Ko e ngaahi me’a malie he Kapineti fo’ou, ko e mahino ‘oku ‘ikai pe ha taha pea mei he Pule’anga motu’a pea ko e ‘ata ia ki he kakai ‘o e fonua, ‘oku ‘ikai pe ha ngaue fakataha. Na’e ‘iai ‘amanaki ‘e huu mai pule’anga ko’eni ‘o fai ha me’a kehe, ka kuo fakapapau’i mei he kapineti motu’a na’e ‘ikai ha fakaafe ange, ‘o hangee ko e ngaahi fakamatala he mitia fakasosiale.

‘Oku toe malie foki mo e huu tokotaha mai ‘a e Pilinisi Kalauni ko e nopele mei tu’a, ‘o Minisita ki Muli mo Taumalu’i Fonua. Pea ‘ikai ha taha ‘i he toenga ‘o e kau nopele memipa Fale Alea ‘e ma’u potungaue. Na’e ‘iai pe sasala ko e finangalo ‘o e Tama ke tuku fakalele fonua ki he toko 17 ‘a e kakai. Ka ki he huu mai ko’eni ‘a e Pilinisi Kalauni ‘okune ‘omai ‘a e fekau kehe. Koeha nai ‘a e vakai ‘a e kau Nopele, tenau lava ‘o fakahaa tau’ataina ‘enau fakakaukau, ko e ngaahi fehu’i mahu’inga ia ke fakahoko.

Kaekehe ko e faka’osi, ko hono tali he Tama Tu’i ke huu ‘a Piveni Piukala ki he Kapineti neongo ‘a e ngaahi fakaanga mo e lau kuone fakahoko ki he fale ‘o e Tu’i. Pea kehe mei ai ko e ongo potungaue ‘oku ne ma’u ‘a e Polisi mo e Ngaahi Pisinisi Pule’anga, ko e ongo potungaue ia na’ane fakaanga’i lahi ‘i he drugs pea mo e Lulutai Airline mo e ‘Uhila. Ka ko’eni kuone heka ki he Sea pea ‘oku ‘ikai ha toe ‘uhinga ke tuli tonuhia, ta’etene hanga ‘o fakalelei’i ‘a e sevesi kotoa ko’eni. Ko e taimi lahi ‘oku faingofua ‘a e fakaanga ka ko’ete toki ala ki he fohe ‘o e vaka pea te toki ‘ilo ko e ‘eikivaka mo’oni pe ‘oku lele he tahi hou.