Tali he Fale Alea ke sivi faito’o konatapu kau memipa ‘oku fie sivi.
Na’e tali ‘e he Fale Alea ‘o Tonga he pongipongi ni ke sivi faito’o konatapu ‘a e kau memipa Fale Alea, hilli ia a e fokotu’u mei he Fakafofonga Nopele ‘o ‘Eua.
‘I hono ‘ohake he Nopele ‘a e fokotu’u fakakaukau na’e hangee pe ‘oku faka’ape mo fakaoli, ka na’e fusi’i ‘e he Sea ‘o e Fale Alea ‘a e kaveinga ke mahino ‘oku fakamaatoato ‘o a’u ki he tu’unga ko hono paloti’i ‘o tali he loto kotoa kiai ‘a e kau memipa.
Lolotonga ‘a e talanga, na’e ‘iai ‘a e fokotu’u mei Niua 17 Vatau Hui, ke fakakau mai ‘a e Sotia ki he ngaue ‘o e drugs he ‘oku kehe ange ‘enau taliui mo e ngaue. Ko e kau Polisi kuo lahi hono tukuaki’i kinautolu he ta’efaitotonu pe kohono totongi fakafufuu kinautolu ‘e he kakai pea ‘oku mole ‘a e falala, tenau lava ‘o fakahoko ‘a e ngaue. Ka na’e pehee mei he Minisita Polisi ka ko e Palemia, ke fakafoki ‘ene lea koe’uhi ko e tukuaki’i mamafa ‘oku ne fakahoko.
Na’e fakalalahi ‘a e talanga ki he faito’o konatapu koe’uhi ko e lipooti Fale Alea ‘a e ngaahi vahenga ‘e ni’ihi pea hu hake ai mo e fakamatala ‘a e kau Polisi ki he faito’o konatapu 17kg na’e puke mei Vaini ‘a e 12kg pea puke ‘a e 5kg mei Fasi. Na’e toki ma’u foki ‘a e matapule ngaue ‘i he Pangike Pule mo e faito’o konatapu na’e tauhi he pangike mo e konga mei honau ‘api mo hono tuofefine.
Kaekehe na’e fokotu’u ‘e Lord Tu’ilakepa ke ‘omai ha FBI mei ‘Amelika ke ne fakatotolo’i ‘a e kau tila he ko e vave atu mo mataotao ‘enau ngaue.
Ko e fo’i ‘aliaki na’e malie taha ko e fakahaa ‘e Piveni Piukala ki he fale ‘oku ne tui ‘oku ‘iai ‘a e ni’ihii he kau memipa Fale Alea ‘oku nau fekaunga’aki mo e faito’o konatapu. Ko e tokolahi ‘o e kau ngaue popula ‘i Hu’atolitoli ko e felave’i mo e drugs ka ko e fanga ki’i kau runner pe mo e faka’aonga’i, ka ko e kautama fakatu’utamaki taha ko e kau huu mai mo hono fakatau atu.
Na’e malie ‘enau fetukuaki ‘o hangee ‘eni ia ‘e tala he tama koee ko e memipa koee ‘oku tila faito’o konatapu, ‘o hono talaange ‘e Piveni ka Nuku ke toe vakiliange ‘a e fakatotolo he na’e ‘iai ‘a e 1kg na’e ma’u mei Kolonga, ka ko e hili ia ‘a e fakahua ‘a Lord Nuku ko e me’a ‘oku matengata’a ai ‘a Piveni naku mihi ia.
Kaekehe na’e paloti’i ‘o tali ke fakahoko ‘a e sivi faito’o konatapu, ka ‘e tau’ataina pe kau memipa koe’uhi ko e tu’u ‘a e lao. Ka na’e fakahaa ‘e he Sea ‘o e Fale, ‘e fakahoko ‘a e taliui ke mahino ‘a kinautolu ‘oku sivi mo kinautolu na’e ‘ikai sivi ka ‘oku tau’ataina pe kau memipa.
Ko e tu’u ko’eni ‘oku tui ‘a e tokolahi ‘e sivi kotoa ‘a e kau memipa koe’uhi ko’enau vakai ki he sio honau ngaahi vahenga mei tu’a pea pehee ki he vakai mai ‘a e Tama Tu’i ki he kau nopele ‘e toko 9 he fale.
‘Oku ‘iai foki mo e tui ko e kamata ‘eni ke hoko atu mo e me’a tatau ki he ngaahi Potungaue ‘a e pule’anga mo e ngaahi feitu’u kehekehe ‘i Tonga ni ‘o kau ai mo e Ngaahi Pisinisi Taautaha.
