Launga kakai mamafa totongi sio ‘akapulu fakaako, hili e launga he mamafa totongi huu he sipoti fakaako
Ko e lolotonga ‘a e te’eki ke ngalo atu ‘a e launga ‘a e kakai ‘i he mamafa ‘a e totongi ‘o e huu he sipoti fakaako, ‘aia na’e a’u ki he pa’anga ‘e $30 ‘a e tafa’aki grandstand ki he tepi pea $20 toenga grandstand pea $10 toenga mala’e, kuo toe ongona mai ‘a e hanu ‘a e matu’a tauhi fanau ‘akapulu he mamafa ‘a e huu he mala’e ‘Atele ‘o sio va’inga.
Ko e huu ‘oku pa’anga ‘e $10 ki he tokotaha ‘o mamafa ange ia ‘i he huu ‘a e ‘akapulu fakakalapu ‘oku pa’anga $5. Ko e loto mamahi ‘a e kakai ‘o e fonua pe koeha ‘oku fu’u fakavalevale pehee ai ‘a e faitu’utu’uni ‘a e ngaahi komiti sipoti ‘a e ngaahi ako, he ‘oku feinga mai ‘a e matu’a ke poupou ki he’enau fanau, kae hanga atu ‘a e ngaahi komiti sipoti ‘o tanaki pa’anga fakavalevale ‘i he matu’a.
‘I he fakatalanoa ‘a e ongoongo ni ki he ngaahi matu’a he mala’e ‘Atele, ‘oku nau pehee ‘oku fu’u fakavalevale he ko e va’inga ‘a e fanau ako ‘ikai ko ha va’inga fakakalapu. Pea ko e matu’a tatau pe ‘oku nau fafanga ‘a e fanau ‘akapulu he uike kotoa hili ‘a e fakamalohisino, ‘oku nau toe huu totongi he Falaite kotoa.
Kuo ‘iai ‘a e matu’a kuonau fokotu’u ke tuku atu ki he Minisita Ako ‘enau launga ki he tu’unga ko’eni ‘a e faitu’utu’uni ‘a e ngaahi komiti Sipoti ‘a e ngaahi ako. Ko e Sipoti fakakolisi ‘oku siponisa ‘e he Tonga Health Promotion ‘o ‘ofi he $9 mano he ta’u kotoa. Ko e pa’anga koia ‘oku nau fua ‘a e fakamole kotoa ‘a e sipoti fakaako, kau ai ‘a e totongi ‘o e mala’e Teufaiva, ko e me’atokoni ki he kau ‘ofisiale pehee ki he teuteu ‘o e me’a’anga, ko e kau Kolosi Kula ki ha fakatamaki ‘e hoko, kau le’o ki he mala’e sipoti ke tokanga’i ‘a e maau. Ko e me’a pe ‘a e Komiti ko e tanaki pa’anga pea ‘oku totonu leva ke ‘omai ha fakamatala pa’anga ‘a e Komiti ke ‘ilo kiai ‘a e kakai ‘o e fonua pea moeha ‘a e me’a ‘oku fakamole kiai, he ‘oku fua he Tonga Health ‘a e me’a kotoa. Pea ko e fonu ‘a Teufaiva he uike kakato ‘e taha koe fu’u pa’anga lahi.
Kaekehe ‘oku mahu’inga ki he ngaahi komiti sipoti fakaako ke fakapotopoto ‘enau faitu’utu’uni, kae ‘oua ‘e pa’usi’i ‘a e poupou ‘a e matu’a tauhi fanau kenau tanaki pa’anga ‘aki. ‘Oku ‘iai ‘a e tui ko e ngaahi mala’e kotoa ‘oku fakahoko ai ‘a e ‘akapulu ‘oku totongi tatau kotoa pe.
