Na’e ‘osi kole ke ngaue’aki ngaahi fakatau’anga ika kuo teuteu he pule’anga: CEO Poate Taulanga
Na’e tukuhake ‘i he uike ni ‘a e ngaahi vitio kehekehe kau ai ‘a e kainga toutai mei ‘Eua, ko’enau ta’efiemalie ki he faitu’utu’uni ‘a e Poate Taulanga ke ‘oua na’a toe fakahoko ha fakatau ika mei he tau’anga vaka iiki he ve’ehala Taufa’ahau ‘i Ma’ufanga.
Na’e hoko ‘eni ke fakaanga’i lahi ‘e he kakai tokolahi ‘a e potungaue he ‘ikai faka’ataa ‘a e kau toutai ‘Eua, ke fakatau atu ‘enau ika. Ko e tokolahi ia ‘oku ‘ikai kenau toe feinga kinautolu ke ‘ilo ki he mo’oni, ka koeha pe me’a ‘oku ‘ohake he FB pea ko e fo’i mo’oni pe ia. Pea ko e palopalema lahi ia ‘a e hake mai ‘a e tekinolosia, ko e ‘ikai mateuteu ‘a e tokolahi ke faka’aonga’i lelei mo fakapotopoto.
Koe’uhi ko e lahi ‘a e talanga, na’e fetu’utaki hangatonu ai ‘a e ongoongo ni pea mo e CEO ‘o e Poate Taulanga ‘Alo Maileseni, ke ‘omai mu’a ‘a e tafa’aki ‘a e Potungaue Taulanga ke fai ha vakai kiai.
‘I he fakama’ala’ala ‘a Maileseni, “na’e ‘osi fakahoko ‘a e kole kiate kinautolu ke ngaue’aki ‘a Tu’imatamoana mo e fakatau’anga ika ‘i Patangata, ke fakatau atu ai ‘enau fangota, kae tuku ‘a e tau’anga vaka he ve’ehala ke tauhi ke ma’a mo namulelei he ‘oku tu’u ve’ehela pea kakai ‘ia. Pea ko e taha, ko e feitu’u ‘eni ‘oku ngaue’aki he ngaahi vaka ki Pangaimotu mo ‘Atataa hono fetuku ‘enau kau folau ‘eve’eva pea ‘oku fiema’u ke ma’a mo faka’ofa’ofa. Ka na’e ‘ikai ke fai kiai ‘a e kainga pea ko e me’a pango ko’enau to e vave ki he ope ‘o tukuaki’i ‘a e Potungaue, kae ‘ikai ke tuku atu ‘a e fakamatala kakato.”
Kaekehe ko e me’a mahu’inga ke ‘ilo ‘a e kakai ki he talanoa kakato. He kuo ‘osi ngaohi ‘e he pule’anga mo e Potungaue Taulanga ‘a e feitu’u ke fakahoko mei ai ‘a e fakatau atu ‘enau toutai, ka ‘oku ‘iai pe kakai ia ‘oku ‘ikai ke fie muimui ia ki he tu’utu’uni kae fakahoko pe me’a ‘oku nau loto kiai.
‘Oku ki’i kehe foki ‘a e fakatau atu ngaahi koloa kehe hangee ko e ngoue pea mei hono fakatau atu ‘a e ika, he ‘oku ‘iai hono ngaahi ha’aha’a. Pea ko e tu’utu’uni fakapotopoto ke ‘ave kinautolu ki ha feitu’u pau. Ko e feitu’u ‘oku ta’ofi ‘oku kakai’ia he taimi lahi pea ‘oku fiema’u ke faka’ofo’ofa.
Ka ‘oku fakaoli ko e toe fakamatalili ‘a e kainga ia mei Patangata, ‘enau hulu vitio ‘a e fanau tangata he fale fakatau’anga ika ‘oku fakahoko ‘enau inukava. Pea ko’enau fakahua henau vitio ke kataki ko e fale fakatau’anga ika ko e fale inukava mo mohetaha ia ‘a Patangata. Ko e fakahua pe foki ‘a e ni’ihi ko’eni ko’enau fakamatalalili ki he felauaki koia ‘i he Facebook, he ‘oku nau ‘ilo ko e feitu’u ia na’e totonu ke oo mai kiai ‘a e kau fakatau ika.
Ka ‘oku ‘iai ‘a e tui lahi, ko e ‘uhinga ‘enau fie fakatau ika he feitu’uni ko’ene ofi ki he’enau vaka he uafu, ‘o ‘ikai kenau toe hifo ‘o fetuku loloa. Ka ko e laku hake pe ‘enau ika mei vaka ki he kau fakatau ‘oku ofi pea faingofua, ka ko e pango ko e feitu’u koia ‘oku fiema’u ia ke ma’a pea namu lelei pea ‘ikai ko ha fakatau’anga ika ia.
‘Oku malie mo e ni’ihi kuo hiki vitio ‘o fakamanamana ki he Potungaue, ka ko e mo’oni ko e tonounou faka’ilo ki he me’a totonu na’e hoko, ta na’e ‘osi fakahaa kiate kinautolu ‘a e feitu’u totonu, ka ‘oku nau loto pe kinautolu ke fai honau loto.
