Fekau Fakamaau’anga Kelekele ‘a e Faka’iloa ke mavahe mo’ene koloa mei he ‘api Mamahi
Na’e tu’utu’uni ‘a Fakamaau Lahi Petunia Tupou ‘i he ‘aho 20 Sepitema he Fakamaau’anga Kelekele ‘i he vahefonua Vava’u, ki he Faka’iloa ko Vaka Lau’i, ke ne mavahe mei he ‘api kolo ‘o e Mamahi ko Monu’ia Ma’u Kata ‘i he kolo ko Leimatu’a.
Na’e fakahoko ‘a e fakatonutonu fakalao ‘i he Fakamaau’anga Lahi ‘i Vava’u he ‘aho 19 ‘o Novema pea tala tu’utu’uni he ‘aho 20 ‘o Novema.
Ko e Mamahi pe Talatalaaki ko Monu’ia Ma’u Kata pea ko hono konga ‘api kolo na’e lesisita ‘i he ‘aho 20 Novema 2023, ko e toki kakato ia ‘a e ngaue fakapepa ki he kole lesisita talu pea mei he 2014 hono fakahuu atu ‘a e kole lesisita. Na’e makatu’unga ‘a e kole lesisita, ko e kole ‘a e ma’u tofi’a Fotu ki he Mamahi ke ‘oange ha konga hono kelekele ke fakalahi ‘aki ‘a e fa’itoka ‘oku tu’u fakataha mo e ‘uta ‘o e Mamahi. Na’e to’o ‘e he Mamahi ‘ene ‘aa na’e ‘aa’i ‘aki hono ‘api ‘uta fakataha mo e konga ‘ene ngoue mei he konga na’e kole ‘e Fotu, kae fakalahi kiai ‘a e fa’itoka. Pea na’ane ngaue ai pe he ta’u tatau ke fakahuu ‘ene kole lesisita ‘apikolo mei hono ‘api’uta tatau ‘oku ofi ki he fa’itoka.
‘I he mahina ‘Okatopa 2014 na’e fakahuu atu ai ‘ene kole pea totongi mo e fakamole ko e $46. ‘I he ‘aho 13 ‘Epeleli 2015 na’e fakamo’oni ai ‘a Lord Ma’afu ki he Savinga Gram pea lesisita leva ‘a e konga ‘apikolo he ‘aho 23 Novema 2023.
Ka ‘i he 2017 na’e faka’ata ai ‘e he Mamani pe ko e ma’u ‘api ‘a ‘Ofa To’a kene ngoue ‘i hono ‘uta kae folau hiki ia mo hono famili ki ‘Amelika. Pea ‘i he 2022 na’e fetu’utaki ai ‘a ‘Ofa ki he Mamahi, ko e konga kelekele ‘apikolo na’e lesisita kuo ha’u kiai ‘a e Faka’iloa Vaka Lau’i ‘o fokotu’u ai ‘ene tangike mo e ukamea shed.
Na’e fetu’utaki mai ‘a e Mamahi ki he’ene Fakafofonga Lao ko Mr Pouvalu ke fakahoko ha ngaue ki he Faka’iloa ke ne mavahe, ka na’e ‘ikai pe mavahe ‘a e Faka’iloa he ko e foaki ange ‘e he foha ‘o Fotu ‘a e konga kelekele ma’ana.
Kaekehe na’e fakahoko ai ‘a e hopo ‘o fakafofonga’i ‘e Lilika Fonua ‘a e Faka’iloa kae fakafofonga’i ‘e Mr Pouvalu ‘a e Mamahi.
Na’e tu’utu’uni ‘a e Fakamaau’anga ki he Faka’iloa ‘oku ta’efakalao ‘ene nofo he ‘apikolo ‘o e Mamahi pea ‘oku ‘ikai ko ha poini mamafa ke ne nofo mai’aki ‘a e foaki na’e fakahoko he foha ‘o Fotu, ka ‘oku pule ‘a e ngaahi ngaue fakalao fakapepa na’e fakahoko ‘e he Mamahi.
Na’e toe fekau ai pe kene to’o ‘ene koloa mei he konga ‘api pea totongi mo e fakamole ‘o e hopo.
