Fiema’u $7 miliona ke fakaake ‘aki Lulutai, liliu ke hoko ko e taha Pisinisi Pule’anga
‘I he kaveinga ia koia ki he kautaha vakapuna Lulutai ‘oku ne fakahoko ‘a e fepuna’aki fakalotofonua, ‘oku mahino mai ‘oku fiema’u ‘a e $7 miliona ke fakaakeake ‘aki, ke kei lava ‘o hokohoko atu ‘ene fakahoko fatongia ki he kakai ‘o e fonua.
‘Oku kei fehu’ia he tokolahi ‘a e founga na’e fakapa’anga ‘aki ‘e he Kapineti motu’a ‘a e kautaha vakapuna Lulutai, ‘o kau ai hono fakatau mai ‘o e vakapuna Twin Otter mei Siaina ‘i he pa’anga US$6 miliona. Pea pehee ki he tuku atu ‘e he pule’anga ‘o Hu’akavameiliku ki he Lulutai ‘a e TOP$10 miliona.
‘I he taimi tatau ‘o he ta’u kuo’osi mei Sune ki Novema na’e tokoni mai ai ‘a ‘Aositelelia ‘o fakapa’anga ‘a e taha ‘o e ngaahi vaka ‘o e Fiji Airways ke ne tokoni ki he fepuna’aki fakalotofonua ‘a Tonga, hili ‘a e maumau ‘a e vaka ‘a e kautaha.
Kaekehe, na’e fakahaa ‘e he Palemia ki he kau faiongoongo ‘i he ‘aho Falaite ‘o e uike kuo’osi, ‘oku toe fiema’u ‘e he Lulutai ‘a e pa’anga ‘e $7 miliona ke tokoni kae kei lava ‘a e kautaha ‘o hoko atu.
Ka na’ane toe fakahaa foki, ‘oku lolotonga ngaue ‘a e Kapineti ki he ngaahi me’a fakalao kae lava ‘o fakahuu ‘a e Lulutai ke hoko ko e taha ‘o e Ngaahi Pisinisi ‘a e Pule’anga. Pea ‘oku fakahoko ‘a e fengaue’aki pea mo e pule ‘o e kautaha Poasi Tei, ki he me’a ‘e lelei taha ki he kautaha.
Kuo lahi hono ‘ohake ‘e he mitia fakasosiale kuo tuku kitu’a ‘a e tokotaha ni, ka ‘oku ‘ikai mo’oni ‘i he’ene a’u mai ki he lolotonga ni. Na’e toe fakahaa ‘e he Minisita ki he Fefononga’aki ka ko e tokoni Palemia Hon. Taniela Fusimalohi, ‘oku kau pea mo e ngaahi me’a ‘i he’ene tafa’aki (Aviation) ‘oku fiema’u ia ke fakapapau’i koe’uhi ko e malu ‘a e fepuna’aki vakapuna, he ‘oku lahi ‘a e lekooti ‘o e ngaahi maumau ‘a e vakapuna ‘o e kautaha.
‘I hono fehu’i ki he Minisita Ngaahi Pisinisi ‘a e Pule’anga Hon. Piukala pe ‘oku ‘osi ‘iai hanau palani ki he taha kene hoko atu hono fakalele ‘o e Lulutai pea koha kautaha ‘oku nau fie kau mai mei tu’a. Ka na’e ‘ikai ha tali hangatonu ki he fehu’I ni. Ka na’e malie ‘ene fakahaa ‘ene fifili lahi ‘a e ‘uhinga na’e fu’u tokanga ai ‘a e pule’anga motu’a mo e Lulutai ki he vakapuna na’e fakatau mei Siaina.
‘Oku ‘iai foki ‘a e sio ka faifaiange kuo toe fakafoki ki he Real Tonga. Ko e kautaha ‘eni na’e ‘uluaki ‘iai ‘a e fepuna’aki fakalotofonua. Na’e palopalema fakapa’anga ‘o kole ki he pule’anga ha tokoni, lolotonga ia ‘oku ‘ikai lava taa ‘ene totongi fakamahina ki he pule’anga.
Na’e toe palopalema mo’ene kau ngaue ‘o makatu’unga ai hono ‘ave ‘e he pule’anga ‘a e kautaha ‘o fakalele ko e kautaha ‘a e pule’anga. Pea ka toe fakafoki ki he Real Tonga, ‘oku fehu’ia lahi pe ‘oku fakapotopoto pea ‘oku kau kiai ko e pule ‘o e kautaha ni, ‘oku ‘iai mo’ene pisinisi kehekehe pea ‘e lava fefee ke ‘ilo ‘a e tu’unga totonu ‘o e kautaha vaka, mei he’ene ngaahi pisinisi kehe.
Ka ‘oku tukukehe ange ka ‘iai ha kautaha fo’ou ‘aupito, ‘e huu mai ‘o fakahoko ‘a e fatongia ni. Ka ko e me’a ‘e ua ‘oku fiema’u, ‘uluaki ko e lava lelei ‘a e ngaahi sevesi ki he kakai ‘o e fonua pea ko e ua ko e ma’ama’a ange ‘a e tikite vakapuna.
