Tali ‘Eiki Fakamaau Lahi fokotu’u mei he kau Faka’iloa (Pangike Pule) ke tamate’i tohi faka’ilo kau Mamahi (Pangike Fakalakalaka) ‘ikai ha makatu’unga malohi
Na’e tali ‘e he ‘Eiki Fakamaau Lahi LCJ Bishop ‘i he ‘aho Falaite ‘o e uike ni 7 ‘Okatopa, ‘a e tohi fokotu’u mei he kau Faka’iloa(Lord Sevele ‘o Vailahi, Kovana Tatafu Moeaki mo e Pangike Pule ‘o Tonga) ke kaniseli ‘a e fo’i faka’ilo mei he kau Mamahi (Peni Vea, CEO ‘Emeline Tuita mo e Pangike Fakalakalaka ‘a Tonga).
Ko e fokotu’u ‘eni ‘a e kau Faka’iloa mo’enau fakafofonga lao hili ‘enau ma’u ‘a e tohi faka’ilo mei he kau Mamahi pea na’anau tui ‘oku ‘ikai ha makatu’unga malohi ke fakahoko ai ha hopo.
Ka ‘i hono vakai’i ‘e he ‘Eiki Fakamaau Lahi ‘a e fokotu’u mei he kau Faka’iloa, na’e tui pea tali ‘oku ‘ikai ha makatu’unga malohi ke fakahoko ha hopo.
‘I he taimi tatau na’ane fakahaa ki he taha ‘o e kau Mamahi na’e ‘i he Fakamaau’anga Peni Vea ko e Sea maloloo ‘o e Poate Pangike Langa Fakalakalaka, ‘oku ‘iai pe faingamalie ke toe fakahuu mai ‘enau tohi faka’ilo ka ‘oku mahu’inga ke ‘iai ha fakafofonga lao ke ne vakai’i fakalelei ‘enau tohi faka’ilo. Pea ‘oku ne ‘ilo ‘oku ‘ikai ko ha’ane fo’ui ‘i he tu’unga ‘oku ‘iai ‘a e tu’utu’uni, ka ko e ni’ihi na’anau fakahoko ‘a e ngaue kiai.
Kaekehe na’e toe fale’i he ‘Eiki Fakamaau Lahi, ki he tafa’aki ‘a e Mamahi na kuo taimi kenau fakakaukau mo vakai lelei pe ‘oku kei ‘aonga ke hoko atu ‘a e fakatonutonu fakalao, he ko’ene hoko atu ko e taimi lahi, ngaue lahi pea fakamole lahi ‘e fakahoko ka he ‘ikai ha ‘aonga ‘e taha ki he fonua. Na kuo taimi ke tuku kimui ‘a e me’a kotoa kae hoko atu.
Na’e fakmahino ‘e he ‘Eiki Fakamaau Lahi ko’ene fale’i ka ‘oku ‘ikai ko e konga ia ‘ene tu’utu’uni.
Ko e fakatonutonu fakalao ‘eni ki he tohi mei he Kovana ‘o e Pangike Pule ki he Pangike Fakalakalaka, ke ‘oua na’e toe kaunga ‘a e CEO ‘Emeline Tuita ki ha ngaue ‘a e pangike. Na’e hoko ‘eni ke faka’ilo ai ‘e he CEO ‘a e ngaahi kautaha ongoongo ‘e ni’ihi ko hono tuku kitu’a ‘a e fakamatala mei he Pangike Pule.
Na’e tuku kitu’a mo e Sea ‘o e Poate Peni Vea, ‘aia na’e makatu’unga mei ai ‘a e faka’ilo na’e fakahoko ki he ngaahi tu’utu’uni na’e fakahoko. Na’e a’u ki he tu’unga kuo fakahuu mai ‘e he pule’anga fo’ou ‘a e pangike Langa Fakalakalaka ‘a ‘Esia kenau vakai’i ‘a e ngaue ‘a e pangike langa Fakalakalaka pea kuo maau ‘a e ngaue kae ‘oku fakatatali ki he lipooti.
Ka ko’ene tu’u ko’eni ko e fakatatali pe koeha ‘a e faitu’utu’uni ‘a e kau Mamahi ki he’enau hopo, pe ko e kumi ha fakafofonga lao ke fatu fo’ou ‘a e tohi faka’ilo pe ko’enau muimui ki he fale’i mei he ‘Eiki Fakamaau Lahi kenau vakai fakalelei pe ‘oku totonu ke kei hoko atu pe ‘ikai.
‘Oku tukuaki’i kuo a’u ki he lau miliona ‘a e fakamole ki he totongi loea he fakatonutonu fakalao. Kuo ‘iai ‘a e fokotu’u mei he kakai ‘o e fonua ke ‘oua na’a toe faka’ataa ‘a e kau taki ‘o e fonua kenau kumi loea mei tu’a kae totongi he kakai ‘o e fonua.
