Lulu’i ‘e he sita Vaotaa Koula (Kolomalu) ‘a e Helo mei he Funga Taua (Latavao) ‘i he mala’e Teufaiva
‘I he sipoti fakaako ‘o e ta’u kuo’osi na’e ‘ikai ke ekea ha taha ‘a e hingoa ‘o e fetu’u hopo mei he Funga Taua Latu Latavao, ‘ene fakaaoao ‘i he ngaahi fe’auhi ‘e fitu na’ane kau kiai. Na’e fakahingoa ai ia ‘e he kau manako Sipoti, ko e tu’ukimu’a taha ia ‘o e mala’e sipoti fakaako talu ‘ene tu’u, ko’ene ma’u ‘a e koula ‘e 7.
Ka ‘i he ta’u ni ko hono ta’u faka’osi, na’e ‘amanaki ‘a e tokotaha kotoa te ne toe fakaaoao pe, ka na’e toki tokoto hifo ‘a e matapule mei he Vaota Koula ‘o fakangata ‘a e fakaaoao ‘a e to’a Liahona ‘i he 200m ‘i he ‘aho ni. Na’e hangee ka movete ‘a Teufaiva ‘i he ikuna kafakafa ‘a Kolomalu, he ko e toki tokotaha ‘eni ke tukulolo kiai ‘a e naite mei Liahona ke ne fika ua.
Na’e ‘ikai koia pe, ka na’e toe hanga hifo ‘a e fanau mei he Vaota Koula ‘i he lele fainolo ‘o e lele fuka takaitaha ‘a e fanau tangata lalahi, ‘o toe fakamahino ki Liahona, ko e mala’e sipoti ‘oku ‘ikai ko ha ‘api tukuhau ‘o ha taha, ‘i he’enau fakamamahi’i ‘a e timi lele fuka ‘a Liahona mo e toenga ‘o e ngaahi ‘api ako kehe.
Ko e talavou mei Toloa na’e folau mai ‘i he timi sipoti fakaako ‘a Vava’u ‘i he ta’u kuo’osi. Na’e fakatokanga’i he kau faiako sipoti ‘a Toloa ‘a e taleniti ‘o e tokotaha ni, ke ne hanga ‘o fakangata ‘a e fu’u fakaaoao ‘a Latavao pea na’e tonu pe ia. Na’e toki tokoto hifo ‘a e kau faiako sipoti ‘o haiane’i ‘a e tafa’aki kotoa, ‘o hangee ko e fakamalohisino, ko e fe’auhi ke kau kiai mo e ngaahi me’a pehe.
Ko Latavao na’e lele ia he fe’auhi ‘e fitu, ka na’e fakapapau’i ‘e Toloa ‘e lele nounou pe ‘enau helo ke fakapapau’i ‘enau taumu’a ke ‘oua na’a toe tata ‘e Latavao ‘a e koula ‘e fitu. Pea kuo tukuaki’i ai he tokolahi ‘a e kau faiako Sipoti ‘a Liahona ‘a e fu’u lahi ‘a e fe’auhi ‘enau fetu’u ‘atelita. Na’ane lele he mita ‘e 800m toe lele he 400 m pea toki tokoto hifo ‘a Kolomalu ‘o fakamamahi’i ‘i he 200m.
Ko e taimi tatau ‘oku kei longoa’a atu ‘a e Facebook ‘i he tukuaki’i ko e lele na’e ma’u ‘e Kolomalu na’e ta’efakalao he na’e ‘uluaki lele ia ‘oku te’eki paa ‘a e fana. Ka ko hono fakakatoa ‘oku ‘ikai ha liliu mei he kau ‘ofisiale pea ‘oku kei tu’u pe ‘a e ola koia. Na’e hoko ‘a e ola lelei ‘enau lele fuka ke hangee ‘oku mahino ai pe na’e tonu pe ‘a e lele 200m.
Kaekehe ko e fainolo ‘apongipongi tena veipaa ai ‘i he 100m pea mo e lele fuka 100 x 100 m. Pea ‘oku nasi ‘a e tokotaha kotoa ki he fainolo ‘o e 100m pea kohai te ne ikua pea mahino ko e tu’ukimu’a mo’oni ia. Na’e ‘iai ‘a e tala’a ‘i he 200m pea ko e lele fuka ‘oku toe kau kiai mo e kau fe’auhi kehe, ka ko e 100m fainolo he ‘ikai ha toe tuli tonuhia. Pea ‘oku ‘iai ‘a e tui ‘oku mateuteu kiai ‘a e ongo tangata tu’ukimu’a he mala’e sipoti ‘o e ta’u ni.
Ko e makehe ‘anga ‘o Latavao ‘oku lele he takai lalahi pea toe lele he takai iiki he ‘oku ve’evave. Pea ko e lekooti kuone fokotu’u he ta’u kuo’osi ko e koula ‘e 7 he lele ‘ata’ataa pe, ‘oku ‘ikai ‘ilo pe ‘e toe maumau’i ha taha ‘i he ngaahi ta’u lahi.
Ka ko e talanoa kotoa ia kimui, ko e mala’e Teufaiva ‘a pongipongi ‘e vete ai ‘a e me’a lahi fekau’aki mo e ongo tangata ni. ‘Oku malie ‘a e ta’u ni, he ‘oku ‘ikai fakaaoao ha Kolisi ‘o hange ko e fakaaoao ‘a Liahona he ta’u kuo’osi. ‘Oku kei ‘iai pe faingamalie ‘o Liahona kenau ikana ‘a e Sipoti he ‘oku sai ‘enau tamaiki fefine. Ka ko e tamaiki tangata ‘oku ngali ‘ave ia he Vaota Koula ki Toloa.
