Lea Siosifa Talakai ki hono vaa mo e faiako Mate Ma’a Tonga Christian Wolf
Kuo lea ‘a e star he mala’e Liiki Siosifa Talakai mei he timi ‘a e Cronulla Shark pea pehee ki he NSW Blue, ‘a e ‘ikai ke sai hono vaa mo e faiako ‘a e Mate Ma’a Tonga Christian Wolf pea mo’ene loto mamahi he ‘ikai ke fili ki he timi ‘o e fe’auhi Pacific Championship.
Ko e fakahaa ‘eni ‘e Siosifa hono faka’eke’eke ia, hili ‘a e fili ‘a e timi ‘a e ‘ohovale ‘a e tokolahi hono ‘ikai ke fili ia, he ko e tokotaha va’inga lelei pea ‘ikai fehu’ia he mala’e ‘o e ‘akapulu Liiki. Ka na’e ‘ohovale ‘a e kau manako va’inga Liiki ‘o tatau pe kau Tonga mo e kau muli hono ‘ikai fili ‘a e sitaa ta’etoe ‘eke’i ko’eni.
Na’e ‘iai foki ‘a e fakakaukau ia ‘a e tokolahi ‘oku ‘ikai ke ‘ataa pe ‘oku mo’ua ha fa’ahinga ‘uhinga hangee ko e lavea, ka na’e toki fakahaa mahino ‘e he to’a Tonga ko’eni ‘a e tu’unga na’e ‘ikai ke ne kau ai, he na’e ‘ikai ke fili ia pea na’e ‘iai pe ‘ene vaa mo e faiako.
‘I he 2022 na’e fili ai ki he timi Mate Ma’a Tonga, ka na’e lahi ange ‘a e taimi na’e ‘ikai ke fakava’inga’i ai he faiako. Na’e a’u pe ia ki he tu’unga na’e ‘osi ‘amanaki ‘a e tokotaha ni ke ne kau he timi ‘o e fe’auhi ‘oku lolotonga lele, he’ene fakahaa he teu fepaki ‘a e Shark mo e Cowboy ‘ene palani ke fakafepaki’i lahi ‘a Taumalolo kimu’a pea na toki kau fakataha he timi ‘a Tonga ki he Pacific Championship.
Ka na’ane fakahaa ‘ene loto mamahi he taimi na’e ‘ikai fa’a fakahuu ai ia he faiako ke ne va’inga, fakataha pea mo e ‘ikai ke kau hono fili ko’eni, ka e piki he faiako ia ‘a Mosese Suli pea neongo ‘oku fakamamahi, ka ko e me’a kuo hoko kuo paasi atu ia. Pea ‘ikai pe kena talanoa mata ki he mata, ka ko e fetu’utaki telefoni pe.
Na’e vekeveke ‘a Siosifa ‘i he 2022 ke kau ki he timi Mate Ma’a Tonga, ko’ene houngaa’ia hene ongo matu’a he feilaulau lahi kuona fakahoko ma’ana pea ko’ene va’inga ma’a Tonga ko e me’a ia tena fiefia lahi ai. ‘I he laumalie tatau na’ane fakakaukau ‘e hokohoko atu ‘ene fakafofonga’i ‘a Tonga, kae pango kuo hokohoko atu hono vaa mo e faiako ke ‘ikai hoko ai ‘ene faka’amu.
Kuo ‘iai pe kau va’inga tokolahi na’anau lotomamahi he faiako ‘i he taimi ‘oku fili ai ‘a e timi, ‘aia na’e ‘asi lahi ‘eni ia he Ipu ‘a Mamani na’e toki ‘osi pea iku ke oo ai ‘a e ni’ihi ‘o fai pe ‘enau fili, ki he ngaahi me’a ‘oku ‘ikai ngofua ki he kau va’inga.
Pea ko e palopalema tatau pe ‘oku kei ‘asi mai mei he faiako mo e fanau va’inga. ‘Oku tukuaki’i he tokolahi ‘oku fakapone pea filifili manako ‘ene founga. Ko e va’inga mo ‘Aositelelia na’e ‘ohovale ‘a e tokolahi hono fakahuu ‘a e foha ‘o Sione Hopoate, ‘a Lihai Hopoate he ‘oku ne kei si’i ke fehangahangai mo e fu’u timi hau ‘a mamani, neongo ‘oku hoko ‘a e leka ko’eni ko e feitu’u hopo he taimi ni ‘oku kei ta’u 20. Na’e sai pe ‘ene va’inga ka na’e hoko ‘ene fanga ki’i fehalaaki mo e mata vaivai ke a’u ai ‘a ‘Aositelelia ki he laine tata’o. Ka na’e tui ‘a e tokolahi, ko e vaofi ‘a faiako mo Sione Hopoate na’e fakahuu ai ‘a e fetu’u hopo ko’eni.
Ko e tama va’inga tu’u kimu’a ‘e taha ko e sita ‘a e timi Manly ko Toluta’u Koula, na’e ‘ikai ke fili ia ‘i he tau mo Ha’amoa ‘i he world cup kae fili ‘a e foha ia ‘o Sione Hopoate ko William. Ko William na’e kei lavea ‘a hono va’e pea ta’evainga ‘i he uike ‘e 6, ka na’e fili pe ia ki he va’inga mo Ha’amoa ‘i he kuata fainolo, kae ‘ikai fili ‘a Toluta’u. Na’e foomu lelei ‘ene vainga ‘i he ‘uu va’inga kimu’a ‘a Tonga. Na’e iku ke toe lavea ‘a e va’e tatau ‘o William he ‘osi ‘a e miniti ‘e 20 ‘o e va’inga, pea iku ke talifaki toko 3 pe ‘a e Mate Ma’a Tonga ‘i he toenga ‘a e va’inga mo Ha’amoa ‘onau ulungia ai.
Na’e to e talifaki pe ‘a Toluta’u ‘i he tau ‘a Tonga mo ‘Aositelelia, ka na’e pehee he toko lahi na’e mei tuli pe ‘e Toluta’u ‘a e senita ‘a ‘Aoisitelelia o ma’u, koe‘uhi ko‘ene ve’e vave he na’e fiu ‘a Lehi he feinga ke ne ma’u e senita ‘a ‘Aositelelia ‘i he‘ene fo’i fa’oa paasi ‘o tata’o.
‘Oku ‘amanaki ke ‘osi ‘a e faiako mei he Mate Ma’a Tonga ‘i he hili ‘a e fe’auhi ‘o e Pacific Championship pea ‘e huu mai ‘a e faiako fo’ou pea mo ha founga fo’ou. He ko e palopalema lolotonga ‘oku ‘iai pe ‘ene kautama pau, kae tukunoa’i ‘a e fanau Tonga ‘oku ‘ikai toe ‘eke’i he mala’e Liiki.
‘E nofo tafaataha ‘a Wolf ki he timi ‘a e Dolphin he kuo mavahe ‘a e faiako lolotonga ki he timi fo’ou ki he NRL pea ‘e fua mei ai ‘ene taukei faiako he ola ‘ene tataki ‘a e timi ‘o e Dolphin. Ko e ngaahi timi NRL, ko e hokohoko pe fo’i ko e fakalau mai ai ‘a e ‘akahi kitu’a.
