Tautea malu’i kau talavou Ha’ateiho ki he mate matapule Pahu
Kuo tautea toloi malu’i kakato ‘e he ‘Eiki Fakamaau Lahi, ‘a e kau Talavou Ha’ateiho, na’e tukuaki’i ki he pekia ‘a e talavou mei Pahu ‘i he 2023. Ko e kau Faka’iloa ko Tevita Lisiate, Mafua Palu, Mesuilame Finua, Moana Masima, Lisiate Vea, Salamani Filikitonga, Siosifa Vatuvei pea mo Viliami Tongamana.
Na’e tautea ke ngaue popula kotoa ‘a e kau Faka’iloa ki he ta’u ‘e 3, kae malu’i kotoa ‘i he ngaahi makatu’unga.
Kenau lipooti ki he ‘Ofisa Malu’i Angalelei ‘i loto he 48 hrs.
Kenau ngaue komiuniti he 100 hrs ‘i he mahina ‘e 12.
Ke totongi he tokotaha kotoa kau Faka’iloa $2000 ki he famili pekia.
Ke ‘oau na’anau toe huu ki he fale kavamalohi.
Kenau kau atu ki he ako ki he faito’o konatapu mo e ‘olokaholo.
‘Oku malie foki ‘a e tu’utu’uni ‘a e ‘Eiki Fakamaau Lahi he na’ane tuku mai ‘a e ngaahi tautea he’ene hilifaki tautea ‘o hangee ka ngaue popula ‘a e kau Faka’iloa, ‘i he ta’u na’ane kamata ai hilifaki tautea. ‘Oku fakatataa ‘aki ‘a Mesui Finau na’e kamata hono tautea ‘i he ta’u ‘e 7yr pea to’o mei ai mahina ‘e 6 pea toloi ‘a e tau ‘e 2 fakamuimui pea te ne ngaue’aki ‘a e ta’u ‘e 4. Pea ko e toenga na’e tautea ki he ta’u ‘e 4 pea toloi ‘a e ta’u 1 fakamuimui.
Ka ‘i he aofangatuku ‘a e ‘Eiki Fakamaau Lahi, na’ane tukuhifo kotoa ki he ta’u ‘e 3 ‘a e tautea ‘o e kau Faka’iloa pea toloi kakato, kae malu’i ta’u ‘e 3 kotoa ‘i he ngaahi makatu’unga ‘i ‘olunga.
‘I he angamaheni ‘o e ngaahi hilifaki tautea, ko e ta’u ngaue kuo hilifaki pea ko e lahi taha pe ‘o e tautea toloi ko e ta’u ‘e 2 pea kuopau ke ngaue’i leva ‘a e toenga mei he ta’u ‘e 2. Ka ko’eni kuo toloi kakato ‘a e ta’u ‘e 3.
Kaekehe ‘i he fakama’ala’ala ‘a e Eiki Fakamaau Lahi, na’ane fakamahino ko e fakatamaki na’e hoko na’e kaunga lahi kiai ‘a e kavamalohi ‘o fakatatau ki he ngaahi fakamo’oni, ‘o makatu’unga ai ‘a e kee na’e fakahoko. Pea na’ane ui fakahangatonu ai ki he kau ma’u mafai ke faiange ha tokanga ki he ngaahi fale laiseni kavamalohi.
‘I he taimi tatau na’ane na’ane toe fakamamafa’i ‘a e kei ta’u iiki ‘a e kau Faka’iloa, he vaha’a ta’u ko e 18-20 pea mahino ‘enau kei anga fakatamaiki. Ka ko e faingamalie ‘oku ne ‘oange kenau ako ke fakatonutonu ‘enau mo’ui pea mo’ene ui ki he kau taki ‘o e Siasi ‘o Sisu Kalaisi ‘oe kau Ma’oni’oni, ‘i he ngaahi ‘aho Kimui ni, ‘aia ‘oku kau kiai ‘a e tokolahi ‘o e kau talavou, kenau fakahoko ha ngaue ki he kau talavou.
Ko e konga malie ‘e taha ‘o e hilifaki tautea, ko e pau ke totongi he tokotaha kotoa ‘o e kau Faka’iloa ‘a e taki $2000 ki he famili ‘o e pekia.
‘I he ta’u lahi ‘o e ongoongo ni he falehopo ko e toki hopo tamate tangata ‘eni kuo totongi huhu’i pa’anga, ‘o fakatatau ki he manatu ‘a e ongoongo ni pea ‘oku ‘iai ‘a e tui koe’uhi pe ko e meesi kuo fakahoko.
Kaekehe na’e faka’osi ‘aki ‘e he ‘Eiki Fakamaau Lahi ‘ene kei fie kaungamamahi mo e famili ‘o e pekia.
‘Oku ‘oatu he ongoongo ni ha fehu’i ki he ‘ofisi ‘o e ‘Ateni Seniale pe tenau fakahoko ha tangi ‘i he tu’utu’uni kuo fakahoko pea ‘e ‘oatu ha tali ‘e tuku mai.
