Toko 71 kau kanititeiti kenau veipa ki he Sea 17 ‘a e kakai ki Fale Alea, toko 18 kau Nopele ki he Sea ‘e 9
‘I he ‘osi ange ‘a e taimi ke lesisita kiai ‘a e kau Kanititeiti fili Fale Alea ki he ta’uni, kuo lesisita ai ha toko 71 kenau veipaa ki he Sea ‘e 17 ‘o e kau Fakafofonga Kakai.
Ko Tongatapu mo e vahenga fili ‘e 10 ‘oku ‘iai ‘a e kau Kanititeiti ‘e toko 42.
Ko Vava’u mo e vahenga fili ‘e 3 ‘oku ‘iai ‘a e kau Kanititeiti ‘e toko 10.
Ko Ha’api mo e vahenga fili ‘e 2 mo e kau Kanititeiti toko 11.
Ko ‘Eua mo e Sea ‘e 1 mo e kau Kanititeiti toko 4.
Ko e ongo Niua mo e Sea ‘e 1 Kanititeiti toko 4.
‘I he tepile ‘o e kau Nopele ko e toko 18 fakakatoa na’e lesisita kenau veipaa ki he Sea ‘e 9 ‘o e kau Fakafofonga Nopele.
Ko Tongatapu mo e Fakafofonga Nopele ‘e toko 3 mo e kau Kanititeiti ‘e toko 6.
Ko Vava’u mo e Fakafofonga Nopele ‘e toko 2 mo e kau Kanititeiti ‘e toko 4.
Ko Ha’apai mo Fakafofonga Nopele ‘e toko 2 mo e kau Kanititeiti ‘e toko 3.
Ko ‘Eua mo e Fakafofonga Nopele ‘e toko 1 mo e kau Kanititeiti ‘e toko 4.
Pea ko e ongo Niua mo e Fakafofonga Nopele ‘e toko 1 mo e Kanititeiti pe ‘e tokotaha pea kuo mahino Sea ia ‘o Niua ko Lord Fotofili, he koia tokotaha pe na’e lesisita mei he ongo Niua.
Ko e fili ‘o e 2021 na’e fe’unga mo e toko 76 fakakatoa na’e lesisita fili, ‘aia ‘oku holo ‘aki ‘a e toko 5 pea ‘oku ‘ikai ha fu’u faikehekehe fefee. He na’e ‘iai ‘a e tokanga ki he ‘ikai fu’u loko ‘asi mai ha kau kanititeiti kimu’a he teuteu ‘o e fili, ka ‘oku faka’ohovale ‘a e fika ‘oku ma’u ‘oku ‘ikai ha faikehekehe lahi mei he fili ‘o e 2021. Ka ko e me’a kuo ‘osi mahino ko e tuai ‘a e ngaahi kemipeini. Ka tau vakai ange ki he tu’unga ‘o e kemipeini ‘i he mahino ko’eni ‘a e kau Kanititeiti pe koeha hono tukunga.
‘Oku faka’ohovale ‘a e tokolahi ‘o e ngaahi vahenga ‘e ni’ihi hangee ko Tongatapu 6, na’e toko ua pe ‘i he fili he 2021 pea lolongo mo e ta’u ni ka ‘oku faka’ohovale ‘a e ‘asi mai ko e toko 6. Ko e malie ko e toko 3 ai mei he kolo pe ‘e taha ko ‘Utulau ‘oku ‘ikai ko ha kolo lahi fefee.
Ko e me’a tatau ‘oku ‘asi mei Tongatapu 8 ko e toko 5 mei he toko 7 fakakatoa ko e kau fili mei Vaini. Pea ko Vaini ko e kolo kau fili tokolahitaha ia pea ‘oku mahino ‘e vahevahe ‘a e kolo henau kau Kanititeiti.
‘Oku toe malie ange ‘a e ongo vahenga fili ‘e 2 ko Tongatapu 2 mo Vava’u 16 ‘oku taki toko 2 pe pea ko e ‘ai’ai ma’a pe pea ‘oku toe malie ko e kau Kanititeiti fefeka ‘o ‘ikai ha taha ‘e mahino. Ko Tongatapu 2 ko e Minisita Ako mo e Fonua, ka ‘oku pole’i ‘e Misi Sika pea ‘oku ‘ikai puli ‘a e mafi ‘o Misi Sika ki ha taha, hono hisitolia fakapolitikale mo e tu’unga fakapa’anga ki he kemipeini.
Ko Vava’u 16 ko e ongo Minisita malolo fakatou’osi pea na ha’u pe mei he kolo talaa ko Lama (Leimatu’a) pea ko e ongo famili ofi loua. Kae hangee ko e fakahua ‘o e mala’e ‘akapulu ko e toki lau famili pe mo maheni he ‘osi ‘a e fili Fale Alea.
Ko e kau Nopele ‘oku ‘osi mahino ‘a e Fakafofonga Nopele ki he ongo Niua he ko e tokotaha pe na’e lesisita kiai ko Lord Fotofili.
‘Oku faitatau pe ‘a e kau Kanititeiti Fakafofonga Kakai mo e Fakafofonga Nopele ‘oku ‘iai ‘a e kau fo’ou ‘aupito pea ‘iai mo e ni’ihi ko e toutou heka mai pe he vaka tatau, ka ‘oku ‘ikai pe ha holomui.
Ko e fili ‘oku fakahoko he ‘aho 20 ‘o Novema pea ‘oku toe pe taimi si’i pea fakahoko ‘a e fili, ka ‘oku ‘iai ‘a e tui ‘e fefeka ‘a e ngaahi kemipeini koe’uhi ko e vave mo nounou ‘a e taimi. Ka ‘oku mahu’inga taha ki he kakai ‘o e fonua kenau fanongo fakalelei ki he ngaahi fakamalanga pea nau fili fakapo
