Halaia Siosio Malohi Vea ki he kaiha’a me’alele rent mei ‘Aositelelia, fakafolau ki Tonga
Kuo tu’utu’uni ‘a e ‘Eiki Fakamaau Lahi, ke halaia ‘a e Faka’iloa ko Siosio Vea ki he tikite ‘e 2 ko e fe’ave’aki pa’anga kaakaa pea pehee ki he kaiha’a me’alele.
Na’e tali tonuhia ‘a e Faka’iloa ki hono ‘uluaki ui ‘ene hopo he Fakamaau’anga pea fakahoko ‘ene hopo he ‘aho 18 Sepitema pea fakahoko ‘a e tala tu’utu’uni he ‘aho 20 Sepitema.
Ko e faka’ilo ‘eni ‘a e Faka’iloa ‘o tukuaki’i ki he fengaue’aki mo hono tali ‘o e me’alele kaiha’a mei ‘Aositelelia ‘o fakafolau mai ki Tonga ni. Fakatatau mo e kau Fakamo’oni ‘e toko 5 na’e ui ‘e he Talatalaki, ko e me’alele (VIN LSJW74U9MZ0519998) ‘a e kautaha rental ‘i New South Wale ko e Ride Solution LTd.
Fakatatau mo e fakamatala mei he Fakamaau’anga, na’e rent ‘e he hoa ‘o e Faka’iloa ko Kasanita Vea ‘a e me’alele mei he kautaha, ‘o iku fakaheka mai ia ki Tonga ni.
Na’e ‘ohake ‘a e ngaahi fakamo’oni ‘a e ngaahi pepa hono ‘omai mei ‘Aositelelia ki Tonga ni mo e ngaahi pepa ‘o e vaka mo e pepa Kasitomu pea pehee ki hono lesisita ‘i Tonga ni pea pehee ki he taa ‘o e me’alele, fakataha mo e fetu’utaki telefoni mo email.
‘I he hili ha ngaahi taimi hono rent me’alele pea ‘ikai toe fai ha fetu’utaki mo Kasanita, na’e hanga ‘e he tokotaha ngaue ko Asraful Hassan mei he kautaha ‘o tukuhake ‘i he mitia fakasosiale ‘oku mole ‘enau me’alele. Na’ane ma’u ‘a e fetu’utaki ko e me’alele ‘oku ‘i Tonga. Na’e fakahoko leva ‘a e fengaue’aki mo e kau Polisi ‘i Tonga ni, ‘o fakahoko ai ‘enau kumi tohi koloa ki he ‘api ‘o e Faka’iloa ‘o ma’u ‘a e me’alele. Na’e ‘iai mo e hoa ‘o e Faka’iloa na’ane rent ‘a e me’alele ‘i ‘Aositelelia ‘o fakafolau mai ki Tonga ni, ‘i he koniteina fakataha mo e ngaahi koloa kehe.
‘I he taukave ‘a e Faka’iloa ‘i he Fakamaau’anga, na’ane pehee na’e ‘ikai ha’ane ‘ilo ‘a’ana ‘e taha ko e ‘omai ‘o e me’alele ‘oku ta’efakalao. Ka na’e ‘ikai tali ‘e he Fakamaau ‘a e fo’i taukave koia, ka na’ane ‘osi ‘ilo lelei pe ko e me’alele kehe.
Na’e ma’u he fakatotolo ‘enau fetu’utaki telefoni mo email ‘o fekau’aki mo e me’alele ki hono ‘omai ki Tonga ni.
Na’e tu’utu’uni ai pe kene halaia ki he ongo tikite fakatou’osi pea fakatatali ai ki he ‘aho ‘e hilifaki ai hono tautea.
