‘Ikai tali tangi (voir dire) taha kau Faka’iloa faito’o konatapu tukuaki’i na’e ta’efalala’anga founga ngaue kau Polisi.
Na’e ‘ikai tali ‘e he ‘Eiki Fakamaau Lahi, LCJ Malcon Bishop KC ‘i he ‘aho 9 Sepitema ‘a e ta’efiemalie (voir dire) ‘a e ongo Faka’iloa mei he toko 9 ‘oku faka’ilo ki he faihia faito’o kanotapu kalasi A, ko Tevita Elone Tu’i’ile’ila Shoji mo ‘Eneasi Taumoefolau. Ka kuo holomui ‘a ‘Ene’asi mo’ene fakafofonga kae hoko tokotaha atu pe ‘a Tevita Shoji mo’ene fakafofonga Ms Aleamotu’a.
Ko e fokotu’u mei he Faka’iloa na’e ta’efalalala’anga ‘a e founga ngaue ‘a e kau Polisi ‘o fakatatau mo’enau founga tu’utu’uni ngaue. ‘Oku ‘uhinga ‘eni ki he ngaue’aki he kau Polisi ‘a e me’ataumo’ui ki hono fana’aki ‘a e me’alele ‘o e kau tila pea mo hono fakamanamana’i’aki ‘a e me’afana kuo fakamahafu.
Ka na’e ‘ikai tali ‘e he Fakamaau ‘a e ngaahi ta’efiemalie ko’eni pea ‘e pau ke hoko atu ‘a e hopo mo e Faka’iloa mo e toenga na’e tali ‘e he Fakamaau’anga ‘oku ‘iai ‘a e hopo ke fai.
Fakatatau mo e ngaahi fakamatala na’e ‘ohake, na’e fakahoko ha tila he ‘api ‘o ‘Eneasi Taumoefolau ‘i Tofoa. Ko e taimi ko’eni kuo ‘osi ma’u kotoa ia he me’afaitaa (drone) ‘a e kau Polisi ‘a e me’akotoa ‘oku fakahoko he ‘api ‘o Taumoefolau.
Na’e ‘ilo he kau Polisi ‘oku ‘iai ‘a e tokotaha Faka’iloa ko’eni ko Tevita mo ‘Eneasi pea pehee ki he tokotaha ko Joseph Taufa. Na’e ‘alu atu ‘a Joseph ‘i he veeni Voxy lanu ‘uli’uli ‘o to’o atu ‘a e me’amei he veeni ‘o fa’o ki he me’alele ‘a Taumoefolau pea fetuku holo ‘a e ngaahi kofukofu ‘i he ‘uu me’alele he ‘api.
Kaekehe na’e ‘ohovale ‘a e kau tila kuo huu atu ‘a e me’alele ‘a e kau Polisi mo e kau ‘ofisa kuo ‘osi teunga mo fakamahafu kakato. Na’e feinga ‘a e Joseph ke hola ka na’e fana he kau Polisi ‘eneme’alele ‘o tu’u pea kamata hola mo Taumoefolau ka na’e ta’ofi ‘aki he kau Polisi ‘a e me’afana. Ka na’e kalo ‘a Tevita ‘oku ‘ikai ha’ane kaunga ‘e taha ki he tila ‘oku fai, ko’ene ‘iai ‘a’ana ko e tokotaha ngaue ‘a ‘Eneasi na’e fai ‘ene fokotu’u papa tu’uaki.
Na’e puke he kau Polisi he ‘aho koia ‘a ‘Eneasi Taumoefolau, Tevita ‘Elone Shoji mo Joseph Taufa ‘o fakahuu. Ka ‘oku loto ‘a Joseph ke fakamo’oni ma’ae kau Polisi.
Ko e tukuaki’i ‘e Tevita ‘a e founga ngaue ‘a e kau Polisi ‘oku ‘ikai tali pea ‘oku ne kau he ni’ihi kuo tu’utu’uni he Fakamaau’anga Lahi, ‘oku ‘iai ‘a e hia mo e hopo ke fakahoko.
‘Oku kau pe foki ‘eni he tekiniki ‘oku ngaue ‘aki he kau faihia ko hono feinga’i ke fuoloa ‘a e taimi faka’aho ‘a e hopo, kae feinga ‘enau fakafofonga lao ha fa’ahinga me’a, ke lava ‘o fakahaofi ‘akikinautolu mei he Fakamaau’anga. Ka ko e totonu ke ‘eke’i ‘a e founga ngaue ko e totonu ia ‘a e kau Faka’iloa, koe’uhi ke ‘oua na’a hoko ha fa’ahinga set-up ‘a e kau Polisi ke fihia ai ‘a e kau Faka’iloa, ka ko ha hopo ‘oku ‘iai ‘a e faitotonu mo e founga ngaue totonu pea ma’u mo e fakamaau totonu.
