Kamata hopo’i fanau Ha’ateiho tukuaki’i ki he pekia talavou mei Pahu
‘Oku lolotonga lele ‘i he Fakamaau’anga Lahi ‘o Tonga ‘i he malumalu ‘o e ‘Eiki Fakamaau Lahi, ‘a e hopo’i ‘o e fanau ‘e toko 8 mei Ha’ateiho ki he pekia ‘a e talavou ko Toni Lopeti he mahina ko Sepitema ‘o e ta’u kuo’osi ‘i Pahu he toumu’a ‘o e Fifita House.
Ko e kau Faka’iloa ko Mesuilame Finau ‘o Fo’ui, Tevita Lisiate, Viliami Tongamana, Moana Masima, Mafua Palu, Richard Vea, Siosifa Vatuvei pea mo Salamani Filikitonga.
Ko e ni’ihi ‘o e kau Faka’iloa ‘oku taki 3 mo 2 ‘a e tikite faka’ilo, koe’uhi ko e natula kehekehe ‘o e ngaahi me’a na’anau kau kiai he taimi na’e fakahoko ai ‘a e kee ‘o pekia ai ‘a Toni. Kuo ‘iai ‘a e ni’ihi kuo nau ‘osi tali halaia ki he tikite ko e fakalaavea ma’ama’a pea tali tohuhia ki he fakalavea mamafa.
‘I he taimi tatau ko e toko 3 ‘o e kau Faka’iloa ‘e toko 8 ‘oku ‘ikai ke ‘iai hanau fakafofonga Lao pea ‘oku nau fakafofonga’i pe kinautolu.
Kaekehe ko e puipuitu’a ‘o e hisitolia ‘o e me’a na’e hoko ‘i Sepitema ‘o ta’u kuo ‘osi, ‘o fakatatau mo hono lau ‘e ‘Ofisa Vea ko e ‘ofisa fakatotolo na’ane fakahoko ‘a e faka’eke’eke ‘o e toko 4 ‘o e kau Faka’iloa. ‘Aia na’e kole ‘a e Talatalaaki ke ‘oua ‘e lau kakato ‘a e ngaahi faka’eke’eke, kae lau pe ngaahi konga ‘oku felave’i mo e hopo, ka na’e ‘ikai tali ‘e he ‘Eiki FAkamaau Lahi, ka na’ane tu’utu’uni ke lau kakato pe ‘a e faka’eke’eke.
Ko e ‘uluaki faka’eke’eke ko e matapule ko Mesuilama Finau pea ko e tokotaha ‘eni ‘oku tukuaki’i mamafa lahitaha ‘i he kau Faka’iloa.
Hili hono fakataukei’i ia ki he’ene totonu fakalao kimu’a he faka’eke’eke na’e kamata leva ‘a e faka’ekeeke.
Fakatatau mo e fakamatala faka’eke’eke, na’e ‘uluaki fai pe kee he vaha’a ‘o e kau Faka’iloa mo e fanau mei Pahu he Tokonaki kimu’a he Tokonaki na’e toki pekia ai ‘a Toni.
Pea ‘i he Tokonaki na’e pekia ai ‘a Toni, na’e alu ‘a e kau Faka’iloa ‘o fai enau sio va’inga Liiki toko hiva na’e fakahoko. Na’anau foki mai ‘o ‘ela ‘i he tau’anga pasi ‘i ‘Atele pea nau fetu’utaki telefoni ki he taha ‘o e kau Faka’iloa pe kofe’ia kinautolu. Na’e talamai kenau lue ange ki he ‘api ‘oku nau ‘iai ‘i Ha’ateiho, ‘oku fai ‘enau kai ‘umu. Ka na’anau a’u atu kuo ‘osi ‘a e kai, ka ‘oku fai ‘enau inuinu pea nau kau ai pe he inu ‘o a’u ki he efiafi.
