Holomui Komiti kau Fakamaau mei he teu Semi Fainolo fe’auhi ‘a Tongatapu.
Kuo holomui ‘a e Komiti Fakamaau ‘a Tongatapu mei he teu kenau fakahoko fatongia ki he Semi Fainolo, ‘o e fe’auhi ‘akapulu ‘a Tongatapu ‘oku ‘amanaki ke fakahoko he Tokonaki ‘o e uike ni.
Ko e holomui ‘eni ‘a e Komiti Fakamaau ko’enau ta’efiemalie lahi ki hono taa’i ‘e he tokotaha pea mei he timi ‘a Liahona Old Boys ‘a e ongo Fakamaau Laine na’e fakamaau ‘i he fetaulaki ‘a e LOB mo e timi ‘a Kolomotu’a ‘i he kuata fainolo ‘o e fe’auhi. Ko e loto mamahi ‘eni ‘a e tokotaha ‘o e kau va’inga ‘i he ola ‘o e papa tohi kai ‘one tui na’e ‘ikai fakahoko totonu ‘e he ongo Fakamaau hona fatongia pea mo e ngaahi tukuaki’i kehekehe pe.
Ka ‘i he taimi tatau na’e fakahaa ‘e he Sekelitali ‘o e Komiti Kau Fakamaau Tokomea ‘Ofahulu, na’e ‘osi ‘oatu ‘enau tohi ki he Komiti ‘a Tongatapu pea ‘oku ui ‘enau fakataha ‘i he efiafi ‘o e ‘aho ni (Tu’apulelulu 19) mo e CEO ‘o e TRU pea ‘oku ‘ikai ke ‘ilo pe ‘e toe ‘iai ha liliu.
Ko e tautea foki ki he ala ha taha ki he Fakamaau ‘oku a’u pe ia ki he tautea ‘ikai ke toe kau ki ha va’inga ki he’ene mate pea ‘ikai ke toe fiema’u ke ne ‘asi ki ha fa’ahinga feitu’u ‘oku fakahoko ai ha va’inga. Ka ‘oku toe fakaloloma ‘a e va’inga, ko e hanga pe ‘e he tokotaha tatau ‘o tuki’i loua ‘a e ongo Fakamaau Laine.
Kuo ‘iai mo e fakamatala ‘oku hoko atu mo e ngaue fakalao ki he tokotaha va’inga mei Liahona. Pea ko e me’a ia kuo lau ta’u ‘ene hoko he mala’e va’inga ko e lahi hono ngaahi kovi’i ‘o e kau Fakamaau. Ko e ngaahi fe’auhi lalahi mo pale pa’anga lahi kuo ‘omai ai ‘a e kau Fakamaau mei Fisi kenau fakamaau’i ‘a e ngaahi fe’auhi ni koe’uhi ko e tui ‘oku tu’unga ma’ulalo ‘a e kau FAkamaau ‘a Tonga, hangee ko e fe’auhi ‘a Lavenga pea pehee ki he va’inga fakaako. Ko e ta’u ni na’e ‘omai ai ‘a e kau Fakamaau Fisi pea na’e ‘ikai ha palopalema ‘e taha ‘o e fe’auhi.
Mavaeua kakai ‘I he tu’unga fai fatongia kau Fakamaau mo e Mamahi ‘a e Fanau Va’inga.
Kaekehe kuo hoko ‘a e me’ani ia ke mavaeua ai ‘a e kakai pea ‘ohake ai mo e kaveinga mahu’inga ke fai ha vakai kiai.
‘Oku ‘ikai pe foki ke ‘iai ha totonu ia ha tokotaha va’inga ke ala ki he Fakamaau he ‘oku ‘iai ‘a e founga ki he ta’efiemalie, ko hono fakahuu atu ‘enau launga ki he Komiti Tongatapu mo e Komiti ‘a e Kau FAkamaau. Pea ko e ‘uhinga ia ‘oku mamafa ai ‘a e tautea ki ha ala ki he kau Fakamaau. Pea ‘oku tui ‘a e tokolahi mo e kau va’inga ‘e ni’ihi, ‘oku hoko ‘a e fo’i lao mo e tu’utu’uni ko’eni ke kalo kiai ‘a e kau Fakamaau ko ha toitoi’anga mei he tu’unga ma’ulalo ‘enau fua fatongia.
Ko e feilaulau ‘oku fakahoko ‘e he fanau va’inga ‘i he ‘aa he pongipongi ‘o fakamalohisino, lele lahi ‘i ‘uta mo tahi pea oo ki he gym. Pea ‘oku kau ia he feilaulau lahi. Ko e kau Fakamaau ‘oku nau fakamalohisino pe he ‘aho nai ‘e 2 pe 3 pea houa pe taha. Ka ko e taimi ‘oku nau maumau’i ai ‘a e va’inga henau faitu’utu’uni ‘oku ongo lahi ia ki he fanau va’inga pea lahi ai ‘a e taimi kuo nau ala ki he kau Fakamaau. Pea ko e fehu’i ia kuo ‘ohake pe kohai he fanau va’inga mo e kau Fakamaau ‘oku feilaulau lahi. Ka ‘oku ‘ikai pe ko ha ‘uhinga lelei ia ke ala ai ha taha ki he Fakamaau. He ko e lau mei he kau Fakamaau, ko e me’aifi ‘ena ‘oku ‘ataa ki he kau fakaanga, ka ‘oku fiu teke ‘a e tokolahi ia ke oo lele mo me’aifi.Ka ‘oku fiema’u he taimi tatau ke hiki’i ‘a e tu’unga ‘o e kau Fakamaau ke toe leleiange ‘o hangee ko Fisi.
‘Oku tukuaki’i he kau poupou ‘a e LOB na’e ha’u pe kau Fakamaau ia mo e laumalie hala ‘onau fakahoko ‘aki ‘enau fakamaau pea ko e fo’i faitu’utu’uni ‘e 2 ‘a e Fakamaau ‘I loto nae fu’u ‘ilonga ‘aupito mo e tu’utu’uni ‘e ua mei he ongo Fakamaau Laine.
Kaekehe ko e tu’u ko’eni, ‘oku te’eki ke mahino pe koeha ‘a e ola ‘o e fakataha pea mo e tu’unga ‘e ‘iai ‘a e fe’auhi ki he Tokonaki.
