Tali lelei ‘e he kau Taki ‘o Tonga e ‘Eiki Fakamaau Lahi fo’ou neongo hoha’a kakai ‘o e fonua
Kuo tali lelei ‘e he Fakataha Tokoni ‘ene ‘Afio pea mo hono kau memipa ‘oku nau tokanga’i hono fili ‘o e kau Fakamaau ki he Fonua, ‘o kau ai pea mo e lakanga mahu’inga taha ‘i he Fakamaau’anga ‘o Tonga ‘a e ‘Eiki Fakamaau Lahi. Pea pehee ki he Palemia mo’ene Kapineti ke hoko ‘a Malcon Lesilie Bishop KC ko e ‘Eiki Fakamaau Lahi fo’oa ‘a Tonga.
‘Oku hoko ‘eni lolotonga ‘a e kei mo’utafu’ua ‘a e tokolahi taha ‘o e kakai ‘o e fonua, koe’uhi ko e tu’unga mo’ui fakato’ituitui ‘a e tokotaha ni ‘o fakatatau ki hono hisitolia na’e kei (gay) pe ko e nofo pe mali pe mo e tangata. Ka ‘oku kau ‘eni ia he to’onga mo’ui ‘oku faka’ikai’i mamahi he tohitapu pea mo e lotu fakakalisitiane, ‘o kau ai ‘a Tonga ni he ko e tokolahitaha ‘o e fonua ko e kau Kalisitiane.
Ko e fakaloloma ‘oku ‘ikai ha tokanga mai ‘e taha ‘a e kau taki ‘o Tonga ki he le’o ‘o e kakai, ka ‘oku nau fakahoko pe ‘enau tu’utu’uni ‘o fakatatau mo honau loto. Pea ‘oku toe fakaloloma ange ko e tokolahi ‘o e kau takilotu he ngaahi siasi lalahi ‘i Tonga ni, ‘oku ‘ikai hanau lau ki he kaveinga mahu’inga fekau’aki mo e kaingalotu honau ngaahi fungavaka.
Kuo ‘iai ‘iai ‘a e tokolahi kuonau fakahaa ki he ongoonogo ni, ko e hala fononga ‘oku fou atu ai ‘a Tonga ki he kaha’u, ‘oku ‘ikai toe kehe ia mo e talanoa ki he kameli na’e kole ki hono tauhi ke ki’i huu fakakonga atu pe hono sino ki he teniti he ‘oku mokosia. Na’e faifai pe ‘ene kole ke huu atu e konga kehekehe hono sino pea fakaiku talanoa, na’e akahi he kameli hono tauhi kitu’a kau mohe ia he teniti. Pea ‘oku nau tui ko e kamata ‘eni ke huu mai ‘a e ngaahi me’a fakalilifu ki he fonua pea tetau toki hahaka hake kuo tomui.
‘I he taimi tatau foki, ‘oku ‘iai ‘a e ni’ihi ‘oku nau tui kinautolu ‘oku ‘ikai ha palopalema, kapau ‘e mo’ui fakasotoma pe Fakamaau Lahi kae fakahoko lelei pe hono fatongia ko e Fakamaau Lahi pea ko e taha, ‘oku tokolahi pe ‘a e kakai he fonua ni ‘oku nau mo’ui tatau pe mo e Fakamaau Lahi pea koeha ‘oku tau ta’etali ai.
Kaekehe na’e fakahaa ha taha ia ‘o e kau tangata Tonga nofo ‘Aositeleliai ki he ongoongo ni, ko hono kehekehe, ko’etau me’a fakafo’ituitui mo e anga fakavao ‘oku fakahoko pe ia he vao mo e ngaahi feitu’u pehee. Ka ko’ene too koia ki he ngaahi lakanga mahu’inga he pule’anga ‘oku ngalivale ke tau faipehee ai. He ‘oku tau tuku atu ‘a e fekau hala ki he’etau fanau mo mamani fekau’aki mo kitautolu. ‘Oku ‘ikai ke toe kehee ia mo hatau ako’i ‘etau fanau ‘oku kovi ‘a e ifi tapaka pea tau ‘omai ‘a e tama ifi tapaka ke ha’u ‘o faiako ki he’etau fanau pea ‘e fefee ‘a e ‘atamai ‘a e fanau henau vakai ki he me’a ‘oku tau ako’i mo e me’a ‘oku tau fakahoko.
Na’e tuku atu ‘e he ongoongo ni ki he Palesiteni ‘o e Lady Association mo Joey Mataele pe ‘e lava ke ‘omai ha lau ‘enau tafa’aki ki he ngaahi fakaanga ko’eni ‘oku fakahoko, ka na’e fakahaa ‘e toki ‘omai ‘enau lau ka ‘oku te’eki ke a’u mai.
Kuo tuku atu ‘e he ‘Ateni Seniale maloloo ‘a Tonga, ‘Aminiasi Kefu ‘ene fakama’ala’ala fakalao mo’ene vakai Tau’ataini pea pehee ki he vakai mei he tafa’aki ‘etau kau Faifekau Dr. Ma’afu Palu ki he kakai ‘o e fonua.
‘I he taimi tatau kuo ‘osi kamata ngaue ‘a e ‘Eiki Fakamaau Lahi, ka na’e vakai atu ‘a e ongoongo ni ki he ngaahi keisi na’e totonu ke lele ‘i hono malumalu ka na’e te’eki ke lava ‘i he ‘aho ‘e 2 kuohili pea ‘oku ‘iai ‘a e tui ‘oku te’eki ke maau ‘a e ngaahi hopo pe ko e ‘Eiki Fakamaau Lahi ke kamata e ngaahi hopo.
Pea ‘oku mahu’inga pe ki he kakai ‘o e fonua kenau faka’apa’apa’i ‘a e Tu’i Fakamaau Lahi ‘i hono lakanga mahu’inga neongo ‘a e ‘ikai ke fai ha tui tatau he’ene mo’ui fakafo’ituitui. Pea ‘oua na’a hoko ia ko ha ‘uhinga ki ha ni’ihi kenau anga ta’efaka’apa’apa mo tuli tonuhia ke maumau’i ‘a e lao ‘o e fonau pe anga ta’efaka’apa’apa ki he Tu’i Fakamaau Lahi pea mo e lao ‘o e fonua.
