Hoko feliliuaki fakapolitikale ko e palopalema ki he langa fakalakalaka
Na’e mahino mo’oni ‘a e fakatokanga’i ‘e he kakai ‘o e fonua ‘a e hoko ‘a e feliliuaki fakapolitikale, ko e palopalema lahi ki he langa fakalakalaka, ‘o hoko ‘a e fiemau mo e fefusiaki he mafai ke mahu’inga ange he langa fakalakalaka. Pea ‘oku ‘ikai ke toe fehu’ia ‘a e mo’oni koia, he ‘oku ‘ikai ke ngata ‘ene hoko tonu hotau fonua, ka ko e anga ia hono fakatokanga’i ‘e he ngaahi fonua lalahi ‘o mamani ‘a e ngaahi fonua ‘o e Pasifiki.
Hisitolia ‘o e palopalema fakapolitikale mo’ene uesia ki he fonua talu mei he 2010.
Ka ‘oku toe mata’aa’aa ange ‘a e lolotonga ni ‘i he huu mai ‘a e pule’anga lolotonga, ‘onau fakahoko ‘a e liliu lahi ki he ngaahi fokotu’utu’u ngaue ‘a e pule’anga maloloo ‘o Hu’akavameiliku. Ko e lolotonga ‘o e kei longoa’a ‘a e fonua ‘i he ngaahi liliu kuo fakahoko pea hangee ko ha tu’utu’uni ta’efakapotopoto, kuo fakahoko ‘e he pule’anga ‘a e fakataha’anga ki he langa fakalakalaka ‘a e fonua. Ka na’e hoko ia ke fakamahino ai ‘e he kakai ‘o e fonua ‘a e uesia lahi ‘o e langa fakalakalaka ‘e he feliuliuaki fakapolitikale.
Pule’anga Lord Tu’ivakano.
‘I he foki ki he 2010 he fuofua fili he liliu fakapolitikale, na’e ‘amanaki ‘a e kau feinga liliu tenau hoko ko e pule’anga koe’uhi ko e malohi ‘o e poupoua ‘o e liliu he taimi koia. Ka na’e faka’ohovale ‘a e ‘ikai kenau ma’u ‘a e fika kenau fakalele ‘a e pule’anga, kae huu mai ‘a e kau tu’u Tau’ataina mo e Hou’eiki Nopele ‘o hoko ko e pule’anga.
Pule’anga ‘Akilisi Pohiva
‘I he fili hoko, na’e liliu ‘a e kau Tau’ataina ‘o kau mo e Paati Fakatemokalati ‘o e ‘Otumotu Anga’ofa ‘onau fokotu’u ‘a e pule’anga ‘o ‘Akilisi Pohiva. Ko e tuai ‘enau hoko ki he pule’anga ko’enau fau atu ia ‘a e Palemia maloloo( Lord Tu’ivakano) ki he Fakamaau’anga ‘i he kaveinga ‘o e paasipooti.
Veteki Tama Tu’i ‘a e Fale Alea
Lolotonga ‘a e hanga ‘e he pule’anga ‘o ‘Akilisi ‘o tapalasia ‘a e pule’anga ‘o Tu’ivakano, kuo hanga ‘e he Tama Tu’i ‘i Sepitema ‘o e 2017 ‘o veteki ‘a e Fale Alea pea fakahoko ‘a e fili fo’ou ‘o toe ikuna pe he Paati Fakatemokalati ‘o e ‘Otumotu Anga’ofa. ‘I he 2019 na’e pekia ‘a ‘Akilisi Pohiva pea movete ‘a e PTOA ‘o a’u mai ki he ‘aho ni.
Movete PTOA huu hake kau Tau’ataina (Hu’akavameiliku)
Na’e huu hake leva ‘a e kau Tau’ataina he fili ‘o e 2021 ‘o pule fakaleveleva ‘i he Fale Alea he sea lahi taha, ka ko e pango na’e ‘ikai kenau lava ‘o ngaue fakataha pea ko e fuofua taimi ia he hisitolia ‘o e Fale Alea ke mavaeua ai ‘a e kau nopele, ‘o hoko ai ‘a Hu’akavameiliku ko e Palemia he 2021
Fakafisi Hu’akavameiliku hoko hake Dr. ‘Aisake Eke.
Kaekehe ‘oku ‘ikai ke puli ki he fonua ‘a e fakafisi ‘a e PM he ta’u kuo’osi, kae huu hake ‘a e fuofua pule’anga ‘o ‘ikai ha Nopele he Kapineti tukukehe ‘a e Tama Pilinisi Kalauni ko e fili mei tu’a.
Ko e tuai ‘enau hoko hake ki he Sea fakahoko tu’utu’uni kuonau veteki ‘a e konga lahi ‘o e ngaue ‘a e pule’anga motu’a, ‘o hangee ko hono ‘ohake he kakai ‘o e fonua.
Fiema’u ha Palani Langa Fakalakalaka Tu’uloa
Ko e tu’u leva he taimi ni, ‘oku fiema’u he kakai ‘o e fonua ha fa’unga palani Langa Fakalakalaka ‘oku ma’opo’opo pea pau hono halanga, ke ‘oua na’a toe lava ha pule’anga ‘o liliu ka ko’enau ha’u pe ‘o hoko atu ai. He ka ‘ikai ke fakahoko ‘a e fakakaukau ko’eni pea ‘e tonu ‘a e hoha’a ‘a e fonua ki he uesia he feliuliuaki fakapolitikale ‘a e langa fakalakalaka.
Ko e lau mahina mei heni ‘oku fakahoko ‘a e fili lahi he mahina ko Novema. Pea kapau he ‘ikai ke toe hoko atu ‘a e pule’anga lolotonga pea ko e ‘osi ai pe ia ‘enau fokotu’utu’u pea ‘e vilovilo pehee ai pe ‘a e fonua ‘o ‘ikai ha laka kimu’a.
‘Oku malie foki ‘a e fo’i laka ‘a e pule’anga ke fakahoko ‘a e Fakataha ki he Langa Fakalakalaka, neongo ‘enau ‘ilo ko e palani ko’eni ‘oku fakata’u 10 . Ka ‘oku nau fakakaukau ‘e hoko ‘enau fo’i laka ko’eni ke toe fili mai ai kinautolu kenau fakahoko ‘a e ngaahi ngaue na’e fai hono talanga’i.
Kaekehe ko e me’a mahu’inga taha ki he pule’anga, kenau fakahoko ha ngaue ki he fiema’u ‘a e kakai. Ke ‘iai ha palani langa fakalakalaka tu’uloa, ke ‘oua ‘e hoko ‘a e feliliuaki fakapolikale ko ha palopalema ki he langa fakalakalaka.