Na’e fakafuofua ki he 8:00pm na’anau suto leva ki Nuku’alofa ki he ki’i Bar ko SiolaBar. Ka na’e ‘ikai tali kenau huu ki loto pea nau nofo ai pe tu’a ‘o a’u ki he tapuni ‘a e bar.
‘I he’enau foki mai, na’e ‘iai ‘a e fanau to’utupu Pahu ‘i he fo’ihala ‘oku ‘iloa ko e hala Holomui ‘a e Pato. Ko e fo’i hala he vaha’a ‘o e Fifita House pea mo e ‘Apiako Mangaia. Fakatatau ki he fakamatala faka’eke’eke, na’e lau mo pole fuhu mai ‘a e fanau Pahu ki he kau Ha’ateiho pea lau atu mo e kau Faka’iloa ‘onau fe’ohofaki ‘o fuhu. Na’e a’u ki ha tu’unga kuo lele ‘a e to’utupu mei Pahu kae ma’u he kau Faka’iloa ‘a e tokotaha. Na’e toe foki mai ‘a e kau Pahu ke fakahaofi atu ‘a e tama na’e ma’u pea ko’enau toe lele koia ‘o humu ‘a e pekia ‘o too ki lalo. Na’e a’u atu ‘a e kau Faka’iloa ‘o tuki mo ‘aka pea ko Mesui na’e ‘alu atu ia mo e va’a sii ‘o taa ‘aki ‘ulu mo e mata ‘o e pekia lolotonga ‘ene tokoto. Pea ko e ‘uhinga ia ‘oku faka’ilo makehe ai ia.
Na’e ‘ohake foki ‘a e ‘uu ta ‘o e pekia hee TV screen pea mahino ko e maloloo ‘a e pekia ko e lahi ‘a e taa na’e fakahoko kiai. Na’e taka’uli pea pupula lahi hono ongo mata pea lavea lahi mo e mata ‘o tukuaki’i ki he va’a sii na’e taa’aki.
Kaekehe fakatatau ki he fakamatala ‘a ‘ofisa Tu’itavuki na’ane fakahoko ‘a e faitaa, na’e a’u atu kinautolu ki Falemahaki kuo ‘osi pekia ‘a Toni ia. Na’e ‘iai pea mo e ngaahi ‘ata kehekehe na’e fu’u fakalilifu ‘ene ‘asi ka na’e ‘ikai ‘ohake ia he TV Screen.
‘Oku malie foki mo e fakamatala na’e ‘ohake he sivi na’e fakahoko he taha ‘o e ongo Toketaa na’e ngaue ki he sino ‘o e pekia, na’e makatu’unga ‘ene maloloo mei he fokotuua kehe. Ka ‘i he sivi faka’osi na’e fakahoko ‘e Siale ‘Akau’ola na’e mahino ai, na’e hoko ‘a e lavea ki he ‘uto ‘o e pekia mo e lavea ki hono mata. Pea ko e makatu’unga ia ‘oku faka’ilo ai ‘a e kau Faka’iloa ko e liooti koia na’e hoko ‘a e lavea ki he ‘uto ‘o e pekia, he ko e taha ia ‘oha ‘uhinga malohi ke ne fakatupunga ‘ene pekia.
‘Oku fe’unga mo e toko 15 ‘a e kau Fakamo’oni ‘a e Talatalaaki pea ‘oku kei lele pe ‘a e hopo pea toki mahino hano ola ‘i he uike ni pe ko e uike kaha’u.
‘I he anga vakai ‘a e ongoongo ni ki he hopo ‘e malie lahi koe’uhi ko e ola ‘a e lipooti ‘a e ongo Toketaa. Ko e taha na’e mate koe’uhi ko e fokoutua pe ‘o e pekia pea ko e lipooti ‘e taha, na’e ‘iai ‘a e lavea ki he ‘uto mo e lavea lahi ki he mata ‘o e pekia, ka ‘e toki aofangatuku ia he kau loea.
