‘Ikai mo’oni ngaahi tohi fakafisi Poate ‘Uhila mo e tohi mei he Komisoni ‘Uhila ki he Poate.
Ko e hili ‘a e fetohi’aki ‘i he vaha’a ‘o e Fakataha Tokoni ‘Ene ‘Afio pea mo e Palemia mo hono pule’anga ki he ta’efiemalie ki he ongo lakanga Minisita ‘e tokoua, kuo hoko ia ke fa’u ai ‘e ha ni’ihi ha ngaahi tohi loi ‘o tufaki he social media ‘o pehee ko e ngaahi tohi mo’oni. Pea ‘oku hangee ia ko e mo’oni ‘i he kei malohi ‘a e talanga he tohi ‘a e Fakataha Tokoni mo e Pule’anga.
Ka kuo faka’ikai’i mei he Komisoni ‘Uhila ‘a e tohi na’e ‘ave takai holo ‘i he ope ‘o pehee ko e tohi mei he EC mo e kau ma’u ‘Uhila ki he Poate ‘Uhila ko e ta’efiemalie ki he fua fatongia ‘a e kautaha ‘i he matemate ‘a e ‘uhila. Ka na’e taimi si’i kuo ‘ikai ke toe ‘asi ‘a e tohi ‘i he taimi na’e fai ai hono kumi ke fai hano fakapapau’i hono tu’unga mo’oni.
Ko e tohi hono ua ko e tohi ‘o pehee ko e tohi fakafisi ‘a e Poate kuo fakahuu atu ki he Palemia, ko’enau fakafisi koe’uhi ko e lahi ‘a e longoa’a he matemate ‘a e ‘uhila. Ka na’e fakapapau’i mei he Sea ‘o e Poate ‘oku kei hokohoko atu ‘enau ngaue ki he lelei ma’ae kakai ‘o e Fonua. Pea ko hono fakapapau’i ia ‘oku ‘ikai mo’oni ‘a e tohi koia.
Ka ‘oku hanga ‘e he kau politiki likoliko ‘o ngaue’aki founga ko’eni ke fakahoko ‘aki ‘enau politiki pea ko e malie ‘e taha ko honau kau muimui ‘oku nau poupou kotoa mo tui kiai ko e mo’oni he ko e me’a ia ‘oku nau loto kiai, tukukehe ange ‘a e kakai ‘oku maama faka’atamai ‘oku nau ‘ilo ‘a e loi.
‘I he taimi tatau foki ‘oku mahino ‘a e loto mamahi a e kakai ‘o e Fonua ‘i he matemate ‘a e ‘uhila ka kuo ‘osi tuku mai he kautaha, ‘oku makatu’unga ia ‘i he ngaue mahu’inga ‘oku lolotonga fakahoko, ki hono fakahoko (transition) ‘otometiki ‘a e ivi mei he la’aa ki he misini tisolo, ‘o ‘ikai ke toe manual. ‘Oku fakatata’aki ‘a e taimi ‘oku mate ai ‘a e ‘uhila, ko e ngaahi misini sub generator ‘e ni’ihi ‘oku lau sekoni pe mate ‘uhila ‘oku mo’ui ‘otometiki pe ‘iate ia.
Ka ko e palopalema ko e ngaahi misini tisolo ‘i he fale misini ‘i Popua ko e ngaahi motolo kehekehe ‘o ‘ikai mei ha kautaha pe ‘e taha pea ‘oku faingata’a ai ki he polokalama fo’ou ke ne fakahoko ‘a e liliu ‘otometiki. Ka kuo ‘i Tonga ni ai ‘a e taukei he mala’e koia ke ne fakahoko ‘a e ngaue mahu’inga.
‘Oku ‘iai ‘a e tokolahi ‘oku nau tui ‘oku ‘ikai fakahaa he kautaha ‘a e mo’oni ki he matemate ‘a e ‘uhila ka ‘oku nau loi ki he ngaahi ‘uhinga kehekehe, ‘o kau ai ‘a e palopalema mei he mo’unga afi pea ko’eni ko e polokalama fo’ou ki he fakahoko ‘o e solar ki he misini paoa. ‘Oku hoko mo e maumau ‘a e ngaahi naunau faka’uhila, ke toe lahi ai longoa’a, ka ‘oku fiema’u ‘a e kautaha ‘uhila ke ‘omai hanau lau mahino ki he tafa’aki ko’eni.
‘Oku toe mahino pe mei he ngaahi talanga mo e fakamatala ‘e ni’ihi ‘oku ‘iai mo e ngaahi vaa ‘a e ni’ihi mei tu’a pea mo e poate. Ko e talu hono folahi he mitia ‘a e palopalema ‘oku fekuki mo e TPL he ngaahi ta’u kimu’a mo’enau fakalongolongo. Na’e fai pe ‘o a’u ki he tu’unga kuo ‘ikai toe lava ‘o fufuu’i pea nau iku ki falehopo pea a’u ki hono ‘akahi kitu’a ‘a e toko tolu ma’olunga vahe lalahi he TPL pea ‘oku faka’osi ia ki he Fakamaau’anga ‘a e fakatonutonu fakalao koia,
Ko e feinga koia ‘a e Poate lolotonga ke solova ‘a e ngaahi tefito’i palopalema, ‘oku mahino pe ‘a e ngaahi teke mei tu’a ‘o takitaha taukave’i ‘ene tafa’aki mo e fakapolitikale’i ‘a e ngaue. ‘Oku ‘iai mo e fifili pe ko e ni’ihi ko’eni ‘oku nau tuku fakamatala mei tu’a, ‘enau tu’unga taukei he mala’e ‘o e ‘uhila pe tenau lava ‘o solova ‘a e palopalema pea koeha ‘oku ‘ikai ke fakahuu atu ai kinautolu ki loto kenau solova ‘a e palopalema, kae fakamole ‘a e pa’anga lahi ange ke toe ‘omai ‘a e kau muli ke fakahoko ‘a e ngaue, kae tuku ‘etau kau taukei ‘oku nofo mei tu’a.
