Tautea malu’i ta’u 2 ‘eiki vaka ‘o e Kelesi ki he maumau’i lao folau vaka tahi
Kuo tautea ‘e he tangata’eiki Tu’i Fakamaau Lahi ‘i he Fakamaau’anga Lahi ‘i Nuku’alofa he ‘aho 17 ‘Okatopa,’a e ‘eikivaka ‘o e MV Kelesi Tevita ‘Ilangana kene ngaue popula ki he ta’u ‘e 1, kae malu’i he ta’u ‘e 2.
‘Oku muimui atu he tautea malu’i, ke ‘oua tene toe fakahoko ha hia he vaha’a taimi malu’i ta’u 2 pea kene ngaue komiuniti he houa ‘e 40. Na’e kau ‘i hono fakakaukau’i hono tautea, ‘a e ‘ikai hano lekooti faihia he Fakamaau’anga pea pehee ki he lipooti mei he ‘ofisa Malu’i Angalelei.
Na’e faka’ilo ‘a ‘Ilangana ki he hia ko hono maumau’i ‘a e Lao ki he folau tahi, ‘i hono fatongia ko e ‘eiki Vaka ‘o e MV Kelesi ‘a e kainga Niua. ‘Aia ko’ene faka’ataa ke ‘ova ‘a ‘ene uta ‘i he lahi ‘oku faka’ataa he lao.
Na’e tokanga mamafa ‘a e ‘Eiki Fakamaau Lahi ki he hia ni, koe’uhi ko e malu ‘a e mo’ui ‘a e kakai pea na’e totonu ke ‘ilo pea mahino ia ki he ‘eikivaka pea mo e fakatamaki ka hoko ai. Pea kapau na’e hoko ha fakatamaki ‘o mole ai ha mo’ui pea koeha leva ‘ene me’a ‘e fakahoko kiai.
Ko e taukave ‘a e ‘eikivaka ‘i he’ene tali tonuhia pea fili ke fakahoko ‘ene hopo ‘i he Fakamaau’anga Sula, na’e maumau ‘a e vaka na’e ‘ai ke folau fakataha mai mo e MV Kelesi pea na’ane tu’utu’uni ai ke faka’ataa ‘a e kau pasese mo’enau uta kenau heka ki he MV Kelesi. Ko e fo’i tu’utu’uni ko’eni ‘oku haa fakapotopoto, ka ko’ene tu’u fakatu’utamaki ki he mo’ui ‘a e kau pasese na’e ‘iai.
‘Oku te’eki pe ngalo he kakai ‘o e fonua, ‘a e mate tokolahi ‘i he MV Ashika ko e toko 74 pea ko e fakaloloma lahi ia he ‘ikai ngalo he to’utangata ko’eni. Pea ‘oku tonu ke manatu’i pea ako lahi ai ‘a e kau ‘eikivaka kotoa ‘i Tonga ni pea ‘oua ‘e to’o ma’ama’a.
Kaekehe na’e fakahoko ‘a e tautea ‘a e ‘Eiki Fakamaau Lahi ke mahino ‘a e nunu’a ‘ene faitu’utu’uni, ‘oku kei mahu’inga ange pe ‘a e mo’ui ‘a e kakai ‘i ha toe ‘uhinga malie
