Halaia Faka’iloa ki he alakovi ki’i ta’ahine ta’u 4
Na’e tala tu’utu’uni ‘a e Fakamaau Lahi CJ Cooper ‘i he ‘aho 28 Fepueli 2025, ke halaia ‘a e Faka’iloa ki he’ene alakovi ‘i he ki’i ta’ahine ta’u 4.
Na’e fakafofonga’i mai ‘e Mrs E Lui ‘a e Kalauni ma’ae Talatalaaki, kae Sulia fili ma’ae Faka’iloa.
Fakatatau mo e ngaahi fakamatala mei he Fakamaau’anga pea fakatatau mo e tu’utu’uni ‘a e Fakamaau, he ‘ikai ke pulusi ha fa’ahinga fakamatala ke ‘ilo’i ai ‘a e famili pea mo e Mamahi koe’uhi ko’ene kei fu’u valevale.
Kaekehe ko e hia na’e hoko, ‘oku pehee ko e ki’i famili ‘oku nau nofo pe honau ki’i fale fakapalepale pea na’anau toki ha’u pea mei ‘uta kuo po’uli. Na’e ‘utu mai ‘e he fa’ee ‘a e vai na’e fakatali he ‘uha ‘o kaukau’i ‘a e Mamahi ‘itu’a honau ki’i fale (hut). Pea ko e ‘osi ‘ena kaukau na’e huu ‘a e fa’ee ki fale ke ‘omai ‘a e taueli ‘o e Mamahi pea mo e ha’u ‘a e Faka’iloa ‘aia ‘oku ‘iai pe ‘ene felave’i mo e Mamahi, ‘o fakahoko ai ‘a e hia.
Na’e toki fakahaa ‘e he Mamahi ki he’ene fa’ee kimui, hili ‘ene fanongo ai pea mo’ene feinga’i ‘a e Mamahi ke tala ‘a e mo’oni. Ka na’e ‘ikai ke ne tala he na’e talaange he Faka’iloa ke vakai na’ane tala.
Na’e ‘alu ai pe ‘o a’u ki he ‘ave he fa’ee ‘a e Mamahi ki ‘api Polisi, ‘o fakamatala he Mamahi ‘a e me’a totonu na’e hoko pea mei ai ki Falemahaki ‘o fakahoko hono sivi fakatoketaa ka na’e faingamalie pe.
Koe’uhi ko e mamahi lahi ‘a e fa’ee, na’ane ‘ave ai pe hono paatina ki he Fakamaau’anga, ka na’ane tali tonuhia ki he ngaahi tukuaki’i kuo fakahoko kiate ia. Ka ;i he lele ‘a e hopo na’e ‘ikai tali ‘e he Fakamaau ‘a e fakamatala fakamo’oni ‘a e fa’ee ko’euhi na’e mahino ‘aupito ‘ene loto mamahi hono paatina, ‘one ngaue’aki ‘a e lea mo e fakafeangai ‘ita.
Na’e fakafuakava’i pe ‘a e mamahi ‘ene fakamatala neongo ‘ene kei si’i pea ‘i he aofangatuku ‘a e Fakamaau hili ‘ene faka’eke ‘a e Mamahi pea mo’ene fanongo ki he ongo tafa’aki, na’e tu’utu’uni ai pe Fakamaau ke halaia ‘a e Faka’iloa.
‘Oku fakame’apango’ia ‘a e ‘alu ‘a e taimi pea hoko ‘a e hia ki he fanau ‘oku kei fu’u valevale fau pea ko e taha ‘eni ia he ngaahi hia, ‘oku ‘ikai pe toe taimi ‘a e Fakamaau’anga ke tautea ‘aki ‘a e lahitaha kapau tenau halaia.
‘Oku lave’i he ongoongo, ‘oku lahiange ‘a e longa’i fanau mo e kakai fefine ‘oku pa’usi’i ka ‘oku ‘ikai ke ‘ave ki he Fakamaau’anga pea ‘oku ‘ilo lelei kiai ‘a e ‘ofisakolo pea mo e kau takilotu, ka ‘oku nau longo koe’uhi ko e ‘uhinga kehekehe. Ka kohai ‘e ‘eke kiai ‘a e mo’ui ‘a e fanau ko’eni?
‘Oku lahi taha pe foki ‘ene hoko he ngaahi famili ‘oku mavae pea toe takitaha mali ‘a e ongomatu’a.
