Fakame’ango’ia PM malolo he faitu’utu’uni vave ‘a e Minisita Ako fo’ou, kae ‘ikai tomu’a talanoa ki he Potungaue
Kuo fakahaa ‘e he Palemia mo e Minisita Ako malolo, Hu’akavameiliku, ‘ene fakame’ango’ia ‘i he Minisita Ako fo’ou Hon. Dr. ‘Uhilamoelangi Fasi, ‘i he ngaahi liliu vave kuone fakahoko ki he Potungaue Ako, ta’etene ‘uluaki fakatalanoa ki he Potungaue Ako.
‘Oku ‘uhinga ‘eni ki he ngaahi ngaue lelei ko e ta’u ‘eni ‘e ua hono kamata pea mo e ngaahi kehe kuo kamata lelei, ka ‘oku hoko ‘a e ‘ikai tui tatau fakapolitikale ke fakahoko ‘aki ‘a e faitu’utu’uni.
‘I he fehu’i ‘a e ongoongo ni ki he PM mo e Minisita Ako maloloo, pe koeha ‘ene vakai ki he ngaahi liliu kuo fakahoko ‘e he Minisita Ako fo’ou ki he Potungaue, na’e pehee ai ‘e Hu’akavamiliku, “ Na’e totonu ke ‘uluaki talanoa ki he kau ngaue he Potungaue Ako, kimu’a ke ne ma’u ha fakamatala fe’unga ke fakahoko’aki ‘ene faitu’utu’uni.”
Na’ane hoko atu ‘o pehee, “Me’apango ka ta’ofi he Pule’anga ‘a e kai pongipongi ‘a ‘etau fanau ako, ‘oku ‘i he toko 20,000 tupu ‘a e tokolahi ‘o e fanau ako Pule’anga mo e Siasi.
Pea na’a mo e ‘u fonua tu’umalie ‘oku fai pe ai ma’u me’a tokoni ma’ae fanau. ‘Oku lahi ‘a e ngaahi lelei ke kai pongipongi ‘o mahino e lahi ‘etau fanau ’oku ‘ikai ma’u me’atokoni pongipongi, ‘o fakatatau ki he savea ‘a e Potungaue Mo’ui. ‘Oku ako’i mo e to’onga mo’ui mo e ma’u me’akai totonu ke kai. ‘I he ‘enau mo’ui lelei ‘oku faka’ai’ai ‘a e fanau ke nau omai ki he ako pea ‘oku sai ki he ako mo e mo’ui ‘etau fanau. Pea kuo ‘osi fakapa’anga ‘o ‘iai hono patiseti na’e tali he Falealea. Ka ‘e lava ke fakahuu mai ke to’o mei he Patiseti hoko kemau talanoa’i ‘i Fale Alea.”
Na’e fai ‘a e fetu’utaki tohi ki he Minisita Ako ke ‘omai ha’ane lau ki he tu’utu’uni kuone fakahoko, ke ta’ofi ‘a e ta’etotongi ako mo e kai pongipongi ‘a e fanau ako, ka na’e te’eki faingamalie ke ‘omai ha’ane tali.
Ko e ngaahi liliu lahi kuo fakahoko ‘e he Minisita ki he ngaahi lao na’e tali he Fale alea, ka kuone kaniseli ‘o hangee ko e ako ta’etotongi, kaiho’ata, ‘ikai ha toe sivi he kalasi 6 mo e foomu 5 ke toe fakafoki mo e ngaahi fokotu’utu’u ki he ngaahi lakanga he ‘ofisi ako, kuo tukupa ‘a e Minisita ke kaniseli.
Kaekehe ko e me’a ‘oku malie, ko e ‘amanaki ke huu ‘a e Fale Alea pea ‘oku ‘iai ‘a e tui ko e fepaki lahi ‘e hoko he Kapineti fo’ou pea mo e Kapineti motu’a. Pea ‘oku mo’oni ‘etau lea Tonga ko e , “ko e taa kau taa”. Nake fakaanga pea ko e taimi ni te ke fakahoko fatongia kau fakaanga au. Pea ‘e toki ‘ilo ai ‘a e tama ‘oku tonu ‘ene sio mo e tama ‘oku fakaanga ‘ata’ataa pe.
‘Oku hoha’a ‘a e tokolahi ki he ki’i taimi nounou ‘oku ngaue ai ‘a e Kapineti fo’ou, kae lahi ‘a e ngaahi liliu kuonau fakahoko pea ka a’u ki he fili lahi kuo ‘ikai kenau toe pule’anga pea ko e toe liliu ‘a e tu’utu’uni na’anau fakahoko.
