Mate toko 16, ofi e mole ‘i he $150 piliona ngangau ‘ulu ngaahi kautaha malu’i he vela lahi ‘i LA
‘I he ‘alu ke uike kakato ‘e taha ‘a e vela lahi ‘i he kolo talaa ‘o ‘Amelika ko Losi ‘Enisolosi pe ‘oku taku ko e kole ‘o e fanga ‘angelo, kuo mahino mai ‘eni kuo pekia ‘a e toko 16, tukukehe ange ha ni’ihi kuo pekia ka ‘oku te’eki ke ‘ilo.
‘Oku fakafuofua ko e fakamole ki he maumau kuo ‘osi fakahoko ‘e he afi ki he pa’anga ‘e 135-150 piliona pea ‘oku fakapapau’i ko e vela maumau lahitaha fakapa’anga ‘eni he hisitolia ‘o ‘Amelika.
‘I he taimi tatau kuo si’i fetukutuku ai ha toko 150,000 mei honau ngaahi ‘api, ‘i he vela lahi ko’eni kuone kapa ‘a e ‘eka ‘e 39000. Na’e kamata ‘a e vela ‘i he ‘aho 7 Sanuali 2025 ‘i he Pacific Paradise ofi ki Malibu pea toki mafola mei ai ki Brentwood. ‘Oku ‘iai mo e feitu’u ko Eaton ‘oku kau moia he vela ‘i LA pe moia ‘aia ‘oku ne kaunga ki he fu’u vela lahi kuo ‘iloa he fonua. ‘oku taku foki ko e feitu’u ‘eni ‘a e kau tu’umalie pea kuo tokolahii ha kau sitaa ‘iloa’i loto Holly Wood kuo ‘auha honau ngaahi fale.
‘Oku toe fakaloloma ange ko e ngangau ‘ulu lahitaha ko e ngaahi kautaha malu’i. Pea kuo ‘iai ‘a e ngaahi kautaha ‘e ni’ihi kuo fakangatangata pe ‘enau tokoni pe totongi huhu’i he kuo ofi ‘enau lepa ‘anautolu he ‘auha. He na’e ‘ikai ke ‘iai ha ‘amanaki ia ki he fu’u vela lahi pehee faka’angataha. Kuo hiki ai he ngaahi kautaha ‘e ni’ihi ‘enau totongi fakamahina pea liliu ‘e he ni’ihi ‘enau ngaahi tu’utu’uni ngaue koe’uhi ko e vela kuo hoko pea ‘e ngali koha pole ia kiate kinautolu he kaha’u. Ko e kakai ‘e ni’ihi ngalingali ‘e ‘ikai tali he ngaahi kautaha ‘enau ‘eke koe’uhi ko ha ngaahi fakafekiki fakalao pea ko e tokolahi ‘e fuoloa ‘a e ngaue ‘e fakahoko pea toki tali ‘enau ‘eke.
Ko e tokolahi foki ia ‘oku ‘ikai malu’i honau ngaahi ‘api pea ‘oku toe taki pe ko e fakatamaki ta’emalu’i lahi taha ‘eni ki he tokolahi.
Ka ‘oku toe fakaoli ange ‘a e kamata ke fetuhu’aki ‘a e kau ma’u mafai ‘o LA ki he fakatamaki lahi kuo hoko, pe kohai na’e hala. Kuo tukuaki’i ai ‘e he va’a tamate afi ‘a LA, na’e kaunga mo hono tu’usi $18 miliona ‘enau patiseti ki he mafola lahi mo vave ‘a e vela. Kuo a’u ‘a e tukuaki’i ki he Palesiteni fili, ka ‘oku kata mai ‘a Trump he fa’ahinga to’onga ko’eni ko e tuhu holo kae ‘ikai tali ‘ete kovi na’e fai.
Ko e tuli tonuhia holo ko’eni ‘a e pulekolo ‘o LA mo’enau fakafofonga ki Fale Alea, ko e mafatukituki ia ‘o e launga mo e hanu ‘a e kakai kuo vela honau ngaahi ‘api pea mo honau ngaahi ‘ofa’anga kuo mate pea ‘oku tuhu kotoa pe ki he kau taki.
‘I he taimi tatau ‘oku toe malieange ‘a e ngaahi vitio ia ‘o e polokalama foaki pale ‘a e kau sita ‘o loto Holly Wood, ‘o hangee ‘oku nau manuki ki he ‘Otua pea mahe’a ai lea ko LA ko e GODLESS CITY. ‘I he ‘aho pe taha kuo vela ‘a e kolo pea fiu hono ta’ofi, ka ko e anga pe ia fakakaukau ‘a e tokolahi, ka kuo puke atu he kau Polisi ha ni’ihi ‘o tukuaki’i ki he tupu’anga ‘o e vela pea puke mo e tokolahi he kuo hoko ‘a e vela kenau nusi afaa kinautolu he ngaahi ‘api mo e ngaahi kautaha ‘oku te’eki ke a’u kiai ‘a e vela.
Kaekehe koe palopalema lahitaha ‘oku fepaki mo e tamate afi ‘a LA, ko e ‘osi ‘a e ngaahi ma’u’anga vai ke ngaue’aki ki he tamate’i ‘o e afi pea pehee foki ki he havili ‘ene toe fakavave’i ‘a e totolo ‘a e vela. Pea kuo kamata ke ‘aukolo atu mo e kau tamate afi ‘o e ngaahi fonua kehekehe ke tokoni ki honau kaunga ngaue ‘i LA.
‘Oku toe fakaofo mo e ngaahi talanoa ki he fale ‘o ha tangata Katolika na’e hao lelei pe ia, kae ‘osi kotoa hono kaunga’api mo honau kolo he vela. ‘Oku tui foki ‘a e tangata ni, ‘oku makatu’unga ia mei he’ene tauhi ki he ngaahi ouau ‘o e siasi ‘i hono ‘omai ki hono ‘api. Ko e kau tu’umalie ‘e ni’ihi ‘oku hao honau ngaahi fu’u ‘api pea ko honau hisitolia na’anau fakahoko ‘a e ngaue lelei, hangee ko e foaki ‘enau pa’anga ki he masiva, tokoni langa ngaahi ‘apiako mo e falemahaki mo e ngaahi ngaue lelei kehe pe. Pea ‘oku nau tui na’e kaunga ‘enau ngaue lelei koia ki he hao honau ngaahi fale.
Ko e lesoni mahu’inga taha heni, ko e taimi ‘oku tau toki fetaulaki ai mo e faingata’a ‘oku tau toki manatu’i pe ‘ilo ‘a e ‘Otua. Ka ko e tokolahitaha foki ia ‘i LA ‘oku ‘ikai kenau tui kinautolu ‘oku ‘iai ha ‘Otua.
