‘Ikai tali tangi ‘a e PSC ko e too nounou ‘enau ngaue mo e CEO Takimamata ki hono fakamaloloo’i ‘o Magdalena Fifita
Kuo hoko ‘a e too nounou ‘a e ngaue ‘a e CEO ‘o e Takimamata mo e PSC ke ‘ikai tali ai ‘e he Fakamaau’anga Tangi ‘a e tangi ‘a e PSC, ki he tu’utu’uni na’e fakahoko ‘e he Fakamaau’anga Lahi fekau’aki mo Magdalena Fifita ko e Talekita ma’olunga ‘i he Potungaue Takimamata.
Na’e tuku kitu’a ‘a Mrs Fifita ‘i Sanuali 2024 ko e ngaahi tukuaki’i ki he ngaue hala ki hono foaki ‘o e ngaue ki he kautaha ko e Matapa Services ‘a hono ‘ofefine pea ngaue ai mo hono mali. Ko’enau ngaue ko e fakahoko ‘o e ngaahi ako pea mo e keita ki he kau fakataha ‘oku fakahoko. Pea na’e fe’unga mo e $55,300.00 na’e foaki ki he Matapa Services.
Ka ‘i he’ene a’u ki he Fakamaau’anga Lahi na’e tu’utu’uni ‘a J Cooper he faka’osinga ‘o e 2023, na’e too nounou pea ta’efakalao ‘a e ngaue na’e fakahoko ‘e he CEO ‘o e Takimamata pea mo e PSC. Na’e tangi ‘a e PSC ‘o fakahoko ‘a e hopo he ‘aho 7 Mee 2025 pea faitu’utu’uni he ‘aho 15 Mee 2025 ke li kitu’a ‘a e tangi ‘a e PSC. Pea ke fua kotoa ‘e he PSC ‘a e fakamole ki he hopo.
Ko e taukave ‘a Mrs Fifita mo’ene fakafofonga lao Mrs Stevenson:
1)Na’e ‘ikai ‘oange he CEO mo e PSC hano faingamalie ke ‘ilo ki he ngaahi tukuaki’i mo fakahoko ha’ane tali.
2)Na’e ‘ikai kakato ‘a e lipooti ‘a Takau pea filifilimanako hono ‘ikai faka’asi ‘a e konga ki he lipooti ‘a Mr Moala Mafi ko e CEO maloloo ‘o e Takimamata, na’ane fakangofua ‘a e Matapu Services kenau ma’u ‘a e ngaue.
3)Na’e ta’efakalao ‘ene lipooti ko’ene fakahoko ‘a e Fokotu’u ki he Komisoni ka na’e ‘ikai totonu ke pehee ‘o fakatatau mo e Reg (5) (2) (1).
4)Pea koe faka’osi na’e fu’u filifilimanako pea tu’utu’uni ta’etotonu ‘a e ngaue na’e fakahoko kiai.
‘I he lau ‘a e kau Fakamaau Tangi na’e fu’u kovi pea filifili manako ‘aupito ‘a e ngaue na’e fakahoko ‘e he CEO, ‘o kamata mei he ‘ikai ‘oange ha faingamalie ‘o Mrs Fifita ke ‘ilo ki he launga pea fai ha’ane tali ke mole ai ‘ene totonu fakanatula. Pea kau kiai mo’ene ngaahi lipooti na’e ‘ikai ke maau mo tonu ‘o fakatatau mo e lao.
Na’e tu’utu’uni ai pe ‘a e Fakamaau Tangi ke ‘oua ‘e tali ‘a e tangi ‘a e PSC pea kenau fua ‘a e fakamole tukukehe ange ‘a e totongi huhu’i kia Mrs Fifita he taimi na’e tuli ai mo ha ngaahi maumau kehe na’e tu’utu’uni he Fakamaau’anga Lahi.
Kaekehe ko e anga ‘o e vakai ki he kaveinga ni hono foaki pe ‘o e faingamalie ki hono famili ‘oku ‘iai ‘a e tu’utu’uni ‘a e lao kiai, ke ‘oua na’a pa’usi’i he kau ma’umafai pe fakafamili’i ‘a e tukuhau ‘a e kakai. Ko e tefito ia ‘o e fakatonutonu ka kuo hao koe’uhi ko e too nounou fakangaue ‘a e CEO mo e PSC. Na’e tui e Mamahi na’e fakalao pe hono foaki ki hono ‘ofefine ‘i hono faka’ataa he CEO maloloo, ka ‘oku toki tali pe ha me’a peheni kapau ko e tokotaha pe ‘oku ne lava ‘o fakahoko ‘a e ngaue ni.
