Malo hao ‘a Trump hono fana’i lolotonga ‘ene kemipeini ki he fili Palesiteni.
Na’e malo pe ‘a e hao ‘a e Palesiteni maloloo ‘o e fonua hau ‘i mamani ‘a ‘Amelika lahi, ‘i hono fana’i ia lolotonga ‘ene kemipeini ki he teu fili Palesiteni ‘o ‘Amelika, ‘i he vahefonua Penisolovenia.
Ko e lolotonga ‘a e fakamalanga ‘a Trumb ki he fu’u kau poupou ‘o e vahefonua Penisolovenia mo e paa ‘a e fana ‘o lavea ai hono telinga.
Ka ko e malie he ‘osi ‘a e fana kae vakai ‘a e kakai ki he fo’i vitio pea neongo ‘a e fakaloloma hono feinga fakapoongi ia, ka na’e hanga mai pe ia ‘o hiki hono nima ki ‘olunga, ke fakamahino ki he’ene kau poupou ko e to’a ia pea ‘oku ‘ikai tuka atu ia ki hono feinga fakapoongi ia. Ka na’e huu mai ‘a e kau tangata le’o, ‘o le’ohi atu ia mei he funga siteisi ki he’ene me’alele.
Ko e talavou na’ane fakahoko ‘a e fana ko Thomas Matthew Crooks ta’u 20. Pea ko e tokolahi hono kaunga ako na’anaupehee, “ko e tokotaha na’e manako ke nofo tokotaha pe he taimi kotoa pea ‘iai pe mo e taimi na’e fa’a fakamamahi’i (bully) ia he fanau ako.” ‘I he a’u atu ‘a e kau Polisi ki he ‘api ‘ene ongomatu’a na’ana fu’u ‘ohovale ‘aupito, he ongoongo fakaloloma kuo ‘alu ‘i mamani.
Na’e fana’i ai pe he kau Polisi ‘a Thomas he fungafale na’e fakahoko mei ai ‘ene fana ‘o mate. Ko e taimi tatau na’e maloloo ‘a e tokotaha pea fakaakeake mo e tokotaha ‘i he fana na’e fakahoko.
Kaekehe ko e tuai ‘a e a’u ‘a e ongoongo ki he Palesiteni lolotonga Joe Biden, na’ane tuku atu ha fekau mamafa ke fakahoko ha fakatotolo he vave taha pea mo faka’auliliki ki hono teu fakapoongi ‘o e Palesiteni maloloo pea mo’ene fie kaungamamahi kia Trump ‘i he me’a fakamamahi kuo hoko.
Ka ‘i he taimi tatau kuo lele ‘a e kau ‘analaiso fakapolitikale kehekehe ia ‘o ‘Amelika ki he me’a na’e hoko. ‘Oku pehee he ni’ihi ko e feinga ‘eni ‘a e tafa’aki Temokalati ke fakapoongi ‘a Trump he ‘oku nau ongoongo’i, he ‘ikai te ne ta’eikuna ‘a e fili hoko ‘a ‘Amelika. Ka ‘oku tui ‘a e kau poupou ia ‘o Biden, ko e fo’i ‘eti faiva pe ‘eni ‘a Trump ke tukuhifo’aki ‘a e manakoa ‘o e Palesiteni lolotonga pea tukuaki’i ia ki he hia mamafa ni, kae ‘asi lelei mo faka’ofa ‘a Trump pea ‘i he founga koia, ‘e ma’u ai ‘ene kau fili tokolahi.
He kapau na’e palani ia ke fana’i ke mate, ‘oku ‘ikai ke faingata’a ia ke ‘omi ha taha (hitman) ke ne fakahoko ‘a e ngaue koia.
Ko e malie foki kuo mate ai pe ‘a e tama fana pea he ‘ikai ke toe ‘ilo ha me’a ia mei ai, pe na’e totongi ke ne fakahoko ‘a e fana. Ko e me’a kotoa leva, ‘e fakafalala ia ki he fakatotolo ‘a e kau Polisi.
Ko e talu pe mei hono fakapoongi ‘o Paleseteni Kennedy ‘i he ‘aho 22 Novema 1963 pea ko’ene toki hoko ‘eni ha me’a pehee ki ha Palesiteni ‘o ‘Amelika neongo kuone Palesiteni maloloo.
‘Oku ‘amanaki fakahoko ‘a e fili Palesiteni ‘a ‘Amelika ‘i he ‘aho 5 Novema ‘o e ta’u ni pea ‘oku veipaa kiai ‘a e Palesiteni lolotonga Joe Biden pea mo e Palesiteni maloloo Donald Trump. Ko e ongo tangata tatau pe na’ana veipa he fili na’e fakahoko ‘i he 2020 pea ikuna ai ‘a Biden, ka kuo toe foki mai ‘a e kelo ke fakafoki mai ‘a e lakanga Palesiteni ki he fa’ahi Republican.
‘Oku tuku e tokanga ‘a mamani ki he taimi kotoa ‘oku fili Palesiteni ai ‘a ‘Amelika, he ko e tokotaha te ne ma’u ko e tokotaha mafai lahitaha ia ‘i mamani, koe’uhi ko e tu’unga faka’ekonomika mo fakakautau ‘a ‘Amelika ko e leleitaha ia ‘i mamani.
