Fanongonongo Potungaue Savea mo e Fonua ke ‘oua toe tu’u ‘a Semisi Moala ki honau ‘api ngaue
Ko e me’a faka’ohovale ki he ongoongo ni ‘ene huu atu ki he ‘ofisi ‘o e Potungaue Fonua ‘i he hala One Way, ‘oku fakapipiki mai ai ‘a e fanongonongo fakataha mo e la’itaa ‘o e tokotaha ngaue ma’olunga ko Semisi Moala.
Ko e Fanongonongo ki he kau ngaue mo e kau le’o (security) ‘a e Potungaue, ‘oku tapui ‘aupito ke toe huu ange ‘a e tokotaha ni ki ha feitu’u he ‘api ngaue pe ‘ave ha me’a mei ai, kae tukukehe ange ‘a e kanita talitali kakai ko ha’ane faka’eke’eke me’a fakavavevave pea ko ha kole ‘apoinimeni, ka ko e CEO pe, pe Minisita te ne fakangofua. Na’e kamata lau ‘a e fanongonongo ke ngaue’aki ‘i he ‘aho 24 Sune 2026.
Pea ko e tu’utu’uni ki he kau le’o, kanau ma’u ‘a e tokotaha ni ha fa’ahinga feitu’u pe he ‘api ngaue pea ke puke ‘o fakavahe’i he vavetaha. Na’e ‘oatu mo e fakatokanga mamafa ki he kau ngaue, ka ‘iai ha taha ‘e ma’u ‘oku ne fakaafe’i pe fetu’utaki mo Semisi Moala ki ha ngaue me’a fakangaue pea kuopau ke fakahoko hono tautea.
Ko Semisi Moala ko e ‘ilo kiai ‘a e ongoongo ni, ko e taha ia ‘o e kau ‘ofisa ma’olunga he Potungaue, ‘oku ne fa’a haa he Fakamaau’anga ‘i he ngaahi hopo ‘a e Potungaue mo e kakai ‘o e fonua. Pea na’ane fa’a fakahoko ‘a e ngaue fakafofonga ma’ae taha ‘o e kau Nopele ma’u tofi’a.
Koe’uhi ko e fu’u mafatukituki ‘o e fanongonongo, na’e ‘oatu ai he ongoongo ha tohi fehu’i ki he email faka’eke’eke ‘a e Potungaue pe koeha nai ‘a e ‘uhinga hono ta’ofi ‘o Semisi Moala mei he ‘api ngaue. Kae fakatatau mo e fanongonongo, ko e tokotaha ni ko e tokotaha ngaue maloloo (former emplyer). Ka ‘oku ‘ikai ‘iloo pe na’e ‘osi maloloo ‘a e tokotaha ni pe na’e foki fakamaloloo’i pe pea tuku mai ‘a e fanongonongo.
Kaekehe ‘i he’ene a’u mai ki he taimi ni ‘oku te’eki ke tuku mai he Potungaue ha tali ki he ‘uhinga ‘enau Fanongonongo. Ka ‘i he anga ‘o e vakai ki he fanongonongo ‘iate pe, ‘oku hange na’e ‘iai ‘a e hia mamafa na’e fakahoko he tokotaha ni ‘i he Potungaue.
‘Oku kau ‘a e Potungaue Savea ‘i he potungaue fakahoko fatongia ma’ulalo taha ‘i he ngaahi potungaue ‘a e Pule’anga. Ko e lahi ‘a e launga ‘a e kakai henau ngaahi me’a fakakelekele ‘ene ta’emaau. Pea ‘oku toe tukuaki’i lahi ‘a e ta’emaau mo e ngaue kakaa ‘a e kau ngaue he loto’i Potungaue, koe’uhi ko hanau famili mo e maheni pea pehee ki he totongi pa’anga mei he kakai ‘o e fonua.
‘Oku toe fakaloloma ko e pa’anga lahi ‘o e tukuhau ‘a e fonua ‘oku mole ko e totongi huhu’i ki he kakai kehekehe, koe’uhi ko e ngaue hala mo ta’etotonu na’e fakahoko ‘e he Potungaue ki he ngaahi ‘api lahi.
Ka ‘i he vakai ki he Fanongonongo ko’eni ‘oku toe fakatupu fifili ki he kakai ‘o e fonua ‘a e tu’unga ‘o e Potungaue ni pea mo’ene kau ngaue pea pehee ki he ngaahi tukuaki’i mamafa ‘oku lahi hono fakahoko kiate kinautolu.
‘I he fakatalanoa ‘a e ongoongo oni ki he taha ‘o e kau Loea ‘iloa he fonua ni, na’ane pehee ko e tu’u ‘a e fo’i Fanongonongo ‘oku malava pe ke faka’ilo fakalao ‘e Mr. Moala ‘a e Potungaue pea ko e me’akehe ‘a e ola ia. He ‘oku nau ‘osi tukuaki’i pe tokotaha ni te’eki ‘iai ha’ane tali ki he tukuaki’i pea ko e sio ‘a e kakai ki he Fanongonongo ‘oku nau ‘osi fakakaukau na’e fakahoko he tokotaha ni ha kovi he Potungaue.
