Ngaue popula ta’u 16 ki he pa’usi’i hono ‘ofefine ta’u 8 mo e ‘ofefine he lao(step-daughter) ta’u 10 mo e 12
Na’e tu’utu’uni ‘a Fakamaau Lahi Langi ‘i he Fakamaau’anga Lahi ‘o Vava’u, ‘i he ‘aho 26 ‘Epeleli, ke ngaue popula ha tamai ta’u 42 ki he ngaahi hia mamafa ‘e 6 ki hono pa’usi’i fakalielia ‘a e fanau ta’u iiki.
Pea kuo hilifaki ai ‘a e tautea ko e ngaue popula ki he ta’u ‘e 16 kae toloi ‘a e ta’u ‘e 2 fakamuimui ‘o malu’i angalelei ki he ta’u ‘e 3. ‘Oku fakatatau foki pea ngaahi hopo kuo a’u ki he Fakamaau’anga pea mo e ngaahi kautaha ki hono malu’i ‘a e kakai fefine mo e fanau, ko ngaahi hia pa’usi’i fakalielia ‘o e longa’i fanau fefine ta’u iiki, ko e 80% ia ko e fakahoko pe he kakai falala’anga pe famili ofi ki he longa’i fanau, ‘o hangee ko e tamai, fa’etangata mo e tamai (step father). Pea ‘oku ‘alu pe taimi ia mo e hikihiki pe ki ‘olunga ‘a e hia ko’eni he fonua ni.
Kaekehe ko e fakaikiiki ki he tukuaki’i mamafa ‘i he hopo ni na’e fakahoko ‘e he Faka’iloa ‘a e hia ni ‘i he 2021 ki he ongo ki’i ‘ofefine hono mali, lolotonga ia ‘oku ta’u 12 ‘a e tokotaha pea ta’u 10 ‘a e tokotaha ‘i he ngaahi taimi kehekehe pe. Ko e taimi ‘oku mavahe ai ‘a e fa’ee ki he kautaha lalanga ‘oku kau kiai ‘oku toki fa’a foki mai ki he laine ‘o e 6 he efiafi pe toe tuai ange ai. Ka ko e ngaahi taimi ia ‘oku fakahoko ai ‘e he Faka’iloa ‘a e hia ‘i he taimi ‘oku ‘ikai ke ‘i ‘api ai ‘a e fa’ee.
Ka ‘oku toe fakaloloma ange ko e toe hanga pe ‘e he Faka’iloa ‘o fakahoko ‘a e hia tatau ki hono ki’i ‘ofefine tonu mo e Talataaki lolotonga ‘oku ne kei ta’u 8.
‘I he taimi ‘e taha na’e ‘ilo ai he fa’ee pe ko e Talatalaaki ha vitio he telefoni ‘a e Faka’iloa, ki he’ene hulu vitio ‘ene pa’usi’i hono ‘ofefine. Na’e ‘eke ki he Faka’iloa pea ne vetehia ki he hia na’ane fakahoko pea ne palomesi he ‘ikai te ne toe fakahoko ha hia pehee pea ‘ikai lipooti ki he kau Polisi.
Ka ‘i he’ene a’u mai ki Sune ‘o e 2023 na’ane toe fakahoko pe ‘a e hia tatau ki he kau mamahi ‘onau fakahaa ki he’enau fa’ee ko e makatu’unga pe he sio ‘a e ongoleka lalahi ki he to’onga hona ki’i tehina ka ko e ‘ofefine tonu ‘o e Faka’iloa, he ko e me’a tatau kuona ‘osi fou mai ai. Na’e tala he leka si’isi’itaha ‘a e me’a kotoa ki hono ongo ta’okete pea manavasi’i ke tala ki he’ene fa’ee, ka na’e fai pe ‘o ne tala kotoa ‘a e me’a ‘a e Faka’iloa na’e fakahoko ange kiai.
Na’e launga’i ai pe he fa’ee ‘a e Faka’iloa he ‘aho 20 Siulai 2023 ki he kau Polisi ‘o puke ‘a e Faka’iloa ‘o faka’ilo ki he ngaahi tikite ‘e 6. Ko hono fak aikiiki ‘o e hia ‘oku fu’u paluku fau ke fai ha vakai kiai.
Kaekehe na’e tu’utu’uni ai pe ‘a Fakamaau Lahi Langi ke fakamavahe’i mai ‘a e Faka’iloa mei Vava’u ki Hu’atolitoli ki Tongatapu, ke ‘oua na’a toe ofi ki he kau Mamahi mo’enau fa’ee.
