Tali tangi ‘a Lord Luani ke liliu ‘api ‘uta mo e ‘api lisi ‘e ua ki hono hingoa, ko e konga totongi mo’ua ‘o Lord Nuku
Kuo tali ‘e he Fakamaau’ang Tangi ‘a e kole ‘a Lord Luani mo’ene tokotaha tanaki mo’ua (debt receiver) Ms Tiana Warner, ke fakahoko leva hono liliu ‘a e ‘api ‘uta mo e ongo ‘api lisi ‘e ua ki he hingoa ‘o Lord Luani ko e konga ‘o e totongi ‘o e mo’ua ‘o Lord Nuku kia Lord Luani, he’ena hopo na’e fakahoko ‘i he 2017.
Na’e tu’utu’uni ‘a e Fakamaau’ang Tangi ke fakahoko he Fakamaau’anga Lahi ha sio ki he tu’utu’uni kuo fakahoko pea ke fakaloloa mo e taimi ngaue ‘a e tanaki mo’ua ke toki ‘osi he 2026 pea ke totongi ‘e Lord Nuku ‘a e fakamole fakalao.
Ko e fakatonutonu fakalao na’e fakahoko ‘i he 2017 ‘o mo’ua $3,380,335.00 ‘a Lord Nuku mo e kautaha Siaina. ‘I he 17 Siulai 2020 na’e ‘iai ‘a e tu’utu’uni ke liliu ‘a e ‘api ‘uta mo e ‘api lisi fika #9436 mo e #9473 ki he hingoa ‘o Lord Luani ko e konga ‘o e totongi mo’ua.
Ko e kau ‘eni he hopo fuoloa ‘aia na’e halaia ‘a Lord Nuku ‘i he Fakamaau’anga Kelekele ‘i he’ena fakatonutonu fakalao mo Lord Luani he ‘api ‘uta ‘i Malapo na’e tu’u ai ‘a e fu’u maka. Na’e lisi he foha ‘o Lord Nuku ‘a e ‘api ‘uta mei he tokotaha ma’u ‘api ka na’e te’eki ke fakamo’oni kiai ‘a Lord Luani ko e ma’u tofi’a. Ko e taimi tatau na’e lisi ‘a e fu’u maka ki he kautaha Siaina ‘onau ngaue’aki ki he’enau ngaue langa mo e tanuhala.
‘I he hopo, na’e ui ai mo e kau taukei he Savea kenau fakamatala ki he lahi ‘o e maka kuo to’o mei he fu’u maka pea fakamahu’inga’i ‘o fe’unga pea mo e $3,380,335.00. Na’e fakahoko mo e ngaahi alea ki he founga ke fakahoko ‘aki ‘a e totongi ‘o e mo’ua he ko e mo’ua lahi. Pea kau ai mo hono liliu ‘o e ‘api ‘uta mo e ‘api lisi ‘e ua kia Luani.
‘I he taimi tatau na’e ‘ikai ke lava ‘o fakahoko ‘a e ngaue ki hono liliuu pea taukave ‘a Nuku ki he Fakamaau’anga, ‘oku pule pe ‘a e Minisita ki he ngaue ki hono liliu pe te ne tali pe ‘ikai. Pea na’e too nounou ‘a e fakamaau’anga ke fakahaa ‘a e ‘uhinga ‘o e ta’etali he Minisita ke fakamo’oni ki he liliu pea ko e hopo na’e fakahoko ia ‘i he Fakamaau’anga kelekele pea mo e taha, ‘oku ‘ia ‘a e taimi ke fakahoko ai ‘a e ngaue pea toki kakato. Pea ko hono faka’osi na’e tu’utu’uni ‘a e Fakamaau ke fakakau ‘a e hingoa ‘o e ongo nopele ki he fakatonutonu ka na’e ‘ikai fakahoko ia.
Ka ‘i he tali mei he tafa’aki ‘a Luani, Ko e ngaue ki he liliu ‘oku lava ‘o fakahoko ‘o fakatatau ki he lao pea na’e ‘osi kau pe hingoa ‘o e ongo nopele ki he fakatonutonu ‘o fakatatau ki he tu’utu’uni ‘a e Fakamaau. Ko e taha ‘oku ‘ikai ke toe fiema’u ‘a e Minisita mo Nuku ki he liliu he ‘oku ma’u he fakafofonga tanaki mo’ua ‘a e mafai kotoa ke fakafofonga’i ‘a Lord Luani.
Na’e kau foki ‘i he taukave ‘a Lord Nuku, na’e ‘osi ‘a e laiseni ngaue ‘a e tokotaha tanaki mo’ua, ka na’e fakahaa ‘e he tu’utu’uni na’e ‘osi fakahoko ‘ene ngaue ki hono fakaloloa ‘ene laiseni ka ko e palopalema ko e tuai mei he Fakamaau’anga..
Kaekehe ko e tu’u leva he taimi ni, ‘e fakahoko he Fakamaau’anga Lahi ‘a e fakakakato ‘o e tu’utu’uni kuo fakahoko ‘e he Fakamaau’anga Tangi ke fakahoko ‘a e liliu ‘o e ‘api ‘uta pea mo e ‘api lisi ‘e ua ki he hingoa ‘o Lord Luani.
