Faka’ataa ongo Pailate Lulutai he SAAB kena foki hoko atu ena ngaue
Kuo faka’ataa he kautaha Vakapuna Lulutai ‘ene ongo Pailate na’e fakahoko fakatongia ‘i he vakapuna SAAB ‘a e kautaha, ‘o hoko ai ‘a e fakatamaki ‘i he mahina Tisema 2023.
Ko hono faka’ataa ko’eni kena foki ‘o hoko atu ‘ena ngaue, ko e ola ia ‘o e fakatotolo na’e fakahoko ‘e ha kau fakatotolo tau’ataina mei ‘Aositelelia ki he fakatamaki na’e hoko. Na’e fakahoko ‘a e fakatotolo ki he ‘uhinga ‘o e faitu’utu’uni ‘a e ongo Pailate. Ko e ‘aho ko’eni na’e folau ai vakapuna SAAB ki Vava’u pea ‘ikai lava o too pea faitu’utuuni ai ongo pailate ke na foki ‘o too ki Tongatapu koe’uhi ko e malu ‘a e kau pasese.
Kae fakatatau pea mo e tali mei he CEO Poasi Tei ki he ongoongo ni, na’e fai pe femahino’aki fakaloto’i ngaue ‘a e kautaha mo e ongo pailate kena ki’i maloloo fakataimi kae lele ‘a e fakatotolo ‘a e kau fakatotolo mei ‘Aositelelia. Pea ko e hili ‘a e fakatotolo na’e mahino na’e ‘ikai ha me’a ia ‘e hala ‘o hangee ko e tukuaki’i na’e fakahoko he Kaniva News. Koe’uhi ko e ola ‘o e fakatotolo na’e fakahoko na’e foki ai pe ‘a e ongo Pailate ‘o hoko atu ‘ena ngaue pea ko e me’a fakafiefia ia ki he kautaha, he na’anau loto ke faka’apa’apa’i ‘a e fakatotolo ‘oku fakahoko.
Kaekehe ‘oku ‘ikai ke toe tuku ha ivi ‘o e kau fakaanga hono feinga ke tukuhifo ‘a e kautaha vakapuna fakalotofonua, ‘o ‘ave ki he kakai ‘oku nau tui kiai, ka ‘oku ‘ikai ha holomui ‘a e pule’anga ki he ngaahi fakaanga.
‘Oku hoko ‘a e ongoongo ko’eni kuo tuku mai mei he CEO ‘o e Lulutai ke fakamahino ai ‘a e tu’unga ‘o e ngaahi tukuaki’i kuo fakahoko. Na’e tukuaki’i he taha ‘o e ngaahi kautaha ongongo (Kaniva) ngali na’e palani lelei ke tamate’i ‘a e ngaahi me’a he blackbox ko e ki’i me’angaue ‘oku lekooti ai ‘a e me’a kotoa ‘oku hoko he vakapuna, ‘o fakatatau mo e lipooti ki he fakatotolo na’e fakahoko.
Na’e iku ke tuku atu ai ‘e he Minisita ki he Fefononga’aki (Transportation) ‘a e ongoongo tukuatu ke fakamahino ki he kakai ‘o e fonua, koe ngaahi fakamatala kuo tuku atu ‘e he Kaniva ‘oku loi pea takihala’i.
Na’e toe tuku atu mo e fakatokanga ki he Kaniva ke fakatonutonu ‘enau ongoongo pea ka ‘ikai tenau iku ki he fakamaau’anga ke ‘eke’i ‘a e ngaahi fakamatala.
Ka na’e malie ‘a e fakahaa mei he Kaniva, ke faka’ilo ‘oku ‘ikai kenau tokanga kinautolu kiai he ‘oku nau ma’u pe ‘enau ‘a e fakamo’oni mei he lipooti, ‘oku tukuakii ngali na’e palani hono tamate’i ngaahi lekooti he puha tauhia’anga fakamatala.
