Na’e fe’unga mo e $30 tupu miliona ngaahi naunau tanuhala mei Siaina, fiu hono ‘eke pe ‘oku ‘ife’ia: Hon Semisi Sika
Kuo fakahaa ‘e Hon. Semisi Sika ki he ongoongo ni, ko e me’a ngaue na’ane me’a kiai ‘i he Konifelenisi mo e kau Faiongoongo, na’e fe’unga pea mo e $30 tupu miliona hono mahu’inga pea ko e ngaahi me’a ngaue mamafa ‘e teau tupu. Pea na’e fakataumu’a ‘ene kole ‘a e ngaahi me’angaue ‘i he taimi na’ane ‘i he MOI ai kimu’a pea mole hono sea he fili ‘o e 2021, ke tanu kotoa ‘aki ‘a e ngaahi hala. Pea kau ai mo e ngaahi hala kolo ‘o Nuku’alofa mo e ngaahi kolo ki ‘uta mo e ngaahi hala ‘uta ngoue ko e fiema’u vivili ‘o e kakai ‘o e fonua.
Ka ko e pango he’ene foki mai ‘a’ana ko’eni, ‘oku fiu ia hono ‘eke ‘a e konga lahi ‘o e ngaahi me’a ngaue pea ‘oku ne kei fakaongoongo ki he kau ngaue ‘o e Potungaue, ke ‘omi ha tali. Ka ‘oku ngalingali na’e faitu’utu’uni ‘a e ngaahi pule’angakimu’a ki he ngaahi me’angaue ki he’enau ngaahi ngaue, kae tuku ‘a e palani fakalukufua na’e taumu’a kiai ‘a e ngaahi me’a ngaue.
Na’e toe fakahaa ‘e Hon. Semisi Sika, “ ‘oku ne loto lahi ke tanu‘a e ngaahi hala, he ‘oku ‘iai ‘a e ngaahi fu’u maka ‘a e pule’anga ke fakahoko ‘aki ‘a e ngaue. Pea ko e taha, ko e valau he tanuhala he taimi ki he taimi pea ‘oku totonu ke fai mo fakahoko ha ngauekiai.”
Kaekehe ‘oku fakaloloma ‘a e tu’unga kuo a’u kiai ‘a e ngaahi me’a ngaue ‘oku ‘uhinga kiai ‘a e Minisita, ke fiu hono ‘eke ki he kau ngaue pea ‘oku ‘ikai kenau ‘ilo pe ‘oku ‘ife’ia. Pea ‘oku kau iahe tali fakavalevale, ke ‘eke ha koloa ‘a e Pule’anga ‘oku ‘ikai ke ‘ilo ia ‘e he kau taki ‘o e potungaue koia.
\‘Oku ‘ikai fa’a tokanga’i ‘a e ki’i kakai mahu’inga he ngaahi Potungaue ‘o hange ko e CEO pea mo e kau taki (Senior) fakava’a (department). Ko e ni’ihi ‘eni ‘oku fakalele ‘a e Potungaue. ‘Oku fetongitongi ‘a e kau Minisita ka ko e ni’ihi ‘eni ‘oku nofo ma’u pea ‘ilo lelei ki he anga honofakalele ‘o e ngaahi Potungaue. ‘Oku ‘iai honau malohi ke ‘io mo ‘ikai ki he kau Minisita koe’uhi ko’enau taukei. Ka ko e me’a ki he tali ‘io he taimi kotoa pea ‘e ‘alu mo e Minisita kitu’a ka koia leva ‘e holofa kiai ‘a e ngaahi tukuaki’i.
Pea ko e fehu’i mahu’inga ia he taimi ni, pe kohai ‘oku ne tokanga’i ‘a e ngaahi me’angaue misini tanuhala ‘a e Potungaue, koeha ‘oku ‘ikai ai ha’ane ‘ilo ki he fiema’u he Minisita pe ‘oku ‘ife’ia ‘a e ngaahi me’angaue ke ‘ave ha tali vave. ‘Oku fakavalevale he ‘oku ‘ikai ko ha ‘eke ha peni mo ha pepa ka ko e fu’u me’angaue mamafa, he ‘ikai lava ‘e he taha ‘o fa’o hono kato ke fiu kumi.
‘Oku ‘iai e tui ‘e malie ‘a e fetakai ko’eni pe ‘oku ‘ife pea kohai na’ane ‘ave mo e ‘uhinga na’ane ‘ave. Kae kanoni’aki pe na’e fakalao hono ‘ave pea tukukehe ange kapaukuo foaki pe fakatau ia ki ha kautaha.
