Fokotu’u e ngaue faka-Fale Alea mo fakalao kia ‘Asiata Masima ko e fakamanamana ki he kau fakafofonga nopele
Na’e tu’utu’uni ‘a e Sea ‘o e Fale Alea ke tuku hifo ki he komiti tu’uma’u ‘a e Fale Alea, ke fakahoko ha ngaue faka-Fale Alea ki he matapule koia ko ‘Asiata Masima ko’ene fakamanamana ‘i he Facebook ki he hou’eiki Nopele ‘i he Fale Alea. Pea pehee mo e launga ki he kau Polisi ke fakahoko ha ngaue kia ‘Asiata.
‘Oku ‘ikai puli ki he tokolahi kae tautefito ki he kulupu PTOA ‘a ‘Asiata Masima pea mo’ene to’onga lea ‘oku fakahoko ‘i he ope he taimi kotoa.
‘I he’ene polokalama ‘i he Facebook ‘i he uike kuo’osi, na’e fakahaa ai ‘e ‘Asiata,” ka na’e ‘iai ha me’afana ai kuone ‘osi fana kau fakafofonga Nopele pea ko’ene ‘osi ia.”
Ko’ene loto mamahi hono hanga ‘e he kau Nopele ‘o fokotu’u ke faka’ilo faka-Fale Alea ‘a e Minisita Polisi ka ko e fakafofonga Fale Alea Tongatapu 7, ko’ene lea ta’etaau ki he kau nopele ‘i he’ene polokalama na’ane fakahaa ai ko e kau Nopele ‘oku nau kulikuli. Na’e loto mamahi lahi ‘a e kau Nopele ‘o fokotu’u ‘e he Fakafofonga Nopele fika ‘uluaki ‘a Vava’u, Lord Fielakepa ke fakahoko ‘a e faka’ilo.
Na’e fakahoko ‘a e talanga fefeka ‘i hono ‘ohake ‘a e kaveinga ke fakahoko ha ngaue faka-Fale Alea kia ‘Asiata, ‘i hono fakafepaki’i fefeka ‘e Hon. Piukala. Na’ane fakaha ki he Fale Alea ko e fokotu’u maumau taimi pea ‘oku mole ‘a e taimi ‘o e Fale ‘i he me’a laulaunoa. Ka na’e ‘ita lahi ‘a e kau nopele he tala ‘oku maumau taimi hono fakamanamana’i kinautolu.
Ko e fokotu’u ‘a Lord Tu’ilakepa ke fakahoko ‘a e faka’ilo faka-Fale Alea ka na’e loto ‘a Piukala ke toki ‘alu kinautolu ‘o fakahoko ‘enau faka’ilo ‘itu’a ki he kau Polisi, he ko e feitu’u totonu ia ‘o fakatatau ki he lao. Ka na’e fakamahino ‘e he Sea ‘o e Fale Alea, ‘i he kupu 70 ‘o e Konisitutone, ‘oku malava ke fakahoko ha ngaue ‘a e Fale Alea ki ha taha ‘oku ne fakahoko ha hia ki he kau memipa ‘o e Fale Alea.
Ka na’e ‘ohake ‘e Hon. Piukala ‘a e hopo ‘a e pule’anga mo e kau Faka’iloa ko Kalafi Moala, Filo ‘Akau’ola pea mo ‘Akilisi Pohiva pea tukuange kinautolu ‘e he Fakamaau’anga Lahi. Ka na’e fakamahino ‘e Fakafanua, kuo ‘osi monomono ‘a e lao pea maau mo e ngaue ke ‘oua na’a toe hoko ‘a e fehalaaki koia. Pea ‘oku lave kiai ‘a e konisitutone ki he hia ki he Fale Alea ‘oku lava ‘o fai ‘a e ngaue kiai.
Na’e kei fefeka ‘a e talanga, ka na’e tu’utu’uni ‘a e Sea ke tukuhifo ki he komiti totonu ‘a e Fale Alea.
