Mo’ua Pa’anga, ngaue houa ‘e 100 pea toe malu’i angalele he ta’u ‘e 3 ‘a Afimeimo’unga ki hono tuki Fakamaau ‘Akapulu
Kuo tu’utu’uni ‘a Fakamaau Lahi LCJ Bishop ke tautea malu’i angalelei ‘a Afimeimo’unga Hola, totongi ‘a e pa’anga ‘e $3000 ki he Fakamaau ‘e taha pea totongi ‘a e pa’anga ‘e $1500 ki he Fakamaau ‘e taha pea ke ne toe ngaue’i mo e houa ‘e 100 ki he komiuniti.
Ko e tautea ‘eni ki hono faka’ilo ia ki he’ene tuki’i ‘a e ongo Fakamaau laine lolotonga ‘a e fe’auhi na’e fakahoko he mala’e Teufaiva. Na’e fetaulaki ai ‘a e Liahona Old Boys na’e va’inga ai ‘a e Faka’iloa pea mo e timi ‘a Kolomotu’a. Na’e tataiku ‘a e va’inga na’e kei taki ‘a Liahona ka na’e toki fakalaka ‘a Kolomotu’a he mei ‘osi ‘a e taimi ‘onau ikuna. Na’e tukuaki’i ‘e Afi na’e kaakaa ‘a e Fakamaau pea ne tuku’i ai kinaua.
Na’e tali halaia ‘a Afi ki he ngaahi tukuaki’i pea ‘ohake mo hono ngaahi lekooti ki he fakalavea mo e lea kovi pea pehee ki he maumau’i ‘o e lao ki he ngaue ‘aki ‘o e mitia fakasosiale. Pea ‘oku ‘ikai sola ‘ene ngaue’aki ‘a e faito’o konatapu mo e ngaahi tukuaki’i na’ane fakahoko ki he PIlinisesi mo e kakai ma’oluga ‘o e fonua mo e pule’anga.
Ka na’e hoko ‘a e lipooti mei he ‘ofisa malu’i angalelei ke hao ai mei he ngaue popula. Na’e fakahaa he lipooti ko e ta’u ‘e 4 kuo’osi na’e liliu ‘a e mo’ui ‘a Afi ‘o hoko ko e tokotaha ngaue ‘aonga ki hono tau’i ‘o e faito’o konatapu pea feinga pa’anga ‘o taa ‘a e ngaahi falani mo e papa faka’ilonga ko’ene kemipeini ki he “’Ikai ki he Faito’o Konatapu”.
‘Oku kau hono tautea he ‘ikai te ne toe fakahoko ha hia he ta’u ‘e tolu ‘oku malu’i ai pea ka ne fakahoko ha hia ‘e hangatonu pe ‘o ngaue popula. Kuopau ke ne lipooti ki he kau Polisi he uike kotoa pea ke ne kau atu ki he ako ki hono mapule’i ‘o e ‘ita (anger management)
‘Oku kau hono taa ‘o e kau Fakamaau he to’onga lahi he sipoti ‘akapulu ‘i Tonga pea ‘oku ‘ikai hala ha ta’u ‘ene hoko. Ka ‘oku ‘ikai fakahoko he ngaahi komiti sipoti tautefito ki he ‘akapulu Liiki mo e ‘akapulu ‘iunioni ha ngaue ke ta’ofi ‘a e fa’ahinga to’onga ko’eni.
