Fe’unga mo e toko 6895 nau ‘ahia Arc of Peace
Na’e fe’unga pea mo e 6895 ‘a e fu’u kakai ‘o e fonua na’anau ‘ahia ‘a e vaka tau Siaina falemahaki oku ‘iloa ko e ‘Aake ‘o e Melino.
‘I he ‘aho 27 Sune-Siulai 4th ko e ‘aho pe ia ‘e 7 ‘a e tu’uta ‘a e vaka ‘i Tonga ni. Kuo ‘ahia ai he fu’u kakai tokolahi ko’eni ‘o e fonua ‘a e vaka tokoni faito’o’a Siaina.
Ko e toko 5800 na’anau a’utonu ki he vaka ‘i he uafu Vuna. Pea ko e toko 1095 na’anau a’utonu ki he ngaahi senita mo’ui’e 3 ‘i Mu’a, Vaini pea Mo Nukunuku na’e ‘iai ‘a e kau Toketa mei he vaka tokoni. Ko e kau ‘a’ahi ko’eni na’e lava ai ‘a e faito’o tafa ki he toko 39 pea ko e fu’u fika lahi ‘o fakatatau ki he taimi nounou ‘enau ‘i heni.
Fakatatau ki he fakamatala mei he Amipasitoa maloloo ‘a Tonga ki Siaina (Siamelia Latu) ko e fika ko’eni ‘oku ma’u ‘oku fakafiefia lahi ko e mahino ‘a e ‘aonga lahi ‘a e polokalama ‘a’ahi mei he pule’anga Siaina.
Ko e taimi tatau foki ‘oku mahino mai ‘a e tokolahi ‘oku nau fokoutua ka ‘oku ‘ikai ke lava he ma’u anga tokoni fakafaito’o mei he potungaue mo’ui ‘o fakahoko. ‘Oku kau heni ko e ‘ikai ha me’a ngaue fakaonopooni he potungaue pea mo ha kau Toketaa mataotao kenau fakahoko ‘a e ngaue fakafaito’o.
Ka neongo ‘a e fu’u kakai tokolahi ko’eni, ka na’e ‘iai pe mo e tokosi’i na’anau fakaanga’i mo fakahoko’a e ngaahi fakamatala tukuhifo ki he vaka tokoni. Ka na’e ‘ikai ko ha palopalema ia ki he fu’u kakai tokolahi na’anau ‘ahia ‘a e vaka.
Na’e fakahoko he pule’anga ha polokalama fakamavae mo e kau ngaue he vaka henau mavahe atu he ‘aho Falaite.
‘Oku fakafiefia ‘eni ia ki Siaina, ngali ngali ‘oku nau tohoaki’i ‘a e tokanga ‘a e fonua mei he fokotu’u ‘ofisi faka’amipasitoa ‘a ‘Amelika.
