‘I Tongani ‘Ateni Seniale malolo (‘Aminiasi Kefu) mo e kau Fakamaau mei Nu’usila ke tokoni ki he kau Loea Tonga ‘i he Fakamaau’anga
‘Oku lolotonga ‘i Tonga ni ‘a e ‘Ateni Seniale maloloo ‘a Tonga, ‘Aminiasi Kefu pea mo e kau Fakamaau mo e Loea mei he Fakamauu’anga ‘o Nu’usila, ke tokoni ki he kau Loea ‘i Tonga ki he’enau fakahoko fatongia ‘i he Fakamaau’anga.
‘Oku kau heni ‘a Marie Dyherberg (KC) , Pemela Andrews, Charles Blackie pea mo Anna Johns. Ko e ni’ihi ‘eni ko e kau Fakamaau ‘i he Fakamaau’anga Lahi mo fakavahe ‘o South Auckland pea mo e ta’u lahi ‘enau ngaue fakaFakamaau.
Ko e tokoua ko Ish Jayyanandan mo Han Na Kim ko e ongo Barrister fakafo’ituitui.
Ko e ni’ihi ‘o kinautolu kuonau ‘osi ngaue Fakafakamaau’anga he ngaahi fonua he Pasifiki pea ko e ni’ihi ko’enau toki ‘ahia ‘eni hotau ki’i fonua.
‘Oku kau fakataha ‘a e kau folau ni pea mo e ‘Ateni Seniale maloloo ‘a Tonga, ‘Aminiasi Kefu. Koe malie ‘a e fakahaa he taha ‘o e kau folau, na’e ‘ikai pe kenau ‘ilo ko ‘Aminiasi ko e ‘Ateni Seniale malolo, ka na’anau toki ‘ilo pe he ‘ai kenau folau mai, he ‘oku ‘ikai koha taha ia ‘oku loto ke ‘ilo ki he’ene ngaahi ngaue lavame’a pehee. Pea mo’enau fakamalo kiate ia he alea’i mo teuteu ‘a e me’a kotoa ki he’enau folau, mo e ako ‘oku fakahoko ma’ae kau Loea Tonga, ‘ene maau ‘a e me’a kotoa.
Kaekehe ko e ngaahi me’a mahu’inga na’e fakatefito ai ‘a e ako, ko e mahu’inga koia ke ma’u he kau Faka’iloa ha Fakafofonga Lao pe fale’i fakalao lelei, kae lava ke ma’u ‘a e Fakamaau totonu ‘i he hopo ‘oku fakahoko. Ko Nu’usila ‘oku totongi he pule’anga ‘a e kau Loea ke fakahoko ‘a e hopo ‘a e kakai ‘oku ‘ikai lava ‘o totongi hanau loea. Ka ‘oku fai ‘a e sio na’a lava ‘a Tonga ha taimi ‘o fakahoko ia.
Ko e konga mahu’inga ‘e taha, ko e tokoni ki he kau Loea Tonga ‘enau fakahoko fatongia ‘i he Fakamaau’anga, kae fakatefito ‘i he taimi ‘oku fakahoko ai ‘a e fehu’i fakafihi (cross examination) Ko e konga mahu’inga ‘eni ‘o e hopo he ‘oku meimei makatu’unga ‘a e faitu’utu’uni ‘a e Fakamaau ‘i he sai koia ‘a e fehu’i fakafihi.
Pea ‘i he konga faka’osi, ‘oku fai ‘a e vakai ki he kau Loea toki ‘osi mai mo e ni’ihi ko e faka’ilonga sitifikeiti pe, ka kuonau ngaue fakalao. ‘Aia ‘e fiema’u lahi na’a lava ‘a e ni’ihi ko’eni ‘o toe hoko atu ‘enau ako, he ‘e tokoni lahi ia ki he hiki’i ‘enau ngaue fakalao ki ha tu’unga ma’oluga ange.
‘Oku kau ki he akoni ‘a e kau Loea mei he pule’anga mo e kau Loea taautaha pea pehee ki he kau Talatalaaki mei he kau Polisi, ‘aia ko e ongo sino mahu’inga ‘eni ‘a e kau Loea ‘a e Kalauni mo e Talatalaaki ‘a e kau Polisi, he ko kinaua ‘oku na fakahoko ‘a e hopo ‘a e pule’anga mo e kau Faka’iloa. Pea ‘oku ‘iai ‘a e tui ‘e ‘osi ‘a e akoni ‘e toe leleiange ‘a e ngaue fakaloea mo Talatalaaki ‘i Tonga ni.
