Fakafepaki’i lahi ‘e Lavulavu ‘a e tangi Kalauni he tu’utu’uni ‘a Fakamaau ‘E.Langi
Kuo mahino ‘eni ‘e fakahoko ‘a e tangi ‘a e Kalauni ‘i he tu’utu’uni ‘a Fakamaau ‘Elisapeti Langi, he vaha’a ‘o e Faka’iloa ‘Etuate Lavulavu mo hono hoa. Na’e tuku mai ‘a e tu’utu’uni ‘a Fakamaau Lahi Langi he ‘aho 16 ‘Aokosi ‘i he Fakamaau’anga Lahi ‘i Nuku’alofa.
Na’e tali ‘e Langi ‘a e fokotu’u mei he ongo Lavulavu ko e lipooti ‘Atita na’e fakahoko’aki ‘a e hopo na’e tu’utu’uni ai kena ngaue popula ‘i he 2022, ko e lipooti fanongo talanoa. Na’e kau ‘eni ia he fakalotolahi ki he ongo Faka’iloa mo’ena ongo Fakafofonga Lao neongo ‘oku fakafofonga’i pe ‘e ‘Etuate ia kae fakafofonga’i ‘e Fitilangi Fa’anunu mo Fanga Afu ‘a ‘Akosita, ki he teuaki hono toe fakahoko tu’o ua (retrial) ‘ena hopo ‘o fakatatau ki he tu’utu’uni ‘e he Fakamaau’anga Tangi ‘i he ta’u ni.
Ka kuo fakapapau’i ‘eni ‘e fakahoko ‘a e tangi ‘a e Kalauni ‘o fakafepaki’i lahi ‘a e tu’utu’uni kuo ‘osi fakahoko ‘e Langi.
Na’e fakaha foki ‘e Semisi Lutui ko e Fakahinohino Lao pule ia ‘a e Kalauni ki he Fakamaau’anga, ko e makatu’unga ‘e tolu ‘e fakahoko ai ‘a e tangi ‘a e Kalauni ‘o kau ai ‘a e lipooti ‘Atita, ko e konga pe he ‘Atita na’e na’e ‘iai ‘a e fanongo Talanoa (hearsay) pea ko e konga pe ia ke to’o kae ‘oua ‘e fakata’e’aonga’i kotoa ai ‘a e fu’u lipooti.
Kaekehe na’e tui ‘a Lavulavu he’ene fakamalanga ki he Tu’i Fakamaau Lahi, ke ne fakatokanga’i ange ko e hopo ko’eni ko e ta’u ‘eni ‘e hongofulu tupu talu mei he 2013 ‘a e kamata ‘a e ngaahi ngaue fakalao pea fakahoko ‘a e hopo he 2016. Pea ko e ta’u ‘eni ‘e 10 tupu mei ai.
‘Oku ‘ikai ngata he’ene loloa pea ko e taimi lahi ‘oku lilililiu pe ‘a e fakamo’oni (summary of facts) he taimi kotoa pea ‘oku ‘ikai lava ai ke ma’u ‘a e fakamaau totonu. Pea ko e poini faka’osi na’e faka’ilo ia ki he hopo hia ka ‘oku lahi ‘a e liliu ‘a e ngaahi fakamatala lahi he hopo ‘o hangee ko e tikite na’e faka’ilo ia ki ai ko e kamata, na’e faka’ilo ia ki he tikite ‘e 16 pea toe tamate’i atu ‘a e tikite lahi.
Ka na’e fakahaa ‘e he Tu’i Fakamaau Lahi, ko e ngaahi me’a ‘oku ne lave kiai ‘e vakai kiai he taimi ‘e fakahuu ange ai ‘a e kole tangi ‘a e Kalauni pea mo e tali ‘a’ana ki he ngaahi fokotu’u ‘a e Kalauni, he ‘oku ‘ikai ha’ane fu’u ‘ilo lahi ki he tu’unga na’e ‘iai ‘a e fakatonutonu fakalao ko’eni, ka ko’ene feinga ke tofa atu ha hala ke vave ai ‘a e ngaue ki he ngaahi tu’utu’uni kuo fakahoko kimu’a.
Koe’uhi ko e sitepu mahu’inga ‘eni ki he hopo ‘a e ongo Lavulavu na’e kole ai he ongo Fakafofonga Lao ha taimi fe’unga ke fakahoko ai ‘ena tali ki he kole tangi ‘a e Kalauni. He ka tu’u ma’u ai pe ‘a e tu’utu’uni ‘a Mrs Langi pea ‘oku ‘iai ‘a e faingamalie lahi ‘o e ongo Lavulavu ke ikuna ‘a e hopo.
Ko e fakahuu atu ‘eni ia ‘a e fokotu’u ‘a e Kalauni pea mo e tali ‘a e ongo Faka’iloa ki he Tu’i Fakamaau Lahi ke ne vakai’i pea toki mahino ai pe ‘e tali ke fakahoko ha tangi pe ‘ikai ‘o makatu’unga he ngaahi poini ‘e fokotu’u atu ki he Fakamaau’anga.
