Fakangata he pule’anga fakatonutonu fakalao Pangike Fakalakalaka mo e Pangike Pule, tuku kitu’a mo e Sea Poate mo e memipa ‘e taha
Kuo fakangata ‘e he pule’anga ‘a e fakatonutonu fakalao he vaha’a ‘a ‘ene ongo Pangike ko e Pangike Langa Fakalakalaka pea pehee ki he Pangike Pule. Pea tu’utu’uni ke takitaha totongi ‘ene fakamole fakalao, ko e fakahaa ia ‘e he Palemia ki he kau faiongoongo ‘i he ‘aho Falaite ‘o e uike kuo’osi.
Ko e fakangata ‘eni ‘a e tau’aki fakatonutonu fakalao ‘a e ongo tafa’aki talu ‘ene lele mei he ta’u kuo’osi, ‘i hono tuku mai ‘e he Pangike Pule ha fakatokanga tohi ki he tu’unga fakapa’anga ‘a e Pangike Langa Fakalakalaka pea ta’ofi ‘a e CEO Mrs ‘Emeline Tuita, kene toe kaunga ki ha fa’ahinga me’a.
Na’e tafihu heni ‘a e Pangike Pule mo e CEO pea pehee ki he Poate, ‘o ‘ave ki he Fakamaau’anga ‘enau ‘eke fakalao ki he tu’utu’uni mei he Pangike Pule. Na’e ‘ikai koia pe, ka na’e toe ‘ave mo e ngaahi kautaha ongoongo ko e Broadcom FM87.5 pea mo e ‘Etita ‘a e Tonga Independent, ki hono tufaki ‘o e ngaahi fakamatala fakaongoongokovi.
Na’e tali heni ‘e he Fakamaau’anga ke fakata’e’aonga’i ‘a e ngaahi tu’utu’uni ‘a e Pangike Pule pea ke totongi ‘e he Pangike mo e ngaahi kautaha ongoongo, ‘a e taki laukilu.
Ka na’e toe fakahoko ‘a e tangi ‘a e ngaahi kautaha ongoongo ki he Fakamaau’anga, ‘o tali ke fakatatali mo e tu’utu’uni koia ke totongi pa’anga ki he CEO mo e Sea ‘o e Pangike Fakalakalaka. Pea ko e kei lolongo ‘a e ngaahi tafa’aki ‘o takitaha faifika ‘ene kau loea pe koeha ‘a e la’ipele tenau huu hoko ‘aki ki he Fakamaau’anga, kuo kolosi ‘a e Fakamaau (Palemia) ‘o tu’utu’uni ke ta’ofi ‘a e toe hoko atu ‘a e fakatonutonu pea takitaha totongi ‘ene loea.’Oku tui ‘a e Palemia ‘oku fakamole taimi pea fakamole pa’anga, ‘a e ngaahi fakatonutonu ko’eni, kae fakahoko ha ngaue ki he kakai ‘o e fonua ‘oku mahu’inga.
Kuo tuku foki kitu’a mo e Sea ‘o e Poate Pangike Langa Fakalakalaka Penisimani Vea, kae le’ole’o leva ‘a ‘Aloma Johnson pea pehe kia Tauahi ‘Ahokovi ko e memipa fo’ou.
‘Oku tui ‘a e tokolahi, he ‘ikai tukunoa’i ‘e he CEO pea mo e Sea ‘o e Poate ‘a e ngaahi tu’utu’uni ‘a e pule’anga fo’ou, ta’efai hano fakafepaki’i fakalao. Ka ‘oku pule pe ‘a e pa’anga pea pehee ki ha Loea lelei kene fakahoko ‘a e hopo.
Na’e kamata ngaue ‘a ‘Emeline ko e CEO ‘i he ‘aho 19 Sepitema 2022, ‘o a’u mai ki he lolotonga ni.
‘Oku kei siofi ta’epete ‘e he pule’anga ‘a e Pangikee Langa Fakalakalaka, ko’enau tui ‘oku ‘iai ‘a e ngaahi ngaue ta’efakafiemalie. Na’e ‘iai ‘a e ngaahi poloseki na’e fakaangaanga atu kiai ‘a e ngaue ‘a e pangike hangee ko e langa ‘o Polata’ane pea pehee ki he langa fo’ou koia ‘o e Fale Alea ‘o Tonga ‘i he konga kelekele hanga mai ki Matatoa ‘oku ‘ofisi ai ‘a e ‘uhila.
Ka ko e tu’u ko’eni ‘oku fakatatali kotoa ia kae vakai’i ‘e he pule’anga ‘a e ngaahi lipooti ‘oku fiema’u kenau vakai kiai.
