Li’aki fatongia ki he fonua (timi toko 7) foki ‘ikai ‘ilo kiai faiako mo e pule
Ko e taha ‘o e ongoongo fakaloloma kuo a’u mai ki he ongoongo ni, ko hono li’aki he taha ‘o e kau memipa ‘o e timi toko 7 ‘a Tonga, Lolesio Sailosi ‘a e timi kae mavahe ia ‘ikai ha ‘ilo kiai ‘a e Faiako mo e Pule timi.
‘Oku toe fakaloloma foki he ‘oku kau ‘a e tokotaha ni he kau tangata tu’ukimu’a ‘a e timi mo taukei. Ka ‘oku hoko ‘ene mavahe koe ongo lahi ki he faiako mo e fanau va’inga. ‘Oku teuteu ‘a e timi kenau hoko atu ki he kualafai ki he timi ‘e 4 ‘e hoko atu ki he fe’auhi ‘i ‘Amelika.
Fakatatau pea mo e fakamatala ‘oku ma’u he ongoongo ni, ‘oku fakamamahi ko e mavahe ‘a e tokotaha ni ‘ikai ke ‘ilo kiai ‘a e Faiako mo e pule pea ‘oku kau ia he ‘ulungaanga ma’ulalo ke ‘asi mei ha tokotaha va’inga, kuo a’u ki he tu’unga ko e fakafofonga’i ‘a e fonua he ngaahi timi fakafonua.
‘Oku ‘iai mo e fakamatala, ko e foki ‘a e tokotaha ni ia ko e fiema’u mei he ‘apiako na’e ‘iai ke tokoni ki he timi sipoti ‘a e ‘apiako, ko e teuaki ki he fe’auhi sipoti fakaako ‘o e ta’u ni.
‘Oku lotomamahi lahi ‘a e tokolahi ‘o e kau va’inga tutuku fakafonua he fa’ahinga ‘ulungaanga ko’eni pea pehee ki he kalapu ‘a e tokotaha ni, he fa’ahinga fale’i ‘oku nau fakahoko ki he fanau va’inga.
Ko e taimi tatau ‘oku pehee he tokolahi, ‘oku hoko ‘eni ke mole ai ‘a e faingamalie ‘o e kalapu, mei hano toe ui ha fanau va’inga ki he ngaahi timi fakafonua. ‘Oku ‘ikai ke ‘ilo pe ‘e ‘iai ha tautea ‘e fakahoko ‘e he komiti ki he kalapu, ka ko’ene totonu ia, ke hoko ko ha ako ki he ngaahi kalapu ‘e toe fai pehee ‘enau kau va’inga he kaha’u.
Ko e palopalema tatau ‘oku hoko he ngaahi timi fakafonua kehe pea ‘oku fiema’u leva ha tokanga mavahe ki he tafa’aki faka’ulungaanga ‘o e kau va’inga. Ke ‘oua na’a ngata pe hono tautea ‘o e tokotaha va’inga kae tautea mo e kalapu ‘oku kau kiai. Pea kapau ‘oku ‘uhinga ‘ene mavahe ko e fakaloto’i he kalapu pea ‘oku totonu ke toe mamafa ange ‘a e tautea.
Na’e fai fetu’utaki ki he komiti ‘akapaulu ‘i he’enau peesi messenger, ka na’e ‘ikai faingamalie ke ‘omai ha tali.
