko Petelo Kauvaka ‘o Lavengatonga, ki he faka’uli ta’etokanga ‘o hoko ai pekia ‘a Tevita ‘Afa Fasi ‘i he pongipongi 6 Sune 2024 ‘i he vaha’a ‘o Pelehake pea mo Malapo.
‘Oku tautea ‘a Kauvaka ke ne ngaue popula he ta’u ‘e 4 mahina ‘e 6 kae tautea toloi malu’i ‘a e ta’u ‘e 2 fakamuimui ki he ta’u ‘e 3 pea kane maumau’i ‘a e ngaahi makatu’unga ‘o e tautea toloi, ‘e pau ke ne foki ‘o ngaue’i ‘a e ta’u ‘e 2 na’e malu’i.
Kaekehe ko e fakaikiiki ‘o e talanoa, he pongipongi 6 Sune 2024, na’e faka’uli ‘a e Faka’iloa pea mo’ene pasese ‘e toko 3, ko e pekia mo hono hoa pea mo e tangata’eiki ‘o e pekia. Ko’enau fongonga ke hifo ‘a e hoa ‘o e pekia ‘i Veitongo kae hoko atu pekia mo mo’ene tangata’eiki ki he South Sea Construction ‘i Kolofo’ou ‘oku nau ngaue ai.
Ka ‘i he’enau lele mei Laveingatonga ki Pelehake na’e vave ‘a e lele ‘a e Faka’iloa pea fanafana atu ‘a e hoa ‘o e pekia ki he pekia ki he sea pasese mu’a, ke kole ki he Faka’iloa ke mamalie. Ka na’e talaange he pekia ko e nomolo pe ia ‘enau ‘alu ki he ngaue.
Ka ‘i he ‘enau a’u ki he vaha’a ‘o Pelehake mo Malapo na’e toutou fakalaka ‘a e Faka’iloa ‘i he vave ko e 70 km/hrs, ‘o ‘ikai ke ne toe mapule’i ‘a e me’alele kae sifaa ki he kautaha ‘o tui’i ‘a e fu’u niu. Pea ko e tafa’aki ‘o e pekia na’e tau he fu’u niu. Na’e hili ‘a e fakatamaki na’e feinga mai ‘a e toenga kitu’a kae toe ‘a e pekia ‘oku ne fihia he loto me’alele. Na’e toki hifo atu ‘a e kakai mei he ‘uu me’alele kehe ‘o tokoni ki hono ‘omai ‘o e sino ‘o e pekia mei he loto me’alele, kimu’a pea toki a’u atu ‘a e kau Polisi ‘o leleaki’i ki falemahaki ‘o toki maloloo ai.
Na’e tali halaia ‘a e Faka’iloa ki he tikite tamate tangata na’e faka’ilo kiai he ‘aho 20 Sanuali 2025. Pea na’e kau hono fakakaukau’i hono tautea ‘i he’ene ‘uluaki tali halaia hono ui ‘ene hopo pea pehee ko’ene ‘uluaki haa he Fakamaau’anga. Na’e kau ai ‘ene loto lelei ke fengaue’aki mo e kau Polisi pea haa mo e loto fakatomala he’ene kole fakamolemole ki he famili.
‘I he hili ‘ene ngaue popula ta’u ‘e 2 mo e konga, ‘e kamata lau mei ai ‘a e ta’u ‘e taha he ‘ikai ke ne ma’u laiseni faka’uli pe faka’uli.
Ko e Faka’iloa ‘oku ta’u 28 pea ‘osi ma’u hoa pea mavae kae ‘iai hono patina mo’ena ki’i leka ‘e toko taha. Ko e si’isi’i taha ia he fanau ‘e toko 5 ka na’e pusiaki’i. Na’ane ‘osi folau he polokalama toli, kimu’a pea ne foki mai ‘o ngaue ‘i he South Sea ka kuo malolo mei ai koe’uhi ko e hia kuo faka’ilo kiai.
‘Oku kau ‘a e ta’u kuo’osi ha ta’u na’e lahi ‘aupito ai ‘a e pekia he hala pule’anga, ka ‘oku te’eki ki tuku mai hono fakama’opo’opo.
