Hao Siaina mei he ngaue popula ko e lipooti lelei ‘a e Va’a Malu’i Angalelei he ‘ikai toe faihia ia
Na’e tuku atu ‘e he ongoongo ni ‘a e hopo ‘a e kautaha Super Fone Limited mo e Faka’iloa ko Taniela Ngaluafe ko e tokotaha ngaue pea mo e motu’a Siaina ta’u 60 ko Qiwu Huang fakalele pisinisi ‘i Tonga ni. Ko hono kaiha’asi ‘e Ngaluafe ‘a e ‘uu koloa telefoni kalasi kehekehe ‘a e kautaha ‘o ‘ave kia Huang kene fakatau atu.
Na’e faka’ilo ai kinaua ki he kaiha’a mo e tali ‘a e koloa kaiha’a fe’unga mo e $78180. Pea na’e tali halaia ‘a Ngaluafe kae tali tonuhia ‘a Huang pea fakahalaia’i ‘e he Fakamaau’aga.
‘I he hilifaki tautea ‘a e ‘Eiki Fakamaau Lahi he ‘aho 1 ‘Epeleli, na’e tautea ngaue popula ‘a Huang ki he mahina ‘e 18 pea to’o ‘a e mahina ‘e ono. Ka na’e tautea toloi kotoa ‘e he Fakamaau ko’euhi ko e lipooti mei he Va’a Malu’i Angalelei ‘i he ‘aho 31 Ma’asi he ‘ikai ke ne toe fai ha hia pea ‘ikai tu’u fakatu’utamaki ki he sosaieti.
Ka na’e malie ‘a e fo’i lipooti ko’eni, pe koeha ‘a e me’afua lelei kenau fakapapau’i ai he ‘ikai ke toe faihia ‘a e matapule Siaina ko’eni. Kuonau ‘ilo nai na’e te’eki kene fakahoko ‘a e hia tatau kimu’a pe ko ha fa’ahinga hia, ka ‘oku ‘ikai ke a’u ki he Fakamaau’? Ko e ngaahi fehu’i mahu’inga ‘oku ‘alu hake ki he lipooti ko’eni kuone fakahaofi ‘a e tokotaha ni. ‘Oku ‘osi a’u ‘a e fakakaukau ‘a e kau a’usia pea ‘oku fakatauange pe ‘oku ‘ikai hoko ‘a e ngaahi me’a koia. Ko e me’a fua mei he tafa’aki ‘e taha, ko e pa’anga lahi pea tali tonuhia kae toki fakahalaia’i he Fakamaau’anga ‘o ‘ikai ha ongo’i fakatomala he hia na’e fai, ka ko’eni kuo ‘omai ‘a e lipooti lelei ke ne hao ai mei he ngaue popula. Ko e koloa kaiha’a fe’unga mo e $78180.00 pea kapau na’e ‘osi hono fakatau koe fiha nai nane mei ma’u he founga kakaa
Ko Taniela Ngaluafe na’e tautea ke ne ngaue popula ki he ta’u ‘e tolu kae to’o ‘a e ta’u ‘e taha pea malu’i he ta’u ‘e tolu. Na’e makatu’unga hono toloi kotoa ‘a e tautea koe’uhi ko e kole ‘a e pule ‘o e Super Fone, he kuona aleapau ‘e totongi fakafoki ‘e he Faka’iloa ‘a e pa’anga na’e mole pea kuone ‘osi totongi ‘a e $7000. Pea ka ‘alu ‘o ngaue popula ‘e kau kovi ki he Super Fone ke toe ma’u mai ‘ene pa’anga na’e mole. Ka na’e fakahaa mahino ‘e he ‘Eiki Fakamaau Lahi ko e mamafa ‘o e hia na’e totonu ke ngaue popula ka ‘oku ‘iai ‘a e poini mahu’inga ‘i he kole ‘a e kautaha.
Ko e ngaahi makatu’unga ki hono toloi kakato hona taimi ngaue popula, ko e ‘ikai kena toe fakahoko ha hia pea ke na ngaue popula taki houa ‘e 80 ma’ae komiuniti. Kuopau ke na taliui ki he ‘Ofisa Malu’i Angalelei ‘i he uike kotoa.
Ko e Ngaluafe na’e tupu he famili lelei pea ma’u ‘ene setifikeiti ‘i he Information Technology he sikolasipi mei Siaina. Kuone ‘osi ma’u hoa mo e fanau pea koia ‘a e tauhi ‘o e famili.
Ko Huang mei Siaina ‘oku fakalele pisinisi ‘i Tonga ni. ‘Oku ‘iai hono fokoutua pea ‘oku fa’a folau ki Siaina ke fakahoko hono faito’o. Ka kuo fakahaa he ‘ofisi Malu’i Angalelei he ‘ikai fakatu’umaki ki he sosaieti Tonga pea he ‘ikai ke ne toe fai hia.
