KEI FAI PE KAUNOA PALEMIA HE MAFAI TU’I
Na’e faka’ohovale ki he Tonga Independent hono li’aki e fakafofonga ‘ofisiale ‘o Tonga ki he Kominiueli he fakataha i Ha’amoa, ko e Talafekau Lahi ki Pilitania, kae ‘ave ‘e he Palemia ‘ene timi mo kulupu makehe mei Tonga pe.
Ko e Talafekau Lahi o Tonga ki Pilitania, ‘Eiki Fanetupouvava’u Tuita ko e Fakafofonga ia ‘o Tonga ki he Kominiueli, pea ‘oku lolotonga Sea ‘i he Poate ‘a e kau Kovana ‘o e Commonwealth Secretariat. Ko e fu’u lakanga mātu’aki mahu’inga fau eni fakamāmani lahi ki Tonga mo e toenga e ngaahi fonua Kominiueli .
Fakatatau ki he fakamatala ‘oku ma’u ‘e he Tonga Independent, na’e me’a mai ‘a e Talafekau ke kau he fakafofonga’i o Tonga ki he fakataha i Ha’amoá kuo ‘osi kuo ‘osi kakato atu e timi folau ia ‘a e pule’angá ‘oku ‘ikai kau hono hingoá ‘o’ona hono fakahū mei he pule’anga Tonga.
Na’e foki ai pē e Talafekaú ki Lonitoni, kae hoko atu e Palēmiá ia Siaosi Sovaleni, mo ‘ene timi mei he pule’angá ‘oku ‘ova he toko 20-tupu, ki ‘Apia, Ha’amoa.
Kau he kau folau ke Fakafofonga’i o Tonga ki he Kominiueli ko e CEO ‘o e Pangikē Fakalakalaka ‘Emeline Tuita, ‘a ia ‘oku lolotonga fihia he ngaahi fakatonutonu fakalao fakafo’ituitui fakahia mo fakapule’anga hono vaa mo e Pangikē Pulé. ‘Oku ‘i ai mo e fu’u kau ngāue fakapule’anga tokolahi, ‘oku mahino ko e fu’u fakamole lahi ia ki he fonuá.
FAKANOFO ‘E HE TU’I E KAU TALAFEKAU
Ko e taha foki eni e ngaahi tefito’i mafai ‘o ‘Ene ‘Afió, ko ‘ene fili mo fakanofo ‘a e kau Talafekau mo e kau Fakafofonga fakafonua ‘o Tonga ki he ngaahi fonua mo e sino fakavaha’apule’angá.
‘Oku mahino mei ai ‘oku ‘oange ki he Tu’i ‘e he Konisitutone ‘a e faka’ata’atā lahi ke ne leva’i mo ‘eikivaka’i e vā fakatu’apule’anga mo fakakautau ‘a e fonuá, kae tau’atāina e pule’angá ki hono fakalele e fonuá.
‘I he ongo pule’anga ne toki hilí, ‘Akilisi Pohiva mo Pohiva Tu’i’onetoa, na’e mahino ‘enau toka’i e mafai ko eni ‘o ‘ene ‘Afio pea ‘ikai ke na kaunoa ai.
Ka ‘oku ongo ngata’a ‘aupito e Palēmia ko ení he kuo ‘osi fakahā mei he Tama Tu’i ke tukuange fakafoki ange ‘a e Foreign Affairs, ka ‘oku nofo pē e Palemiá ‘o velia atu ke ala ki ai.
PA’ANGA MO E NGAAHI INUMELIE HE SALUNI
‘Oku mahino ko e taha e ‘uhinga ‘oku velia ai e Palemiá ki he potungaue ki mulí mo e ngaahi me’a fakavaha’apule’angá ‘oku makatu’unga he fu’u pa’anga lahi ‘oku ma’u mei he ngaahi tokoní.
Ko e pa’anga eni ki he’enau ngaahi polokalama fakapule’angá kae pehē ki he ngaahi monu’ia fakafo’ituituí, ‘o kau e ngaahi me’a’ofa fakafo’ituitui kae pehē ki he vahe travel allowance ‘a e pule’angá. ‘Oku toho ‘e he Minisitā takitaha e lau mano he’ene folau uike taha, fakafuofua ange e ngaahi folau lau māhiná.
Ko e ngaahi folau fakavaha’apule’angá foki ‘oku ‘ikai ke ma’ama’a pea fu’u faka’ei’eiki he First Class mo e Business Class ‘a e ngaahi vakapuna mo e hotelé. ‘Oku mahino ai heni e ‘ikai anga ki he me’a peheé, ‘ikai mā hono fakamoleki e pa’anga ‘a e kakai kehé, mo e ‘ikai fakatōkilalo ke ‘oua e ‘ilo ‘etau masivá.
NGAAHI PALANI FAKAFUFŪ I MULI
‘Oku siofi foki ‘e he Tonga Independent ‘a e ngaahi tila ki muli ‘a e pule’angá, pea ‘oku mahino ‘oku māmio holo e Palēmiá mo ‘ene Minisitā ki Muli mālōloó Fekita ‘Utoikamanu, ‘oku ‘i ai e ngaahi fokotu’utu’u fakapulipuli ‘oku ngali taumu’a fakafo’ituitui pea ‘ikai ola lelei ki he fonuá.
Kau heni e fakaafe fakapulipuli tokua ki Lusia kia Putin ke ha’u ki he Forum i Nukualofa, pea mo e oo toutou alea mo e ngaahi fonua ‘oku ‘iloa he fe’ave’aki mo fō e pa’anga ‘ulí. ‘Oku kau eni he ngaahi fokotu’utu’u fakatu’utāmaki ki he fonuá.
Kuo ‘osi fakahā ‘e he’ene ‘Afió ke fakafoki anhe e Potungāue ki Mulí mo e Tau Malu’í kiate ia, hili pē koiá pea hoko atu pē e Palēmiá ‘o fokotu’u ia ki he lakanga Minisitā Le’ole’o he ongo potungāué ni. Te’eki ha tu’utu’uni pehē ‘Ene ‘Afió fekau’aki mo e Kapinetí.
‘Oku hā mahino heni e ta’efieauna mo e siolalo ‘a e Palemia ki he Tu’i, hangē ko e ‘ikai fakakau ‘Ene ‘Afio he Forum pea iku mavahe ai e hā’ele ki tu’apule’anga.
Kuo kalo foki e Palemiá o kamata talanoa fakapulipuli ki he ku mēmipa Paati PTOA i Fale Alea ke malu’i hono fika, he mahino ‘oku ngaue e Hou’eki koe’uhī ko ‘ene ngaahi talangata’a mo e fie’eiki ki he mafai e Tu’i.
