Halaia ‘Ofisa Mo’ui ki he kakaa’i laiseni falekoloa mo e sivi mo’uilelei ki he Siaina.
Na’e tali Halaia ha ‘Ofisa Mo’ui ko Penisimani Nonu ‘i he Potungaue Mo’ui ki hono foaki ha laiseni fakamo’oni loi ki ha matapule Siaina fakalele falekoloa, ‘i he ‘aho 1 Ma’asi 2023. Ko e ongo tikite ‘e ua na’e faka’ilo ‘aki Faka’iloa ko e fakamo’oni loi pea mo e ‘ilo pau ko e tohi fakamo’oni loi na’ane foaki.
Pea na’e fakahoko hono hilifaki tautea ‘i he ‘aho 21 ‘Epeleli 2023 ‘i he ‘Eiki Fakamaau Lahi, ke ne ngaue popula ki he ta’u ‘e 2 mahina ‘e 6, ka ke toloi kakato ‘o malu’i ta’u ‘e 2, ‘i he ngaahi makatu’unga.
He ‘ikai te ne toe fakahoko ha hia he vaha’a taimi hono malu’i pea ke ne fakahoko mo e ngaue ki he komiuniti ‘i he houa ‘e 50.
Na’e kau hono siofi ‘o e hilifaki tautea ‘o e Faka’iloa pea mei he lipooti ‘a e ‘ofisa malu’i angalelei pea pehee ki he ‘ofisa kolo mo e Falemahaki Vaiola.
Kaekehe ko e puipuitu’a ‘o e hia na’e hoko, ko e Faka’iloa ko e Public Health Inspector Grade II pea ko e konga ‘ene ngaue ko hono sivi ‘o e ngaahi falekoloa fakatau fakavetevete mo huu koloa lalahi pea mo foaki ‘a e ngaahi ngofua (certificate) kapau ‘opku paasi hono sivi.
Kaekehe na’e ‘ikai faka’ataa ia ke ne foaki ha ngofua ki he ngaahi falekoloa koe’uhi ‘oku ‘ikai ko ha ‘ofisa mo’ui (medical officer).
Ka ‘i he ‘aho 28 Sanuali 2022 na’e ‘alu atu ai ‘a e Siaina ko Hou Zhi Huang mei Tofoa ke sivi hono falekoloa. Kae hili hono totongi ‘a e mahu’inga ki he ngofua, na’ane fakatokanga’i ‘a e Faka’iloa na’e kau hono sivi hono falekoloa he ngaahi ‘aho kimu’a pea ne kole ai pe ‘e lava ‘o tokoni ange ki he’ene ngofua laiseni falekoloa. Na’ane ‘oange leva ki he Faka’iloa ‘a e la’i talitotongi pea fakahaa ange he Faka’iloa te ne toki ‘alu atu mo e ngofua laiseni.
‘I he tuku ‘a e ngaue na’e ‘alu ai Faka’ilo mo e ngofua laiseni mo sivi mo’uilelei pea mo e ngofua ‘e taha ki he tokotaha ko Mei Juan Ni pea mo e puha facemask ‘o kole seniti pea ‘oange ai $40 pea hili ha uike ‘e taha pe ua na’e toe ‘alu ai Faka’iloa ‘o kole seniti ki he Siaina pea oange ‘a e $100.
Pea ‘i Mee 2022 na’e ‘alu atu ai ‘a Huang ki falemahaki ke fakafo’ou ‘ene sivi mo’ui lelei pea ‘ilo ai ‘e he taha ‘o e kau Toketa, Joseph Takai, ko e ngofua ‘a Huang na’e fakamo’oni loi. Na’e ‘eke ki he Siaina ‘o ‘ilo ko e Faka’iloa na’ane ‘oange ‘a e ngofua pea vetehia ai pe Faka’iloa ki he hia na’e faka’ilo kiai.
Kaekehe ‘oku ‘ikai ‘ilo pe ko e tu’ofiha pea ko e tokofiha he potungaue ‘oku nau fakahoko ‘a e me’a tatau. Pea ‘ikai fai ha lau ki he ngaahi Potungaue kehe hangee ko e Polisi, Kasitomu, Leipa mo e ngaahi sevesi kehekehe, ‘oku lahi hono tukuaki’i ki he totongi kakaa’i ‘a e ngaahi laiseni kehekehe. Pea kuo ma’u ‘a e ni’ihi, ko e ni’ihi ‘oku kei hao pea ko e fakaloloma ko e ni’ihi mahalo ‘oku kei hokohoko atu pe ia.
Ka ‘oku angafefee nai hono fakapapau’i ‘oku malu’i ‘a e kakaa’i ‘a e ngaahi laiseni he ngaahi potungaue kehekehe, ke ‘oua ‘e faingofua hono totongi fakafufuu ‘a e kau ngaue fakapule’anga ke ma’u ‘a e ngaahi laiseni mahu’inga.
