Fakaafe’i he Minisita FaleAlea Nu’usila ‘a Tatila Fonua Helu (ako Toketaa) ki Wellington, makatu’unga he’ene vitio(documentary) he ‘initaneti
Na’e tatau mo e ha ‘a e fiefia ‘a e famili ‘o Tatila Fonua Helu mei Ta’anea mo Ha’alalo kae nofo Pukekohe, ‘i he ma’u ha fakaafe mei he taha ‘o e kau Minisita ‘a Nu’usila ko Hon Peeni Henare. Ko e Minisita ki he Taumalu’i Fonua,Takimamata, Vaotaa, Veterans pea tokoni Minisita ‘i he potungaue ‘Atakai Whanau Ora, ko e potungaue ‘oku nau tokanga’i ‘a e uelofea ‘a e kakai ‘o Nu’usila mo e kakai mei he Pasifiki pea tokoni Minisita ki he Minisita Mo’ui.
Na’e makatu’unga ‘a e fakaafe ko e mamata ‘a e Minisitaa ‘i he fo’i documentary ‘a e Pacifika Medical Association Group ‘oku ‘iloa ko e Papaali’i Dr Semisi Ma’ia’i Scholarship.
Ko Tatila ko e taha ia ‘o e fanau Tonga tokosi’i mei he Pasifiki ‘oku nau ako Toketaa ki he tafa’aki ‘o e mo’ui ‘i Nu’usila pea ‘oku ‘ikai ke sola ‘a e mamafa ‘o e totongi ako ki he ako Toketaa mo’ui. Ka na’e talunga mo e ngaahi sikolasipi kehekehe na’e tohi kole kiai ‘o tokoni ke fua ‘ene ako ‘o kau ai ‘a e sikolasipi mei he PMA.
Pea koe’uhi ko e ola lelei ‘ene feinga ako, na’e fa’u ai he PMA ‘a e ki’i vitio ki he hala fononga ‘o e ako ‘a Tatila ‘aia ‘oku ‘amanaki ke ne ‘osi he ta’u fo’ou mei he Otago Medical School, ko e lava ia a e ta’u ‘e 7 ‘ene feinga ako.
Ko e fo’i documentary na’e fa’u na’e ‘ova he 500 tupu hono share pea a’u ki he tahakilu tupu hono view. Na’e mamata ai heni ‘a Hon Henare ‘one sai’ia ai pea faka’ohovale ko e fakahoko ange ‘e he’ene sekilitali ki he Whanau Ora na’e kau he kau mentor kia Tatila ‘i Otago pea ne fekau ai ke fakahoko ‘a e fetu’utaki kia Tatila.
Fakatatau ki he fakamatala a Tatila ki he ongoongo ni, “na’e fakahaa ange ‘e he’ene mentor ka ko e sekelitali, ko e faingamalie ko’eni ‘oku hahalomofia ke hoko he ‘oku puna mai pe Minisita mei ‘Okalahi ki Wellington kena fakataha pea foki. Ka na’e to’oa loto Minisita he ki’i vitio documentary pea ko e ‘uhinga ia na’ane fakahoko ai ‘a e fakaafe.”
Na’e pehee ‘e Tatila ki he ongoongo ni ‘o fakatatau mo e talanoa mo e Minisita,” ko e me’a na’e tokanga makehe kiai, koe’uhi ko’ene fo’i vitio na’e ‘ikai ke talanoa ia ki he’ene lavame’a he ako Toketa, kae fakamatala ia ki he tupu’anga masiva mo faingata’a na’e fononga pea ‘oku lolotonga ‘iai mo hono ki’i famili. Pea ‘i hono fatongia ko e Minisita ki hono tokanga’i ‘a e welfare ‘a e kakai mei he Pasifiki na’e loto ai ke na fakataha pea ke ne tokoni ha fa’ahinga tafa’aki pe, koe’uhii ko e mahu’inga kiai ‘ene lotolahi mo e feilaulau, kau tautefito ki he tafa’aki ‘o e Toketa mo’ui, ‘oku ‘ikai ke fu’u tokolahi ai ‘a e fanau mei he Pasifiki.”
Kaekehe ko e faingamalie ‘eni kia Tatila pea pehee ki he’ene fine’eiki Losa Fonua Helu, ke ‘oange ‘a e ngaahi fiema’u vivili ki he teuteu koia ‘a Tatila ke hoko atu ‘ene feinga ako he tafa’aki ‘o e mo’ui.
Ko Tatalia ko hono ta’u 23 ‘eni, na’e ako hake pe ‘i Tonga ni he Maamaloa Side School pea mei ai ki he GPS Fanga ‘o Pilolevu pea mei ai ki he Tonga High School (2011-2013)‘o form 3 pea nau hiki atu ki Nu’usila ‘i he 2013. Na’ane huu ai ki he Pukekohe High School 2013-2015 pea mei ai ki he McAuley High School ‘one ‘osi ‘i he 2017 pea kau he toko tolu na’anau ma’u faingalie ki he sikalasipi ako Toketaa ki he Otago University. Pea ‘oku ‘amanaki ke ne fakakakato ‘ene ta’u faka’osi mo foaki ai pe hono faka’ilonga fakaako ki he tafa’aki ‘o e mo’ui he ta’u fo’ou. Ka te ne ‘i Tonga he mahina ko Tisema he mahina ‘e 3 ko e konga ‘ene fakakakato ‘ene ngaahi pepa ki he ta’u fo’ou.
‘I he’ene huu ki he Otago University na’ane ako ai he ngaahi va’a kehekehe ‘a e ‘univesiti he ngaahi ta’u ko’eni ‘o faka’osi ki he ta’u fo’ou.
2018 – 2020 Otago Dunedin Campus
2021 – Otago Christchurch Campus
2022 – RMIP Wairarapa Region
2023 – Otago Wellington Campus
2024 – Otago Christchurch Campus
