Hoha’a kau memipa ki he founga pule’i Sea Fale Alea ‘a e Fale ‘i he to’onga ‘a Tongatapu 7
‘Oku ‘alu pe taimi ke ‘osi kataki ‘a e kau memipa tokolahi he Fale Alea ‘i he ‘ikai lava ‘e he Sea ‘o e Fale Alea ‘o leva’i lelei ‘a e lele ‘a e fale he taimi tepeiti. Pea kuonau lea ki he Sea ke fakahoko hono fatongia ko e Sea ‘o e fale, kae ‘oua ‘e tuku ke hanga ‘e Tongatapu 7 ‘o maumau’i ‘a e ngeia mo e maau ‘o e Fale Alea.
‘Oku toe fakaloloma ange ‘oku ‘ikai ko ha toki hoko ‘eni ‘a e fa’ahinga to’onga tepeiti ‘a Piukala ‘i Fale Alea, ka ko e talu ‘ene huu mo’ene fakahoko ‘a e me’atatau pea kuo toutou tuli ai ia kitu’a pea tautea’i mei he fale. Ka ‘oku ‘ikai pe ke ‘iai ha liliu ia he’ene to’onga tipeiti ‘oku fakahoko he fale.
Ko e palopalema foki ‘a Tongatapu 7 pe Piukala, ko e ‘ikai ke ne lava ‘o pule’i ‘ene ‘ita pea ko’ene ‘ita pe he tipeiti kuo kaikaila pea tukuaki’i tavale pe ‘eia ‘a e pule’anga.
Na’e hake kataki ‘a e tokoni Palemia ‘o fakahaa kia Piukala, “ ke ‘ai lelei ‘ene to’onga he ‘oku ‘iai pe kakai mo e tangata he fale ka ‘oku ‘ikai koia pe”
‘I he me’a ‘a e Minisitaa Leipa mo e Takimamata Dr Viliami Latu ki he Sea, ke fakahoko hono fatongia ko e Sea, kae ‘oau ‘e tuku pe ‘a e Fakafofonga ke ‘ai’ai noa’ia pe ‘ene fakamalanga mo e to’onga lea ‘oku fakahoko he fale.
Ko e fakalalahi ‘a e longoa’a, ko e tukuaki’i ‘e Piveni ‘a e pule’anga ‘oku nau kaiha’a mei he tukuhau ‘a e fonua. Ka na’e fakatokanga atu ‘a e Palemia ‘ene lea ‘oku fakahoko, ka na’e toe hiki hake le’o ‘o Piukala ‘o tala ‘oku kaiha’a ‘a e pule’anga mei he tukuhau ‘a e kakai. Na’e fakahaa atu ai pe ‘e he Palemia ‘ene launga ki he Sea ke fakahoko ha ngaue kia Piukala he tukuaki’i mamafa kuone fakahoko ki he pule’anga.
Na’e ‘uhinga ‘a Piukala ‘ene tukuaki’i ki he ngaahi fakamole ‘a e pule’anga ‘ikai ke ‘omai ki Fale Alea ke ‘uluaki lave’i he Fale Alea, ‘o hangee ko e fakatau ‘o e vakapuna fo’ou ‘a e Lulutai Airline pea pehee ki hono ngaue’aki ‘a e pa’anga ‘o e Vahenga Maloloo ki he ‘inivesimeni he Pangike Langa Fakalakalaka pea mo e teu koia ‘o e sipoti ‘o e Pasifiki ke fakahoko mai ki Tonga ni ‘i he 2031.
‘Oku ‘ikai koia pe ka na’ane toe ‘ohake ‘a e too folofola fakamuimui ‘Ene ‘Afio ‘i he fakaava ‘o e Fale Alea he ta’u ni, ‘o kau ki he ‘ikai ‘ata kitu’a ‘a e ngaue ‘a e pule’anga pea pehee ki he’ene ngaahi ngaue. Na’e lau ‘e Tongatapu 7 ‘a e too Folofola ko ha fo’i peau ke toutou fanifo ai he taimi taimi fakamalanga. Ka na’e fa’a fakamanatu atu ‘e he Minisita Leipa mo e Takimamata, koia tokotaha pe kuone talatau ki he Hau ‘o e Fonua, ka na’e faka’ikai’i mamafa ‘e he Fakafofonga.
Ko e poini mahu’inga ‘e taha ‘oku fakatokanga’i, ko e fa’a holi ‘a e tepile fakafepaki, ke fakahoko pe he Fale Alea ‘a e talanga ki he ngaahi kaveinga ‘oku nau tokanga kiai. Pea ‘oku nau tukuaki’i ‘oku ‘ikai maa’usia ‘a e Sea ‘o e Komiti Kakato ke fakahoko he Komiti Kakato ‘a e talanga. Ka ‘oku hangee ‘oku nau sai’ia he talanga ‘i he Fale Alea he ‘oku nau fa’iteliha pe kinautolu he Sea ‘o e Fale. Pea ‘oku fakatupu fifili ko e ‘ikai lava he Sea ‘o pule’i ‘a Piukala ‘ene to’onga ‘oku toutou fakahoko he fale.
Kaekehe kuo a’u ki he tepile ‘a e kau nopele ‘enau hoha’a ki he kaveinga tatau, hono pule’i he Sea ‘a e Fale Alea. Na’e toki ‘osi atu ‘a e ako ‘a e kau memipa pea mo e kau memipa Fale Alea mei ‘Aositelelia he uike si’i kuo’osi. Ka ‘oku ‘ikai haa mai ha liliu ia ‘e taha he founga ngaue ‘a e Fale.
‘Oku tui ‘a e tokolahi ko’ene tonu hono pule’i mo hono leva’i he Sea ‘a e fale ‘a e tipeiti pea ‘e hoko ia ko e Fale Alea lelei. Ka kuo kamata ke pango’ia ‘a e kakai ia ‘o e fonua he fanongo ki he talanga ‘a e fale he letio.
