Fakamaloloo’i CEO Lulutai ko e lele mole, kae fakahuu mai CEO fakataimi mo hono mo’ua $5 miliona
‘Oku ‘ikai pe holo ‘a e ngaahi liliu lalahi ‘oku fakahoko ‘e he pule’anga ‘o Dr. ‘Aisake Eke mo’ene kapineti ki he ngaahi potungaue kehekehe ‘o e pule’anga pea ‘oku ‘alu pe ‘a e taimi pea mo e hikihiki too ‘a e ngaahi liliu lalahi kuo fakahoko talu ‘enau heka hake ki he sea ‘o e faitu’utu’uni.
‘I he uike kuo’osi ‘i he fakataha pea mo e kau faiongoongo, na’e fakahaa ai ‘e he Palemia kuo fakamalolo’i ‘a e CEO ‘o e Lulutai, Poasi Tei. Ko hono fakamaloloo’i ‘eni ‘o Tei, ko e tui ‘a e Kapineti ‘oku ‘ikai ha ola lelei hono fakalele ‘o e kautaha Lulutai pea lahi mo e pa’anga tukuhau ‘o e kakai kuo mole.
Pea kuo lahi ‘a e pa’anga ‘a e pule’anga mei he ngaahi tafa’aki kehekehe, ‘o hange ko e tokoni mei muli pea pehee ki he pa’anga vahenga maloloo ‘a e kau ngaue fakapule’anga. Pea ko e lolotonga ‘a e lele mole ‘a e kautaha kuonau toe fiema’u mo e $7 miliona kanau kei lava ‘o hoko atu.
Kaekehe ko e malie, ko hono fakamaloloo’i ‘a e CEO ko e lele mole ‘a e kautaha, kae fakahuu mai ‘e he pule’anga ‘a e CEO fo’ou ko Tevita Palu, lolotonga koia ‘oku ‘iai hono fu’u mo’ua ko e $5 miliona ki he pule’anga.
Ko e mo’ua ‘eni ‘o Tevita ‘i he ‘uhinga tatau ai pe ko e fakalele ‘a e kautaha vakapuna fakalotofonua, ka na’anau noo (rent) ‘a e vakapuna a e pule’anga.Pea na’e ‘iai hono ngaahi aleapau, ‘o kau ai ‘a e lahi ‘o e totongi noo te ne fakahoko fakamahina mei he’ene fakalele ‘a e vaka ‘a e pule’anga, ‘i he’ene kautaha na’e ‘iloa ko e Real Tonga.
Na’e a’u ki ha tu’unga na’e ‘ikai lava ‘o totongi ‘a e noo fakamahina pea ‘oku tukuai’i ‘e he fakamatala mei he Palemia, koe’uhinga ‘eni mei he taimi na’e huu mai ai ‘a e fakataputapui ‘a e covid-19.
Na’e toe fiema’u foki ‘e Tevita Palu, ke tokoni ange ‘a e pule’anga ‘aki ha $2 miliona ki he Real Tonga koe’uhi ko e ngaahi pole ‘o e Covid-19 na’e hoko ai ‘a e fakataputapui pea tu’u ai ‘a e fakahoko fatongia ‘a e kautaha.
‘I he taimi tatau foki, na’e ma’u he ongoongo ni ia ‘i he taimi koia ‘a e ngaahi fakamatala ki he ngaahi palopalema fakapa’anga ‘a e Real Tonga, ‘o kau ai ‘a e fiema’u ke fakafo’ou ‘a e misini ‘o e taha ‘ene ngaahi vaka pea na’e ‘iai pe mo e ngaahi noo kehe ‘a e kautaha he pangikee.
Ko e fehu’i leva ki he Palemia, pe ‘oku fakapotopoto nai ‘enau faitu’utu’uni ke toe fakafoki ‘a e fakahoko fatongia fepuna’aki fakalotofonua ki he Real Tonga, lolotonga ia ‘oku ‘iai hono mo’ua lau miliona.
Ka na’e fakahaa ‘e he Palemia ko e taukei ‘oku ‘iai ‘a Tevita Palu ‘i he tafa’aki ko’eni ‘oku mahu’inga ‘aupito ke ne vakai’i ‘a e ngaahi vakapuna ‘a e kautaha ‘oku palopalema. ‘Oku ‘ikai ke sola ki ha taha ‘a e taukei ‘a Tevita Palu ko e ‘enisinia vakapuna pe ia ‘e taha ‘i Tonga ni ko e Palu Aviation pea ko e ta’u lahi ‘ene fakakaungatamaki he mala’e ‘o e pisinisi fepuna’aki vakapuna.
‘Oku ‘oange ‘a e faingamalie ki he CEO fakataimi ko e mahina ‘e 3, kae toki vakai ‘i ‘e he Kapineti pe ‘e hoko atu pe ko e kumi ha taha fo’ou.
