Faka’ilo Sivile ‘e he Takiama Media (Lavulavu) ‘a e PM, tu’utu’uni ‘Eiki Fakamaau ‘oku ta’efakalao tu’utu’uni Palemia ke ta’ofi ‘a e FM88.1 mei he Press Conference
Kuo hikihiki too ‘a e ta’efemahino’aki ‘i he vaha’a ‘o e Takiama Media ‘a ‘Etuate Lavulavu pea mo e Palemia ‘o Tonga, ki he tu’unga kuo ala mai ‘a e Fakamaau’anga ke faitu’utu’uni.
‘I he uike kuo’osi kuo faka’ohovale hono tuku mai ‘e he ‘Eiki Fakamaau’anga ‘o Tonga ‘ene tu’utu’uni, ke fakavavevave ‘a e ‘ofisi ‘o e Palemia ke fakahoko ha Konifelenisi mo e kau Faiongooongo. Ko e taumu’a ‘o e Konifelenisi ko’eni, ke fakahaa ai pea he ‘ikai toe hoko atu ‘a e tu’utu’uni ‘a e Palemia ke ta’ofi ‘a e kau ngaue ‘a e Takiama Media ki ha fakataha ‘a e Palemia ‘e fakahoko mo e kau Faiongoongo.
Pea kapau ‘oku ‘ikai ke mahino kiate kinautolu ‘a e tu’utu’uni kuo fakahoko pea kenau fetu’utaki ki ha’anau Fakafofonga Lao ke fale’i kinautolu ki he tu’utu’uni kuo ‘oatu.
‘I he taimi tatau ‘e toe haa ‘a e ongo tafa’aki ‘i he Fakamaau’anga ‘i he ‘aho 11 Sepitema. ‘Oku faka’ilo ‘e Lavulavu ‘a e Palemia ko e Faka’iloa fika ‘uluaki pea mo e Pule’anga Tonga ko e Faka’iloa fika ua.
Ko e tu’u foki ki he faka’ilo sivile ko e ‘eke totongi huhu’i ki he maumau ‘oku tui ‘a Lavulavu na’e hoko mei he faitu’utu’uni ta’efakapotopoto ‘a e Palemia. Pea ‘oku ‘ikai lave’i koeha ‘a e lahi ‘o e pa’anga ‘oku ‘eke’i ‘e he Takiama Media mei he Palemia mo e Pule’anga Tonga.
Ko e fakaikuiku mai ‘eni ‘o e fetukuaki ‘a e Palemia mo e kautaha ongoongo ‘a Lavulavu ki he ngaahi mo’oni’i me’a fekau’aki mo e langa hala fakakavakava pea mo e langa ‘a e MEIDEC ‘i he konga kelekele ‘o e Tu’i ‘i Matatoa. Na’e fakalalahi hono tukuaki’i ‘e Lavulavu ‘a e palopalema ki he Palemia lolotonga, ka na’e faka’ikai’i mamafa ‘e he Palemia. Ka na’e hoko ia ke tuku atu ‘e Lavulavu ‘a e ngaahi fakamo’oni lahi ke ne ofe’i ‘a e kakai tokolahi ke tui ki he’ene ngaahi fakamatala.
Koe’uhi ko e ki’i vevela ki he Palemia ‘a e ngaahi fakamo’oni mo e ngaahi tukuaki’i, na’ane faitu’utu’uni ai ke toe tuku atu ‘e he taha ha fakamatala ki he media pea ta’ofi ‘a e kautaha Takiama mo Lavulavu mo’ene kau ngaue, ke toe kau ange ki ha’ane Konifelenisi mo e kau Faiongoongo.
Na’e hoko ‘eni ke fakahoko ai ‘e Lavulavu ‘ene tohi tangi ki he Tama Tu’i ko e ta’efiemalie ki he founga ngaue ‘a e Palemia. Pea ko e fakamuimuitaha ‘eni ko hono faka’ilo sivile pea faka’ilonga lelei mo e tu’utu’uni ke ‘oua na’a toe ta’ofi ‘a Lavulavu mo’ene kau ngaue mei he Konifelenisi ‘a e Palemia mo e kau Faiongoongo.
‘Oku hoko ‘a e fo’i ta’ofi ‘o e mitia ke toe foki ‘a e manatu ‘a e kakai ki he taimi na’e fakaehaua ai ‘e he pule’anga ‘a e mitia he 1990 ‘o fai mai ai. Na’e a’u ke fakahuu ai ‘a e taki ‘o e teke liliu ‘Akilisi Pohiva mo Kalafi Moala mo e kau tangata mitia he taimi koia pea ta’ofi ke toe tufa ‘a e nusipepa Taimi ‘o Tonga. Ko e taimi ‘eni ne kei fakafalala ai ‘a e ma’u’anga ongoongo ‘a e kakai ‘i he nusipepa.
Ko e me’a malie ‘e taha, ko e fakahaa ‘e he Kautaha ‘o e kau Faiongoongo ‘a Tonga ‘oku fa’iteliha pe Palemia ki he’ene Konifelenisi pe kohai ‘e kau kiai. Ka ‘oku talamai ‘e he Fakamaau’anga ‘oku ‘ikai ha me’a pehee. Ko e tu’utu’uni ‘a e Palemia kuopau ke fakahoko ‘o fakatatau ki he lao.
