Foaki he Siasi (LDS) sikolasipi kakato ta’u 4 e Mafi-Taa-e-‘uluafi mo e Dux Tonga High School 2024 ki he hili ‘ene Ngaue Fakafaifekau
Ko e taha ‘o e ongoongo na’e lahitaha hono share pea mo hono talanga’i ‘i he faka’osinga ako ‘o e 2024, ko e talavou mei he Funga Peauma’a Sione Tokotaha na’ane hoko koe Mafi-Taa-e-’uluafi mo e Dux ‘o e Tonga High School, ‘ene fili ke ‘alu ‘o fakahoko ‘a e ngaue Fakafaifekau ma’a Siasi ‘o Sisu Kalaisi ‘o e Kau Ma’oni’oni ‘o e Ngaahi ‘Aho Kimui ni. Na’e hoko ‘ene fili ke mole ai hono faingamalie ki he sikolasipi mei he pule’anga, koe’uhi ko e vaha’a taimi ‘o e ta’u ‘e ua te ne hoko ai ko e Faifekau.
Na’e tui ‘a e tokolahi ko e fili ta’efakapotopoto ke li’aki ‘a e faingamalie mahu’inga ki he kaha’u ‘o ‘ene mo’ui, koe’uhi ko e vakai ki he’ene tu’unga ‘atamai lelei he ako. Pea na’e hoko ia ko e talanga lahi ‘a e ‘o tatau pe ‘a e ni’ihi na’e ‘ikai tui tatau pea mo Sione pea mo e ni’ihi na’anau poupou’i ‘ene fili.
Ko e palopalema foki ‘o e talanga ko e kehekehe ‘a e tui fakalotu, ka ko e aofangatuku na’e ‘ia Sione Tokotaha he ko’ene fili ‘o fakatatau mo’ene tui fakalotu. Ka neongo ‘a e ngaahi talanga na’e fakahoko, ka na’e kei fili pe ‘a Tokotaha ke tukuange ‘a e sikolasipi kae hoko ko ha Faifekau ma’ae siasi.
Kaekehe na’e hoko ‘a e ongoongo koia ke a’u ki he kau taki fakalotofonua ‘o e Siasi pea mei ai ki he kau taki fakamamani lahi pea na’anau fu’u hounga’ia mo fiefia he vakai ki he feilaulau ‘oku fakahoko ‘e Elder Tokotaha ma’ae siasi. Na’e ‘ikai kenau toe tatali kae hanga ‘e he va’a ako ‘a e Siasi ‘o foaki kiai ‘a e sikolasipi kakato ta’u ‘e 4. ‘E totongi kotoa ‘e he sikolasipi ‘ene ako ko’ene nofo mo e me’a kotoa. Ko e hili ‘ene ngaue Fakafaifekau kuo ‘osi maau mai ‘a e ako ‘a e siasi ke fe’iloaki mo Tokotaha.
‘Oku ‘iloa ‘a e sikolasipi ko e David O Mckay Presidential Scholarship pea ko e taha ia ‘o e faingamalie ako ma’olunga taha ‘oku foaki ‘e he siasi. Pea ‘e fakahoko ‘e Elder Tokotaha ‘ene feinga ako hili ‘ene ngaue Fakafaifekau ‘i he BYU-Hawaii Campus.
‘Oku lolotonga ‘i he ako’anga Faifekau ‘a Tokotaha ‘i ‘Amelika ‘o teuteu ai ke ne ngaue ‘i he misiona kuo vahe’i kiai ko e Misiona Provo Utah, ‘i he ta’u kakato ‘e ua.
Fakatatau mo e fakamatala falala’anga ‘oku ma’u he ongoongo ni, na’e ‘osi tali pe he siasi ‘a e sikolasipi ‘a Sione Tokotaha ‘i he mahina ko Sanuali f’aho 24 pea na’e tali ke toki faka’ofisiale ‘a e fetu’utaki mei he siasi kia Tokotaha. Ka ko e palopalema ko e toki fakatokanga’i pe ‘e Elder Tokotaha ‘a e email ‘i he’ene huu ki he MTC ‘i he mahina ni.
Ko e fiefia ka ko ha fiefia ‘a e ongomatu’a ‘a Sione ‘i he tapuaki ‘o e sikolasipi, he ko e ako ma’olunga ange ‘i ‘Amelika ‘oku totongi mamafa.
Na’e fakahaa ‘e he ongomatu’a ‘a Elder Tokotaha ‘ena fiefia lahi he tapuaki kuona siotonu ai ki hona foha ‘i he fili totonu na’ane fakahoko ke fakamu’amu’a ‘a e ‘Eiki. Pea ‘oku nau fakamalo lahi ai ki he siasi he langilangi kuo ma’u hona foha pea ‘oku nau ongo’i ‘enau loto ma’ulalo ke tali lelei ‘a e faingamalie ni.
‘Oku taumu’a foki ‘a Elder Tokotaha ke ne hoko ko ha Toketa Sino ‘i he kaha’u pea ko e sikolasipi ko’eni koe tokoni lahi mo e fakava’e lelei ki he’ene palani ako.
