Tali ‘Eiki Fakamaau Lahi ke malu’i kitu’a ‘Ofisa Kasitomu mo e ‘Ofisa Sela tukuaki’i ki he huu mai faito’o konatapu kilo 3
Kuo tali ‘e he ‘Eiki Fakamaau Lahi ‘a Tonga, ke malu’i kitu’a ‘a e ‘ofisa Sela ko Silika Asa Tonga pea mo e ‘ofisa Kasitomu ko Uinikoni Kivalu, ‘o tali ai ke toki fakahoko ‘ena hopo.
Na’e puke he kau Polisi ‘a e ongo ‘ofisa ngaue fakapule’anga, ko e tukuaki’i kinaua ki he ngaue’aki ‘i he ‘ilopau ki hono huu mai ‘a e faito’o konatapu he kalasi A ko e (meth), na’e fe’unga hono lahi mo e 2687.43 gram.
Na’e ‘ikai foki tali ‘e Fakamaau Polisi Mana Kaufusi ke malu’i ‘a e ongo Faka’iloa kitu’a, ka na’e fakahuu atu ‘e he fakafofonga lao ‘a e ongo Faka’iloa Ms ‘A Kafoa ‘enau tangi ki he Fakamaau’anga Lahi ‘o tali ke malu’i kinaua kitu’a.
Fakatatau pea mo e ngaahi makatu’unga ‘oku ‘ikai fa’a tali ke malu’i ai kitu’a ha Faka’iloa, ko e ‘uhinga na’a ‘ikai ke haa he ‘aho hopo, kae pehee ki ha’ane toe fakahoko ha hia lolotonga hono malu’i, kau ai mo ha’ane uesia ‘a kinautolu ‘o e kau fakamo’oni ki he hopo. ‘Oku kau foki ai ko hono malu’i ‘a e mo’ui ‘a e Faka’iloa ‘i hono tauhi pe he malumalu ‘o e kau Polisi pea ko hono tauhi pe ke fakakakato hono faka’eke’eke mo e ngaahi ‘uhinga kehe pe.
Ka ‘i he vakai’i he ‘Eiki Fakamaau Lahi, ‘a e ngaahi ‘uhinga na’e fakahuu atu mei he fakafofonga lao, na’ane tu’utu’uni ai ke tali ‘a e kole malu’i kitu’a ‘a e ongo Faka’iloa, ka kuopau ke ‘iai hono makautu’unga.
Kuopau ke ‘oua na’ana toe fakahoko ha hia lolotonga hono malu’i kinaua kitu’a, kuopau ke na nofo he feitu’u pau ‘oku na nofo ai. Na’e tu’utu’uni ke puke ‘ena paasipooti pea fakakau hona hingoa ki he lisi ‘o kinautolu ‘oku ‘ikai ngofua ke mavahe mei Tonga ni. Kuopau ke na taliui tu’o ua he uike ki he ‘api Polisi ‘i Nuku’alofa pea ke na nofo ma’u honau ‘api mei he 6pm -6am he ‘aho kotoa.
‘Oku kau foki ‘eni he ngaahi hopo ‘oku tu’u telinga kiai ‘a e kakai ‘o e fonua koe’uhi ko e kaunga kiai ‘a e kau ngaue fakapule’anga, ka ‘oku toe lahiange, ko e ‘amanaki ‘a e kakai ‘o e fonua ‘e tala he ni’ihi ko’eni ha ngaahi hingoa ‘oku kaunga mo e faito’o konatapu.
‘Oku kei fakaongoongo ki he hopo ‘a e ‘ofisa ngaue Pangike Pule mo e kilo ‘e 15 pea toe ma’u ‘a e konga ‘i he ‘api ngaue pea ‘oku kau ia he fakatupu fifili pe koeha hono ‘uhinga na’e tuku ai he pangike.
Kuo ‘iai ha ‘ofisa Kasitomu ma’olunga kuo ngaue popula ki he hia tatau pea iku ke pekia pe he loto pilisone pea neongo kuo te’eki ke tuku mai ‘a e ‘uhinga ‘ene mate, he na’e fai hono fehu’ia.
Ko e ‘ofisa Kasitomu ma’olunga ‘e taha, na’e hao ia mei hono faka’ilo he na’ane tala ‘e iai ‘a e tokotaha na’ana fengaue’aki pea puke ia he kau Polisi. ‘Oku fakatauange pe ‘e lea ‘a e ni’ihi ko’eni, ka ‘oku mahino pe kanau lea ki ha kakai ma’olunga he fonua mo e pule’anga ‘e ‘iai tu’u fakatamaki ki he’enau mo’ui. Ka pole ia kiate kinautolu ke malu’i ‘a e kau faihia kae inu ke kakai ‘o e fonua hono kanongatamaki.
