Mahu’inga ange sevesi, kapau ‘e a’u ke lele mole ‘a e Lulutai: Hon Piukala
‘Oku malie ‘a e tali kuo fakahoko ‘e he Minisita ki he Ngaahi Pisinisi ‘a e Pule’anga Hon. Piukala ki he kau faiongoongo ‘i he Falaite uike kuo’osi, ‘e ngali lele mole ‘a e Lulutai kae koloa ke lele lelei ‘a e sevesi fepuna’aki fakalotofonua.
Na’e makatu’unga ‘a e tali ‘a e Minisita mei he fehu’ia ‘a e fakaikiiki ki he vakapuna fo’ou kuo ‘omai he Lulutai. Na’e taumu’a ‘a e fehu’i ke ‘omai ‘a e totongi (rent) ‘o e vakapuna ‘a e kautaha Chatham mei Nu’usila pea koeha ‘a e loloa ‘a e haea mai ko’eni ‘o e vakapuna fo’ou.
‘I he fakama’ala’ala ‘a e Minisita, “‘oku haea mai ‘e he Lulutai ‘a e vakapuna SAAP ‘i he mahina ‘e tolu mo’enau kau pailate, ko e siofaki ki he ngaahi taimi mo’umo’ua ‘o e fepuna’aki fakalotofonua”.
‘Aia ko e mahina Sune mo Siulai ko e ongo mahina katoanga ‘o Tonga ‘i he ngaahi konifelenisi fakasiasi pea pehee ki he katoanga ‘i ‘o e ‘aho ‘o e Tama Tu’i he uike Heilala. Pea ‘oku kau ia he taimi femou’ekina taha ‘o e fepuna’aki, ko e folau mai ki he ngaahi konifelenisi ‘a e kau folau mei motu pea mo e ‘a’ahi atu ‘a e kau konifelenisi mei muli ke ‘a’ahi ki honau ngaahi famili mei motu hili ‘a e konifelenisi.
Ko e poini na’e nofo kiai ‘a e tokanga ‘a e ongoongo ni, ko e fakahaa koia ‘e he Minisita ‘a e fiema’u ke fakalelei’i ‘a e sevesi fepuna’aki, kapau ‘e a’u ki ha taimi ‘e lele mole ‘a e kautaha. He ‘oku haa mai ‘e laku ki tahi ‘a e tukuhau ‘a e kakai ta’ema’u mei ai ha me’a.
Na’ane fakahaa, “ko e vakapuna Y12 ‘e ngali ‘osi hono ngaohi ki he mahina ni pea te ne fakahoko ‘eia ‘a e fepuna’aki ki he ongo Niua. Ko e ongo Niua ‘oku a’u ia ki he mahina ‘e ua mo tolu ‘a e ‘ikai ha vakapuna, koe’uhi ko e ‘uhinga fakapisinisi mo e too nounou fakavakapuna.
Ka kuo tukupa ‘a e Minisita ke fakakakato ‘a e ngaahi vahefonua kotoa neongo ka hoko ko ha mole ki he Lulutai.
Na’e me’a ‘aki ‘e Hu’akavameiliku ‘i he fakataha mo e kau Faiongoongo, na’e ‘osi kau ‘i he ngaahi fokotu’u fakakaukau ‘e 3 na’e ‘oatu he Lulutai ki he Poate ke ‘omai pe fakatau mai ha vaka. Ka ko’eni kuo fou atu ‘a e pule’anga fo’ou ‘i he fokotu’u tatau pea fakahaa ‘e lele mole.
Kuo’osi fakahaa ‘e he kau taukei ki he fepuna’aki, he ‘ikai pe ma’u ha tupu ia mei he pisinisi fepuna’aki fakalotofonua koe’uhi ko e si’isi’i ‘a e maketi. Pea ko e ‘uhinga ia na’e tuku ai kitu’a ke fakalele fakataautaha, ke ‘oua na’a hoko ko e kavenga ki he pule’anga. Ka na’e kei hoko pe ia ko e kavenga, ‘i he kei kole pa’anga ki he pule’anga pea kei launga ‘a e kakai he mamafa ‘a e tikite vakapuna, he na’e a’u ki he tu’unga na’e mamafa ange ‘a e folau ki Vava’u he folau ki Nu’usila.
Kaekehe koeha leva ‘a e tu’utu’uni fakapotopoto taha ki he pule’anga fekau’aki mo e Lulutai ‘i he’ene lele atu ko’eni. Ko e lele mole pe ko hono tukuange kitu’a.
