Foaki ngaahi me’aofa me’alele teuteu ki he fakataha FORUM
Kuo tu’uta ‘i Tonga ni ‘a e ngaahi me’alele me’a’ofa mei he ngaahi Fonua kehekehe, ko e tokoni ki he pule’anga ki he ngaahi fefononga’aki ‘a e kau taki ki he fakataha ‘a e ngaahi Fonua ‘o e Pasifiki ‘oku ‘iloa ko e Pacific Leader FORUM.
‘I he fakama’ala’ala ‘a e Palemia ki he ongoongo ni ‘i hono fehu’ia ‘a e ngaahi me’alele ‘oku pakingi ‘i he ‘ofisi ‘o e Palemia, na’e fakahaa ai ‘e he Palemia. “ ko e ngaahi me’alele tokoni na’e kole ki he teuaki fakataha ‘a e ngaahi Fonua ‘o e Pasifiki ‘oku ‘amanaki ke fakahoko mai ki Tonga ni he mahina ko Sepitema.
Ko e me’alele ‘e 20 ka kuo foaki ‘e ‘Aositelelia ‘a e me’alele ‘e 25 pea foaki ‘e he pule’anga Kolea Tonga ‘a e me’alele ‘e 8.
Na’e ‘osi ‘iai pe ‘amanaki ia ki ha ngaahi tokoni pehe ni ‘a e teuteu ki he fakataha ‘a e kau taki ‘o e Pasifiki, ‘o hangee pe ko e ngaahi tokoni pehe ni ki he ngaahi me’a mahu’inga ‘a e Fonua kimu’a hangee ko e hilifaki Kalauni ‘o Tupou 5 mo e Tama Tu’i Lolotonga pea pehee ki he ngaahi fakataha’anga kehe pe.
Kuo ‘iai foki ngaahi fakamatala ia ‘oku ‘ikai fakapapau’i pe ko e ngaahi me’alele mei fe pea na’e angafefee ‘ene ma’u he pule’anga, ka kuo fakamahino he Palemia ko e ngaahi me’alele tokoni.
‘I he taimi tatau ‘oku fai ‘a e tokanga ia ki he taimi ‘e ‘osi ai ‘a e fakataha’anga ki hono faka’aonga’i mo tokanga’i ‘a e ngaahi me’alele. Ko e kaveinga lahi ‘o e fakamole fakata’u ‘oku tokanga kiai ‘a e kakai ‘o e Fonua, koe lahi ‘a e kumi me’alele fo’ou ‘a e kau Minisita mo e kau CEO pea ko e lau miliona ia ‘oku fakamole ki he me’alele he ta’u kotoa.
‘Oku kau atu kiai mo hono maumau’i he kau ngaue fakapule’anga ‘a e ngaahi me’alele ‘i he ‘uhinga fakavalevale hangee ko e konaaa he ngaahi me’alele ‘a e pule’anga pea iku totongi he kakai totongi tukuhau.
Pea ‘oku ‘ikai fai ha laukovi ia ki he lele vale ‘a e kau faka’uli ‘o e ngaahi me’alele ‘a e pule’anga pea kuo launga ai ‘a e kakai ‘o e Fonua. Ka ‘oku fai ifo ‘enau lele vale koe’uhi ko e faka’ofo’ofa ‘a e ngaahi me’alele pea ka maumau mo ‘ekisiteni ‘oku ‘ikai kenau mole hano totongi ka ‘oku fua pe he kakai totongi tukuhau.
