Na’e ‘ikai ha’aku felave’i mo hono puke ‘o ‘Asiata ‘oku ‘ikai keu facebook
Ko e fakahaa ia ‘e Lord Tu’ilakepa ki he ongoongo ni ki he ngaahi tukuaki’i kuo fakahoko fekau’aki pea mo hono puke ‘o ‘Asiata, ‘e he kau Polisi.
‘Oku tukuaki’i ‘e he paati PTOA, na’e puke ‘a ‘Asiata ko e launga na’e fakahoko ‘e Lord Tu’ilakepa ki he kau Polisi ‘o fekau’aki pea mo e vitio ‘a ‘Asiata. Na’e toe tukuaki’i na’e hanga ‘e he nopele ‘o totongi pea mo e tokotaha na’e tipooti mai mei muli pea toe ngaue popula ‘i Tonga ni, ke hoko ko e tangata le’o (security) ‘a Pita Pua ko e taki ‘o e paati ‘oku ‘iloa ko e TUU.
Ka ‘i he fakama’ala’ala ‘a Tu’ilakepa ki he ongoongo ni, “‘oku ‘ikai ha’ane ‘ilo ki he kaveinga ‘oku faiange ai ‘a e fetu’utaki, he ‘oku ‘ikai ke facebook ia pea ‘oku lolotonga mo’ua ia he ngaue ‘oku mahu’inga ange ko e ‘a’ahi Fale Alea ‘a Vava’u 14 fakataha pea mo e Minisita Mo’ui Dr. Saia Piukala. Ka ‘oku totonu ke ‘eke ki he kau Polisi he ko kinautolu tenau ‘ilo kiai. Pea ‘oku ‘ikai ke ne ‘ilo pe ko Asiata fe ‘oku fai kiai ‘a e ‘uhinga.”
Kaekehe na’e toki tuku mai ‘e he kau Potungaue Polisi ‘enau ongoongo tukuatu ki hono puke ‘o ‘Asiata pea mo e ‘uhinga na’e puke ai pea mo e fakatokanga ki he kakai ‘o e Fonua ‘o tatau pe ‘a Tonga mo muli ki he ngaue hala’aki ‘a e mitia fakasosiale, he ‘oku lava lelei pe ‘o fakahoko atu ‘a e ngaue kiate kinautolu koe’uhi ko e memipa ‘a Tonga ‘i he Interpol ko e kautaha Polisi fakavaha’a pule’anga.
‘Oku ‘ikai ngata pe hono tukuaki’i ‘o Tu’ilakepa ki hono puke ‘o ‘Asiata, ka ‘oku toe kau ai mo e tukuaki’i ki he ngaahi mea kehekehe, koe’uhi pe ko e hia na’e ‘uluaki hopo’i kiai ‘a e Nopele ka na’e tukuange ia he Fakamaau’anga.
Ko e tokolahi taha ‘o e ngaahi peesi mo e kakai ‘o fakatupunga ‘a e kee mo e felauaki fakapolitikale, ko e kakai ‘oku nau nofo muli pea ‘oku nau tui he ikai a’u atu ‘a e lao, ka ko’eni kuo fakamahino ‘e he Potungaue Polisi ‘oku malava pe, ka ‘oku fehu’ia ‘a e ngaahi hia lahi pehe ni kimu’a fekau’aki mo e fale ‘o e Tu’i ka ‘oku ‘ikai pe ha ngaue ‘e fakahoko kiai pea ko e me’a ‘e hoko ko e fakautuutu ange hono fakahoko ‘o e hia koia.
